ދުނިޔޭގެ އެންމެ އުމުރުން ދުވަސްވީ މީހާ މަރުވެއްޖެކަމަށް އޭނާގެ އާއިލާއާ ހަވާލާދީ މީޑިއާތަކުން ރިޕޯޓު ކޮށްފިއެވެ.

ޓައިމްސް އޮފް އިންޑިއާގެ ރިޕޯޓެއްގައި ބުނެފައިވަނީ ދުނިޔޭގެ އެންމެ ދުވަސްވީ މީހާ ކަމުގައިވާ ޖޯން އަލްފްރެޑު ޓިނިސްވުޑް އުމުރުން 112 އަހަރުގައި މަރުވެފައިވާ ކަމަށް އޭނާގެ އާއިލާއިން މައުލޫމާތު ދީފައިވާ ކަމަށެވެ. އެގޮތުން އޭނާ މަރުވެފައިވަނީ އޭނާގެ ހަޔާތުގެ ފަހު ދުވަސްތައް ހޭދަކުރި އުމުރުން ދިވަސްވީ މީހުން ބަލާ ގެއެއް ކަމަށްވާ ސައުތުޕޯޓުކެއާ ހޯމް ގައި ކަމަށް ރިޕޯޓުގައި ވެއެވެ.

އިނގިރޭސި ވިލާތަށް ނިސްބަތްވާ ޖޯން އުފަންވެފައިވަނީ 1912 ގެ އޮގަސްޓު މަހުގެ 26 ގައެވެ. މި އަހަރަކީ ޓައިޓޭނިކް ބޯޓު އަޑިއަށް ދިޔަ އަހަރު ކަމަށް ރިޕޯޓުގައި ވެއެވެ. ޖޯން ވަނީ އޭނާ ދުނިޔޭގައި ހޭދަކުރި 112 އަހަރުގައި ވަރަށް ގިނަ ކަންކަން ދެކެފައެވެ. އެގޮތުން ބަލާއިރު އޭނާ ވަނީ ދުނިޔޭގައި ހިނގައި ދިޔަ އެންމެ ބޮޑު ދެ ހަނގުރާމަ ދެކެފައެެވެ. އަދި ދެވަނަ ބޮޑު ހަނގުރާމާގައި އޭނާ ވަނީ ރޯޔަލް އާމީގައި ހުރެ އޭނާގެ ގައުމަށް ހިދުމަތް ކޮށްދީފައެވެ.

އޭނާއަށް އިނގިރޭސި ވިލާތުގައި ހުރި އެންމެ ދުވަސްވީ މީހާގެ ލަގަބު ލިބިފައިވަނީ 2020 ގައެވެ. އަދި ދުނިޔޭގެ އެންމެ ދުވަސްވީ މީހާގެ ލަގަބު ލިބި ގިނިސް ވޯލްޑް ރިކޯޑްސް އަށް އޭނާގެ ނަން އަރާފައި ވަނީ މިއަހަރުއެވެ. އޭނާއަށް މި ރިކޯޑު ލިބުނީ ހުއާން ވިންސެޓު ޕެރޭޒް މޯޒާ 114 އަހަރުގައި މަރުވުމުންނެވެ.

އޭނާގެ އާއިލާއިން ބީބީސީއަށް މައުލޫމާތު ދެމުން ބުނެފައިވަނީ ޖޯން އެންމެ ފަހު ދުވަސްތައް ހޭދަކުރީ އޭނާދެކެ ލޯބިވާ މީހުންނާއެކު ސަކަރާޔް ޖަހައި ވަގުތު ހޭދަކުރުމުގައި ކަމަށެވެ.