ކަންކަމުގައި ނާކާމިޔާބު ވުމުން އެކަމާ ހިތާމަ ކުރަނީ އެކަނިހުރެ ކަމަށް ބޮލީވުޑްގެ މަޝްހޫރު ތަރި ޝާހުރުކް ޚާން ބުނެފިއެވެ.

އޭނާ މިހެން ބުނެފައިވަނީ ދާދި ފަހުން ދުބާއީގައި ބޭއްވި ގްލޯބަލް ފްރެއިޓު ސަމިޓުގައި ނާކާމިޔާބީތަކާ ބެހޭ ގޮތުން ވާހަކަ ދައްކަމުންނެވެ. އެގޮތުން އޭނާ ބުނެފައިވަނީ ބުރަ މަސައްކަތް ކުރިނަމަވެސް ބައެއް ފަހަރު ކާމިޔާބީއާ ހަމައަށް ވާސިލު ނުވެވޭ ކަމަށާއި، އެފަދައިން ނާކާމިޔާބުވާ ވަގުތުތަކުގައި އެކަމާމެދު ހިތާމަ ކުރަނީ އެކަނި ހުރެ ކަމަށެވެ.

"ނާކާމިޔާބުވެ ދެރަވުމުން ވަރަށް ރުޅިވެސް އާދޭ. އެހެންވެ ފާހާނާގައި ހުރެ ވަރަށް ރޮން. އެކަމަކު އެއްވެސް މީހަކަށް އެ ހިތާމަވެރިކަމެއް ނުދައްކަން" ޝާހުރުކް ވަނީ މި ސަމިޓުގައި ވާހަކަ ދައްކަމުން ބުނެފައެވެ.

އޭނާ އިތުރަށް ބުނެފައިވަނީ ނާކާމިޔާބީތަކަކީ ކަންކަން ދަސްވުމަށް އޮންނަ މަގު ކަމަށެވެ. އަދި ނާކާމިޔާބީތަކަކީ ކަންކަން ބަދަލުކޮށް، އިތުރަށް މީހާ ފުރިހަމަވެ، ކުރިއަރައިދިއުމަށް އޮތް ބާރެއް ކަމަށްވެސް ޝާހުރުކް ވަނީ ބުނެފައެވެ.

މަސައްކަތުގެ މައިދާނަށް ބަލާއިރު ޝާހުރުކް މިހާރު ތައްޔާރު ވަމުން ދަނީ ސުޖޯއި ގޯޝްގެ ކުރިއަށް އޮތް ފިލްމު "ކިންގު" ގެ ޝޫޓިން ފެށުމަށެވެ. މިއީ ޝާހުރުކް އާއި އޭނާގެ އަންހެން ދަރިފުޅު ސުހާނާ ޚާން ފުރަތަމަ ފަހަރަށް އެކުގައި ފެންނާނެ ފިލްމެވެ.