ހުސްވެފައިވާ އެންޓި ކޮރަޕްޝަން ކޮމިޝަން (އޭސީސީ)ގެ މެމްބަރުކަމަށް ކުރިމަތިލުމަށް ހުޅުވާލައިފި އެވެ.

އެންޓި ކޮރަޕްޝަން ކޮމިޝަންގެ ދެ މެމްބަރެއްގެ މަގާމު ހުސްވީ ކުރިން އެ ކޮމިޝަންގެ ނާއިބު ރައީސްގެ މަގާމުގައި ހުންނެވި އަބްދުއްސަލާމާއި ހަމަ އެ ކޮމިޝަންގެ މެންބަރުގެ މަގާމުގައި ހުންނެވި ތޯހާ މުހައްމަދު މަގާމުން އިސްތިއުފާ ދެއްވުމުން ނެވެ.

ސަލާމާއި ތޯހާ އިސްތިއުފާ ދެއްވީ ދެ ބޭފުޅުން ވަކިކުރަން ރައްޔިތުންގެ މަޖިލީހުގެ މިނިވަން މުވައްސަސާތަކުގެ ކޮމިޓީން ނިންމާފައިވަނިކޮށް މިދިޔަ މަހުގެ ފަހުކޮޅު އެވެ.

އެހެންވެ ރައީސް އޮފީހުން ވަނީ އެ ދެ މަގާމަށް ކުރިމަތިލުމަށް މިއަދު ހުޅުވާލައިފަ އެވެ.

އެ ދެ މަގާމަށް ކުރިމަތިލުމުގެ ފުރުސަތު ހުޅުވާލައިފައިވަނީ މިއަދުން ފެށިގެން މި މަހުގެ 16 ވަނަ ދުވަހާ ހަމައަށެވެ.

އެ ދެ މަގާމަށް ކުރިމަތިލމުގެ ޝަރުުތުތަކުގެ ތެރޭގައި އުމުރުން 25 އަހަރު ފުރިފައިވާ ދިވެހި ރައްޔިތުކަން އޮންނަ މުސްލިމަކު ކަމުގައިވުމާއި އިސްލާމްދީނުގައި ހައްދެއް ކަނޑައެޅިފައިވާ ކުށެއް ކުރިކަން ވޭތުވެދިޔަ ފަސް އަހަރުދުވަހުގެ ތެރޭގައި ޝަރީޢަތަށް ސާބިތުވެފައިވާ މީހަކު ކަމުގައި ނުވުން ހިމެނެ އެވެ. އަދި ރާއްޖޭގެ ޖުމްހޫރިއްޔާގެ ޤާނޫނުއަސާސީގެ ދަށުން ނުވަތަ ގާނޫނެއްގެ ދަށުން އިންތިހާބު ކުރެވޭ ނުވަތަ އައްޔަންކުރެވޭ ސިޔާސީ މަގާމެއް ފުރަމުންދާ މީހަކު ކަމުގައި ނުވުން ވެސް ޝަރުތުތަކުގެ ތެރޭގައި ހިމެނެ އެވެ.