ކައްޓަލައަކީ ވަރަށް ގިން މީހުންނަށް ކަމުދާ އަދި ތަފާތު އެކި ގޮތްގޮތަށް ތައްޔާރު ކުރެވޭ ކާނާގެ ބާވަތެކެވެ. މިއީ އެކިކަހަލަ ނިއުޓްރިއެންޓުތައް ހިމެނޭ އެއްޗަކަށްވީއިރު، މިއީ ސިއްހަތަށް ވަރަށްވެސް ފައިދާހުރި އެއްޗެކެވެ. މިފަހަރު މި ހިމަނާލަނީ ކައްޓަލަ ކެއުމުން ލިބޭ ބައެއް ފައިދާތަކެވެ.

ދިފާއީ ނިޒާމު ވަރުގަދަ ކޮށްދޭ

މިއީ ގިނަ އަދަދަކަށް ނިއުޓްރިއެންޓު ހިމެނޭ އެއްޗަކަށްވީއިރު އޭގެ ތެރޭގައި ވިޓަމިން "އޭ" އާއި "ސީ" ހިމެެނެއެވެ. މި ދެ މާއްދާއަކީވެސް މީހާގެ ދިފާއީ ނިޒާމު ވަރުގަދަ ކުރުމުގައި އެހީވެދޭ މާއްދާތަކެވެ. އެހެންކަމުން ކައްޓަލަ ކާނަމަ މީހާގެ ދިފާއީ ނިޒާމު އިތުރަށް ވަރުގަދަވެ ބަލިތަކާ މީހާ ދުރުވެއެވެ.

ހިތުގެ ސިއްހަތު ރަނގަޅު ކޮށްދޭ

ކައްޓަލައަކީ އޭގައި ގިނަ އަދަދަކަށް އެންޓި އޮކްސިޑެންޓުތަކާއި، ބީޓާ ކެރޮޓޮނިން އެކުލެވޭ އެއްޗެކެވެ. އެހެންވެ، މި ކެއުމުން މީހާ އޮކްސިޑޭޓިވް ސްޓްރެސް އާ ދުރުކޮށްދީ ހަށިގަނޑު ދުޅަވުން ކުޑަކޮށްދޭން އެހީވެއެވެ. އަދި އޭގެ ސަބަބުން މީހާ ތަފާތު އެކިކަހަލަ ހިތުގެ ބަލިތަކުންވެސް ރައްކާތެރި ވެއެވެ.

ހަކުރު ބަލިން މީހާ ދުރުކޮށްދޭ

ކައްޓަލަ އަކީ ހަކުރު ބައްޔާ މީހާ ދުރުކޮށްދިނުމަށްވެސް އެހީވެދޭ އެއްޗެކެވެ. މިއީ ގިނަ އަދަދަކަށް ފައިބާ އެކުލެވޭ އެއްޗަކަށްވީއިރު، މީގައި ހުންނަ ގްލައިކެމިކް އިންޑެކްސް ވަރަށް ކުޑައެވެ. އެހެންކަމުން ކައްޓަލަ ކެއުމުން ކާއެއްޗެހި ހަޖަމު ކުރެވޭ ވަރު ލަސްވެ، އޭގެ ސަބަބުން ލެއަށް ގްލޫކޯޒު ދަމައިގަންނަ ވަރުވެސް ދައްވެއެވެ. އަދި އޭގެ ސަބަބުން މީހާ ހަކުރު ބަލިން ރައްކާތެރި ވާން އެހީވެދެއެވެ.