އަޅުގަނޑުމެން އާންމު ދިރިއުޅުމުގައި ކައި އުޅޭ އެއްޗެހީގެ ސަބަބުން އަޅުގަނޑުމެންގެ ހަންގަނޑަށް އަސަރުކޮށް، މުސްކުޅި ވުމުގެ އަލާމާތްތައް ފެންނަ ފަހަރު ވަރަށް ގިނައިން އާދެއެވެ. މުސްކުޅިވުމަކީ ގުދުރަތީ ކަމަކަށް ވީނަމަވެސް ބައެއް ފަހަރު އަޅުގަނޑުމެން ކުރާ ބައެއް ކަންކަމުގެ ސަބަބުން މިކަން އަވަސް ވެއެވެ. ތިރީގައި މި ހިމަނާލަނީ މުސްކުޅިވުމުގެ އަލާމާތްތައް ހަންގަނޑުން ފެންނަ ވަރު އަވަސް ކޮށްދޭ ބައެއް ބާވަތްތަކެވެ.

ހަކުރު

އަޅުގަނޑުމެންގެ ތެރޭގައި ގިނަ މީހުންނަކީ ހަކުރު ގިނަ އަދަދަކަށް ބޭނުން ކުރާ މީހުންނެވެ. ތަފާތު އެކި ކަހަލަ ފޮނި ކާތަކެތި ކައިއުޅޭ މީހުން އަޅުގަނޑުމެންގެ ތެރޭގައި މަދެއް ނޫނެވެ. ނަމަވެސް މާ ގިނައިން ފޮނިކާތަކެތި ކާނަމަ އޭގެ ސަބަބުން ހަކުރު ހަށިގަނޑުގައި ހުންނަ ޕްރޮޓީންސް އާއެކުވެ، ގްލައިކޭޝަން ނަމަކަށް ކިޔާ ޕްރޮސެސް އެއް މެދުވެރިވެއެވެ. އަދި މިކަމުގެ ސަބަބުން ހަންގަނޑުގައި ހުންނަ ކޮލަޖެން އާއި އިލާސްޓިކު ހަލާކުވެ، މީހާގެ ކިބައިގައި ހުންނަ ޒުވާން ސިފަތައް ގެއްލެން ފަށައެވެ.

ފެރެންޗް ފްރައިސް

މިއީވެސް ހަމަ ވަރަށް ގިނަ މީހުންނަށް ކަމުދާ އެއްޗެކެވެ. ނަމަވެސް މި ބޭނުން ކުރުމުންވެސް މީހާގެ ހަންގަނޑުން މުސްކުޅި ވުމުގެ އަލާމާތްތައް ފެންނަ ވަރު އަވަސް ވެއެވެ. މި ކެއުމުން ހަށިގަނޑުގައި ފްރީ ރެޑިކަލްތައް ގިނެވެ، އޭގެ ސަބަބުން ހަށިގަނޑުގެ ސެލްތައް ހަލާކުވެއެވެ. އަދި މިކަމުގެ ސަބަބުން މީހާގެ ހަންގަނޑުން މުސްކުޅި ވުމުގެ އަލާމާތްތައް ފެންނަ ވަރު އަވަސްވެއެވެ.

ކޮފީ

އަޅުގަނޑުމެންގެ ތެރޭގައި ކޮފީ ނުބޯ މީހެއް ވަރަށް މަދުން ނޫނީ ނުފެންނާނެއެވެ. ދުވާލެއްގެ މައްޗަށް 10 ކޮފީ ބޯ މީހުންވެސް ހަމަ މި ރާއްޖޭގައި އެބަ ތިއްބެވެ. ކޮފީގައި ހިމެނޭ ކެފެއިން އަކީ ހަންގަނޑުން މުސްކުޅި ވުމުގެ އަލާމާތްތައް ފެންނަ ވަރު އަވަސް ކޮށްދޭ އެއްޗެކެވެ. މާ ގިނައިން ކޮފީ ބޯނަމަ ހަންގަނޑު ޑީހައިޑްރޭޓުވެ، މީހާގެ ނިންޖަށް ބޮޑެތި ބަދަލުތަކެއް އާދެއެވެ. މީހާގެ ހަންގަނޑު މަރާމާތު ވުމަށް ނިންޖަކީ ވަރަށް މުހިންމު އެއްޗެކެވެ.