ދަރިފުޅާ ދެމެދު އޮތް ގުޅުން ރަނގަޅު ކުރެވުނީ ތެރަޕީ ނަގައިގެން ކަމަށް ބޮލީވުޑްގެ މަޝްހޫރު ތަރި އާމިރު ޚާން ބުނެފިއެވެ.

އޭނާ މިހެން ބުނެފައިވަނީ ދާދި ފަހުން ދިން އިންޓަވިއުއެއްގައި ނަފްސާނީ ދުޅަހެޔޮކަމާ ބެހޭގޮތުން ވާހަކަ ދައްކަމުންނެވެ. އެގޮތުން އޭނާ ބުނެފައިވަނީ ނަފްސާނީ މައްސަލައެއްް ތަހައްމަލު ކުރަމުން ދާނަމަ ތެރަޕީ ނެގުމަކީ ވަރަށް މުހިންމު ކަމެއް ކަމަށެވެ. އަދި ތެރަޕީ ނެގުމުން އެކަމަކުން އަރައިގަންނަން ފަސޭހަވާނެ ކަމަށްވެސް އާމިރު ވަނީ ބުނެފައެވެ.

އާމިރު އިތުރަށް ބުނެފައިވަނީ އޭނާގެ އަންހެން ދަރިފުޅު އިރާ ޚާން އާއި އޭނާއާއި ދެމެދު އޮތް ގުޅުންވެސް ރަނގަޅުވެ، ބަދަހިވީ ތެރަޕީ ނަގައިގެން ކަމަށެވެ. އެގޮތުން އޭނާއާއި އިރާއާއި ދެމީހުން ޖޮއިންޓު ތެރަޕީއަށް ދާކަމަށް އާމިރު ވަނީ ބުނެފައެވެ. އަދި އެކަމުގެ ސަބަބުން ފާއިތުވެ ދިޔަ އަހަރުތަކުގައި ދިމާވި ތަފާތު އެކި މައްސަލަތައްވެސް ހައްލު ކުރަން ފަސޭހަވާ ކަމަށް އޭނާ ވަނީ ބުނެފައެވެ.

އާމިރު އަކީ އިންޑިއާގެ ސިނަމާގައި ވަރަށް ނަން ހިނގާ މީހެކެވެ. ނަމަވެސް މަސައްކަތަށް މުޅި އުމުރުގެ ގިނަ ވަގުތުތަކެއް ހުސްކުރުމުގެ ސަބަބުން އޭނާއާއި އޭނާގެ ދަރިންނާ ދެމެދު އޮތް ގުޅުން ވަރަށް ބޮޑަށް ހީނަރުވިކަމަށް އޭނާގެ ވާހަކަ ތަކުން އެނގިގެންދެއެވެ.