ފަލަސްތީނުގެ ދިފާއުގައި ހަރަކާތްތެރިވާ ހަމާސްގެ އަތްދަށުން މިނިވަންކުރާ ނިރުބަވެރި އިސްރާއީލް ޖަމާއަތުގެ ކޮންމެ މީހަކަށް ފަސް މިލިއަން ޑޮލަރު ހުށައެޅުމަށް އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ނިންމައިފިއެވެ.

ނަތަންޔާހޫ މި ހުށައެޅުން ހުށައަޅާފައި ވަނީ އިސްރާއީލުން މިހާރު ޣައްޒާއަށް އަރައި ހިންގަމުންދާ ޖަރީމާތަކުގެ ތެރެއިން ހިފާފައިވާ ސަރަހައްދަށް ގޮސް ނިރުބަވެރިންނާ ބައްދަލުކޮށް ވާހަކަ ދައްކަމުންނެވެ.

ނިރުބަވެރިންނާ ބައްދަލުކޮށް ނަތަޔާހޫ ވަނީ ހަމާސްއިން ހިފަހައްޓާފައިވާ އިސްރާއީލުގެ ނިރުބަވެރިން މިނިވަން ކުރުމަށް އެހީތެރިވެދޭ މީހުންނަށް ފަލަސްތީނުގެ ސަރަހައްދުން ނިކުމެވޭނެ މަގެއް ފަހިކޮށްދޭނެ ކަމަށްވެސް ބުނެފައެވެ.

"އަހަރުމެންގެ ރަހީނެއް ގެނެސްފި މީހަކަށް، އަމިއްލައަށް ވެސް އަދި އޭނާގެ އާއިލާއަށް ރައްކާތެރި މަގެއް ހޯދައިދޭނަން. އަދި މިނިވަންކުރާ ކޮންމެ ރަހީނަކަށް ފަސް މިލިއަން ޑޮލަރު ދޭނަން،" ފަލަސްތީނުގެ ސަރަހައްދަށް ކުރި ކުރު ދަތުރުގައި ނިރުބަވެރިންގެ ލީޑަރު ނަތަންޔާހޫ ބުނެފައިވެއެވެ.

އެމެރިކާގެ އެހީތެރިކަމާއެކު އިސްރާއީލުން މެދުއިރުމަތީގައި ހިންގަމުންދާ ލާއިންސާނީ އަމަލުތަކުގެ ތެރެއިން ޣައްޒާއަށް އަރައި ހިންގި ޖަރީމާތަކުގައި އިސްރާއީލުގެ ގިނަ ނިރުބަވެރިންތަކެއް ވަނީ ހަމާސްއިން ހިފަހައްޓާފައެވެ. މި ނިރުބަވެރިން ދޫކޮށްލުމަށް އެދި އިސްރާއީލު ސަރުކާރަށް އެފަރާތްތަކުގެ އާއިލާތަކުން ދަނީ މަޖުބޫރުކުރަމުންނެވެ.

ނަތަންޔާހޫއަށް މިހާރު ވަނީ އިސްރާއީލުގެ ހުރިހާ ވަސީލަތެއް ބޭނުންކޮށްގެންވެސް ހަމާސްގެ ހައްޔަރުގައި ތިބި އިސްރާއީލުގެ ނިރުބަވެރިން މިނިވަން ކުރުމަށް މަސައްކަތް ކުރަން މަޖުބޫރުވެފައެވެ.

އިސްރާއީލުން ފަލަސްދީނަށް އަރައި ހިންގަމުންދާ ޖަރީމާތަކުގައި މިހާތަނަށް 44،000 އަށްވުރެ ގިނަ މީހުން ވަނީ މަރުވެފައެވެ. އަދި މި ޖަރީމާތަކުގައި ފަލަސްދީނުގެ 104،000 އަށް ވުރެ ގިނަ މީހުން ޒަޚަމްވެފައިވެއެވެ.