ނިރުބަވެރި އިސްރާއީލް ސިފައިން ޣައްޒާގެ ރެފިއުޖީ ކޭމްޕަށް ހަމަލާދީ އެތަނުގައި ބޯހިޔާވަހިކަން ހޯދަމުން ދިޔަ ކުޑަކުދިންނާއި އަންހެނުން ހިމެނޭގޮތަށް ގިނަ ބަޔަކު މަރާލައިފިއެވެ.

ޣައްޒާގެ މެދުތެރޭގެ ނުޞައިރާތު ރެފިއުޖީ ކޭމްޕަށް އިސްރާއީލުން ދިން ހަމަލާތަކުގައި ހަ ކުޑަކުދިންނާއި ފަސް އަންހެނުން ހިމެނޭ ގޮތަށް 20 އަށް ވުރެ ގިނަ މީހުން މަރުވެފައިވާ ކަމަށް ބޭރުގެ މީޑިޔާއެއް ކަމަށްވާ ވަފާ ނޫސް އެޖެންސީން ވަނީ ބުނެފަ އެވެ. މި ހަމަލާގައި ޒަހަމްވި މީހުންގެ އަދަދެއް އަދި އެއްވެސް ފަރާތަކުން ހާމަނުކުރެއެވެ.

ޣައްޒާގެ ސިވިލް ޑިފެންސް އެޖެންސީއާއި ހަވާލަދީ ބޭރުގެ މީޑިޔާތަކުން ބުނީ ޣައްޒާގެ އިންޑޮނޭޝިއާ ހޮސްޕިޓަލަށްވެސް އިސްރާއީލުން ވަނީ ހަމަލާތަކެއް ދީފައެވެ. އެގޮތުން ހޮސްޕިޓަލް ކައިރިޔަށް ދިން މި ވައިގެ ހަމަލާތަކުގައި މަދުވެގެން 29 މީހުން މަރުވެފައިވާ ކަމަށް ރިޕޯޓު ކުރެއެވެ.

ޣައްޒާގައި ހުންނަ އަލްޖަޒީރާގެ މުވައްޒަފަކު ރިޕޯޓްކުރާ ގޮތުގައި އިސްރާއީލުން ދަނީ ކަމާލް އަދުވާން ހޮސްޕިޓަލް ވަށައިގެންވެސް ހަރަކާތްތެރިވަމުންނެވެ. އެގޮތުން އިސްރާއީލުގެ ޓޭންކްތަކާއި ޑްރޯންތަކުން ހޮސްޕިޓަލް ހުރި ސަރަހައްދުގައި ހަރަކާތްތެރިވާއިރު މީގެ ކުރިންވެސް އެކި ފަހަރުމަތިން މި ހޮސްޕިޓަލަށް އިސްރާއީލުން ވަނީ ހަމަލާދީފައެވެ.

އިސްރާއީލުން ޣައްޒާއާ ދެކޮޅަށް ކުރަމުންދާ ހަނގުރާމައިގައި އޮކްޓޯބަރު 7، 2023 އިން ފެށިގެން މިހާތަނަށް 44،612 ފަލަސްތީނު މީހުން މަރުވެ 105،834 މީހުން ވަނީ ޒަޚަމްވެފައެވެ.