ޣައްޒާގެ އެކި ހިސާބުތަކުގައި ނިރުބަވެރި އިސްރާއިލުން ހުއްޓުމެއްނެތި ދެމުންދާ ހަމަލާތަކުގައި 42 މީހުން މަރާލާފައިވާ ކަމަށް ޣައްޒާގެ ޞިއްޙަތާބެހޭ މަސްދަރުތަކުން ރިޕޯޓްކޮށްފިއެވެ.

އެ މަސްދަރުތާ ހަވާލަދީ ބޭރުގެ މީޑިޔާތަކުން ރިޕޯޓްކޮށްފައިވާ ގޮތުގައި ފާއިތުވި 24 ގަޑިއިރު އެކަނިވެސް އިސްރާއީލުން ވަނީ ޣައްޒާގެ އުތުރާއި ދެކުނުގެ ސަރަހައްދުތަކަށް ހަމަލާތައް ދީފައެވެ.

އެމެރިކާގެ މަދަދާއެކު އިސްރާއީލުން ފަލަސްތީނަށް އަރައި ހަމަލާތައް ދެމުން އަންނަތާ މިއަދަށް 420 ދުވަސް ވެފައިވާއިރު މި ހަމަލާތަކުގައި ފަލަސްތީނުގެ އިގްތިސާދުގެ ބޮޑުބައި ފުނޑުފުނޑުވެ ޞިއްޙީ ނިޒާމު ވަނީ އެއްކޮށްގެން ހަލާކުވެފައެވެ. އަދި އެތައް ހާސް ބައެއްގެ ގެދޮރު ގެއްލިފައިވާއިރު ދެ މިލިއަނަށް ވުރެ ގިނަ މީހުން ކާނާ މަދުވުމާއި ރައްކާތެރި ބޯފެން ނުލިބި ތާށިވެފައި ތިބި ކަމަށް ރިޕޯޓްތައް ބުނެއެވެ.

ޣައްޒާގައި އިސްރާއީލުން ހިނގި ނަސްލު ނައްތާލުމުގައި އޮކްޓޯބަރު 7، 2023 އިން ފެށިގެން 44،330 މީހުން މަރުވެ 104،933 މީހުން ވަނީ ޒަޚަމްވެފައެވެ.