ކުޑަކުދިންނަކީ ކުޅުމާއި މަޖަލުގަ ގިނަ ވަގުތުތަކެއް ހޭދަކުރާ ކުދިންނަށް ވީއިރު އެކުދިން ތަފާތު އެކިކަހަލަ ކުޅޭ އެއްޗެހި ބޭނުން ކުރެއެވެ. ގިނަ ކުދިންނަށް އެންމެ ކަމުދާ ކުޅޭ އެއްޗެއްސަކީ ސޮފްޓު ޓޯއިސް އެވެ. ކަފަ އަޅާފައި ހަދާފައި ހުންނަ މި އެއްޗެހި މިއީ ބަލާލަން ރިތި އަދި ފަސޭހައިން ބައްދާލެވޭ އެއްޗެހި ކަމުގައި ވީނަމަވެސް، މި ގެންގުޅޭނަމަ އެކުދިންގެ ސިއްހަތަށް އޭގެ ނޭދެވޭ އަސަރު ވަރަށް ބޮޑަށް ކުރެއެވެ.

އެގޮތުން ބަލާއިރު މިފަދަ ކުޅޭ އެއްޗެހި ބޭނުން ކުރާ ކުދިންނަށް އެލާޖީ މައްސަލަތައް ދިމާވެ ނޭވާލާ ނިޒާމުގެ ބަލިތައް ވަރަށް ފަސޭހަކަމާއެކު ޖެހެއެވެ. މިކަން މިހެން ވަނީ މިފަދަ ކުޅޭ އެއްޗެހީގައި ހިރަފުހާއި ތަފާތު އެކިކަހަލަ އެލާޖެންތައް ފަސޭހަކަމާއެކު ހަރުލާތީއެވެ. އަދި މިގޮތަށް އެލާޖެންތައް ހަރުލާފައި ހުރެ ގިނަ ދުވަސްވުމުން އެ ކުޅޭ އެއްޗެހީގައި އެކިކަހަލަ ޖަރާސީމުތައް އާލާވެ އެކަމުގެ ސަބަބުން އޭގައިން ކުޅޭ ކުދިންނަށް އޭގެ ނޭދެވޭ އަސަރު ކުރެއެވެ.

އަދި ބައެއް ފަހަރު މިފަދަ ސޮފްޓު ޓޯއިތައް ބޭނުން ކުރުމުން ކުޑަކުދިންގެ ހަންގަނޑު ވެސް ހަލާކުވެއެވެ. މިކަން މިހެން ދިމާވަނީ މި އެއްޗެހި ތައްޔާރު ކުރުމަށް އަގުހެޔޮ އަދި ކޮލިޓީ ދައް އެެއްޗެހި ބޭނުން ކުރާތީއެވެ. މިކަމުގެ ސަބަބުން މި އެއްޗެހި ކުޅެން އުޅޭ ކުދިންގެ ހަންގަނޑު ހަލާކުވެ، ހަމުގެ އެކި މައްސަލަތައްވެދް ދިމާވެއެވެ.

އަދި މީގެ އިތުރުން މިފަދަ ކުޅޭ އެއްޗެހި ބޭނުން ކުރުމުން ބައެއް ފަހަރު އެ އެއްޗެހީގައި ހުންނަ ކުދި ތަންތަންކޮޅު ކުދިންގެ ކަރުތެރެއަށްގޮސް ކަރުތެރެ ބެދޭ ފަހަރުވެސް އާދެއެވެ. މިކަން މިހެން ވަނީ އެ އެއްޗެހި ތައްޔާރު ކުރާއިރު ޒީނަތްތެރި ކުރުމަށް ކުދިކުދި އެއްޗެހި ބޭނުން ކުރާތީއެވެ. ކުޑަކުދިން ކުޅޭއިރު މި އެއްްޗެހި އަނގަޔަށް ގޮސް، ކަރުތެރޭގައި ތާށިވެ އޭގެ ސަބަބުން ކުއްޖާއަށް ސިއްހީ މައްސަލަތައް ދިމާވެއެވެ.

އަޅުގަނޑުމެންގެ ތެރޭގައި އެތައް ބަޔަކު ބޭނުން ކުރާ ސޮފްޓު ޓޯއިސް މިއީ މިހާ ގެއްލުން ހުރި އެއްޗަކަށްވީއިރު މި ބޭނުން ނުކޮށް ހުއްޓާލުމަކީ ވަރަށް މުހިންމު ކަމެކެވެ. އަދި މި ނޫން ގޮތެއް އެކުދިންނަށް ހޯދައިދޭން ޖެހެއެވެ. ފަސޭހަކަމާއެކު ސާފުކުރެވޭ ފަދަ ކުޅޭ އެއްޗެހި ކުދިންނަށް ދޭން ޖެހެއެވެ.

މަސްދަރު:އީޓައިމްސް