ފަލަސްތީނަށް އަރައި އިސްރާއީލުން ކުރަމުންދާ ހަނގުރާމައިގައި އިސްރާއީލުގެ 33 އަސީރުން މަރުވެފައިވާކަން ހަމާސް ޖަމާއަތުން ހާމަކޮށްފިއެވެ.

ހަމާސްއިން ނެރުނު ވީޑިއޯ މެސެޖެއްގައި ބުނީ އެ ޖަމާއަތުގެ ހައްޔަރުގައި ތިބި އިސްރާއީލުގެ އަސީރުންގެ ތެރެއިން 33 މީހަކު ހަނގުރާމައިގެ އެކި ދުވަސްވަރުގައި މަރުވެފައިވާ ކަމަށެވެ. އަދި އެމީހުން މަރުވީ އިސްރާއީލުގެ ހަމަލާތަކުގެ ސަބަބުން ކަމަށްވެސް ހަމާސް އިން ބުނެއެވެ.

ނިރުބަވެރި އިސްރާއީލުން ފަލަސްތީނަށް އަރައި ހަމަލާތައް ދެމުންގެންދާތާ 14 މަސް ދުވަސް ވެފައިވާއިރު މި ހަނގުރާމައިގައި ހަމާސްއިން ވަނީ ނިރުބަވެރިންގެ 200 އަށްވުރެ ގިނަ މީހުން ހަނގުރާމައިގެ އަސީރުންގެ ގޮތުގައި ހައްޔަރުކޮށްފައެވެ. މިއަދާ ހަމައަށްވެސް މި މީހުން ހޯދުމަށް އިސްރާއީލުން ކުރަމުން އަންނަ އެއްވެސް މަސައްކަތެއް ކާމިޔާބުވާ ގޮތް ވަނީ ނުވެފައެވެ.

ހަމާސް އިން އިއްޔެ ބުނީ މި އަސީރުންގެ ތެރެއިން 33 މީހަކު މަރުވެފައިވާ ކަމަށާއި އެމީހުން މަރުވި ތާރީހުތަކާއި އެމީހުންގެ މައުލޫމާތުވެސް އެ ޖަމާއަތުން ވަނީ އާންމުކޮށްފައެވެ.

ފަލަސްތީނުގެ ދިފާއުގައި ހަރަކާތްތެރިވާ ހަމާސްއިން ބުނީ އަސީރުން މަރުވީ އިސްރާއީލުގެ ބޮޑުވަޒީރު ބެންޖަމިން ނަތަންޔާހޫގެ ހަރުކަށިކަމާއި އަނިޔާވެރިކަމުގެ ސަބަބުން ކަމަށެވެ.

އިސްރާއީލުގެ އަސީރުން މިނިވަންކުރުމަށް އެކި ފަހަރުމަތިން އެ ގައުމުން މަސައްކަތް ކުރި ނަމަވެސް އެކަން ވާގޮތް ނުވެއެވެ. އަދި ހަމާސް އިން ބުނަމުންދަނީ އަސީރުން މިނިވަންކުރާނެ ހަމައެކަނި ގޮތަކީ މިހާރު ކުރިޔަށްދާ ހަނގުރާމަ ހުއްޓާލުން ކަމަށެވެ. ނަމަވެސް މިއީ އިސްރާއީލުން ތާއީދުކުރާ ކަމެއް ކަމަށް ގަބޫލު ނުކުރެވޭއިރު އިސްރާއީލުން ބުނަމުން ދަނީ ހަނގުރާމަ ހުއްޓާލާނީ ހަމާސް އެއްކޮށް ނައްތާލުމުން ކަމަށެވެ.