ބައެެއް ފަހަރު ކަންކަމާމެދު ދެބަސްވިނަމަވެސް ބައްޕައާ ވަރަށް ރަނގަޅު އަދި ވަރަށް ގާތް ގުޅުމެއް އޮންނަ ކަމަށް އައްްލޫ އަރުޖުން ބުނެފިއެވެ.

އޭނާ މިހެން ބުނެފައިވަނީ އޭނާގެ ކުރިއަށް އޮތް ފިލްމު "ޕުޝްޕާ 2: ދަ ރޫލް" ޕްރޮމޯޓު ކުރުމަށް ދިން އިންޓަވިއުއެއްގައެވެ. މި އިންޓަވިއުގައި އޭނާވަނީ އޭނާގެ ބައްޕަ އައްލޫ އަރުވިންދު އާއެކު އޮންނަ ގުޅުމާ ބެހޭ ގޮތުން ވާހަކަ ދައްކާފައެވެ. އެގޮތުން އޭނާ ބުނެފައިވަނީ އޭނާގެ ބައްޕައާ ދެމީހުން ބައެއް ފަހަރު ދެބަސްވި ނަމަވެސް ދެމީހުންގެ ދެމެދުގައި ވަރަށް ގާތް ގުޅުމެއް އޮންނަ ކަމަށެެވެ.

"ބައެއް ކަންކަމާމެދު ބައްޕައާ ދެމީހުން ދެބަސްވަން. އެކަމަކު އަހަރެމެންގެ ދެމެދުގައި އޮންނަނީ ވަރަށް ގާތް ގުޅުމެއް." އައްލޫ އަރުޖުން މި އިންޓަވިއުގައި ބުނެފައި ވެއެވެ.

އޭނާ އިތުރަށް ބުނެފައިވަނީ އޭނާ ދެކެނީ އޭނާގެ ބައްޕައަކީ ހީރޯއެއްގެ ގޮތުގައި ކަމަށެވެ. އަދި ކޮންމެ ގުޅުމެއްގައިވެސް ދެބަސްވުންތަކެއް އުފެދުމަކީ އެކަށީގެންވާ ކަމެއް ކަމަށާއި، ނަމަވެސް ވާހަކަ ދައްކައިގެން އެކަން ހައްލު ކުރަން ކޮންމެ މީހަކަށްވެސް އެނގުމަކީ ވަރަށް މުހިންމު ކަމެއް ކަމަށް އޭނާ ވަނީ ބުނެފައެވެ.

އައްލޫ އަރުޖުންގެ ކުރިއަށް އޮތް ފިލްމު "ޕުޝްޕާ 2: ދަ ރޫލް" ގެ ޓްރެއިލަރ މިހާރު ނެރެފައިވާއިރު އެތައް ބައެއްގެ ސަމާލުކަން ވަނީ މި ފިލްމަށް ލިބިފައެވެ. ގިނަ ބަޔަކު އިންތިޒާރު ކުރަމުން އަންނަ މި ފިލްމު ނެރުމަށް ހަމަޖެހިފައިވަނީ މި އަހަރު ޑިސެމްބަރު 5 ގައެވެ.