ލޭގެ ޕްރެޝަރު މަތިވުމަކީ އޭގެ ސަބަބުން ތަފާތު އެކި ސިއްހީ މައްސަލަތައް ދިމާވާ ކަމެކެވެ. ލޭގެ ޕްރެޝަރު މަތިވާ ވަރަށް ގިނަ ސަބަބުތައް ވެއެވެ. އޭގެ ތެރޭގައި މީހާ މާ ބޮޑަށް ސްޓްރެސް ވުމާއި، ސިނގިރޭޓު ބުއިމާއި މީހާ މާ ބޮޑަށް ފަލަވުން ހިމެނެއެވެ. ތިރީގައި މި ހިމަނާލަނީ ލޭގެ ޕްރެޝަރު ދައްކުރެވޭނެ ބައެއް ގޮތްތަކެވެ.

ސްޓްރެސް މެނޭޖު ކުރުން

ދިރިއުޅުމުގައި ދިމާވާ އެކި ކަންކަމުގެ ސަބަބުން މީހާ ވަރަށް ބޮޑަށް ސްޓްރެސްވާ ފަހަރު އާދެއެވެ. މިފަދަ ދަނޑިވަޅުތަކުގައި ލޭގެ ޕްރެޝަރު ދައްކުރަން ބޭނުންްވާނަމަ ސްޓްރެސް މެނޭޖުކުރާނެ ގޮތްތައް އެނގުމަކީ ވަރަށް މުހިންމު ކަމެކެވެ. ސްޓްރެސް މެނޭޖު ކުރުމަށް ކުރެވޭނެ ބައެއް ކަންކަމުގެ ތެރޭގައި ފުންކޮށް ނޭވާލުމާއި، މެޑިޓޭޓު ކުރުން ހިމެނެއެވެ.

ލޮނު ބޭނުންކުރާ ވަރު މަދު ކުރުން

އަޅުގަނޑުމެންގެ ތެރޭގައި ގިނަ މީހުންނަކީ ކޮންމެ ދުވަހަކުވެސް ތަފާތު އެކިކަހަލަ ލޮނު ކާނާގެ ބާވަތްތައް ކައިއުޅޭ މީހުންނެވެ. ނަމަވެސް މާ ގިނައިން ލޮނު ކާނަމަ އޭގެ ސަބަބުން ލޭގެ ޕްރެޝަރު މަތިވެއެވެ. އެހެންކަމުން ލޭގެ ޕްރެޝަރު ދައްކުރަން ބޭނުންވާނަމަ ލޮނު ބޭނުން ކުރާ ވަރު މަދު ކުރުމަކީވެސް ވަރަށް މުހިންމު ކަމެކެވެ.

ބަރުދަން ލުއިކުރުން

މީހާ މާބޮޑަށް ބަރުވެ އޮބީސް ވުމަކީ އޭގެ ސަބަބުން ލޭގެ ޕްރެޝަރު މަތިވާ ކަމެކެވެ. އެހެންކަމުން ލޭގެ ޕްރެޝަރު ދައްކުރަން ބޭނުންވާނަމަ ސިއްހަތަށް ފައިދާހުރި ކާނާގެ ބާވަތްތައް ބޭނުންކޮށް، ބަރުދަން ލުއިކުރަން މަސައްކަތް ކުރުމަކީ ވަރަށް މުހިންމު ކަމެކެވެ. ބަރުދަން ލުއިވުމުން އޭގެ ސަބަބުން ލޭގެ ޕްރެޝަރު ހަމައަކަށް އެޅޭނެއެވެ.