ޗަންދިގަރުގައި ހުންނަ ބޮލީވުޑްގެ މަޝްހޫރު ލަވަކިޔުންތެރިޔާ ބާދްޝާގެ ބާ އަދި ރެސްޓޯރެންޓު ކައިރީގައި ދިން ބޮމުގެ ހަމަލާ ދީފައި ވަނީ ލޮރެންސް ބިޝްނޯއި ގޭންގުން ކަމަށް މީޑިއާތަކުން ރިޕޯޓު ކޮށްފިއެެވެ.

އީޓައިމްސް ގައިވާ ރިޕޯޓެއްގައި ބުނެފައިވަނީ އިއްޔެގެ ދަންވަރުގެ ވަގުތެއްގައި މި ދެ ތަނަށް ބޮމުގެ ހަމަލާ އެއް ދީފައިވަނީ ލޮރެންސް ބިޝްނޯއި ގޭންގަށް ނިސްބަތްވާ ދެ މީހުން ކަމަށެވެ. އަދި މި ދެ މީހުން ވަނީ މިކަން ކުރިކަމަށް ބުނެ ފޭސްބުކުގައި ޕޯސްޓެއް ހިއްސާ ކޮށްފައި ކަމަށްވެސް ރިޕޯޓުގައި ވެއެވެ.

އެގޮތުން މި ހަމަލާ ދީފައި ވާ ދެ މީހުންްނަކީ ލޮރެންސުގެ ގޭންގުގެ ގޯލްޑީ ބްރާރު އާއި ރޯހިތު ގޮޑާރާއެވެ. މި ދެ މީހުން މިކަން ކޮށްފައިވަނީ ސައިކަލެއްގައި ގޮސް އެ ދެ ތަނަށް ގޮވާ ޒާތުގެ އެއްޗެހި ތަކެއް އުކާލުމަށް ފަހުއެވެ. މި މީހުން މިކަމަށް އެއްބަސްވެ ކުރި ޕޯސްޓުގައި ބުނެފައިވަނީ އެމީހުން ބޮން ގޮއްވާފައިވަނީ ބިޝްނޯއީ އަށް ޑިމާންޑު ތަކެއް ކުރުމުން އެކަމަށް ސަމާލުކަމެއް ނުލިބުމުން ކަމަށެވެ.

ބޮމުގެ ހަމަލާ އެއް ދިން ކަމުގެ ރިޕޯޓު ލިބުމާއެކު ޗަންދިގަރު ފުލުހުން ވަނީ އެތަނަށް ގޮސް ހަރަކާތްތެރި ވެފަައެވެ. އަދި ފުލުހުން މިހާރު މިމައްސަލައިގެ ތަހުގީގު ފަށާފައިވާއިރު، މި ހަމަލާ ދިނުމަށް ބޭނުން ކޮށްފައިވާ ބޮމަކީ އަމިއްލައަށް ހަދާފައިވާ ބޮމެއް ކަމުގައި ބެލެވޭ ކަމަށް ޗަންދިގަރު ފުލުހުންނާ ހަވާލާދީ މީޑިއާތަކުން ވަނީ ރިޕޯޓު ކޮށްފައެވެ. މި ހަމަލާގެ ސަބަބުން މިތަންތަނުގައި އުޅުނު މީހުންނަށް އަދި މުދަލަށް ގެއްލުމެއް ލިބިފައި ނުވާ ކަމަށް ރިޕޯޓުތައް ބުނެއެވެ.