ދިރިއުޅުމުގައި ތަފާތު އެކި ކަހަލަ މީހުންނާ ދިމާވާނެއެވެ. އަދި އެކިކަހަލަ އެކި މިޒާޖުގެ މީހުންނާ ގުޅުން ބަދަހިވެ ރަހްމަތްތެރިވެސް ވެވޭނެއެވެ. ނަމަވެސް އެ އެންމެންނަކީ ތިބާއަށް ރަނގަޅު ބަޔަކަށް ނުވެދާނެއެވެ. ބާއްޖަވެރި ދިރިއުޅުމެއް ބޭނުންވާނަމަ އެފަދަ މީހުންނާ ވީހާވެސް ދުރުން އުޅުމަކީ ވަރަށް މުހިންމު ކަމެކެވެ.

ބައެއް މީހުންނަކީ ތިބާގެ ކިބައިގައި ހުންނަ އުނި ސިފަތައް އަބަދު ފާހަގަ ކުރާ މީހުންނެވެ. މިފަދަ މީހުންގެ ވާހަކަތައް ހުންނާނީ ތިބާ ދެރަކޮށްލަން ދައްކާ ވާހަކަތަކެއް ފަދައިންނެވެ. އަދި އޭގެ ސަބަބުން ތިބާގެ އަމިއްލަ ނަފްސަށް އޮންނަ އިތުބާރު ގެއްލި އަމިއްލަ ނަފްސުމަތިން ފޫހިވާ ފަހަރުވެސް އާދެއެވެ. އެހެންކަމުން ތިބާގެ ހަޔާތުގައި މިފަދަ މީހުން އުޅޭނަމަ ވީހާވެސް އަވަހަކަށް އެފަދަ މީހުންނާ ދުރުވެލަން ޖެހެއެވެ.

ބައެއް މީހުންނަކީ އަނެކުންގެ ވާހަކަތައް ދައްކާ ނުވަތަ "ގޮސިޕު" ކުރުމުގައި ހައްދު ފަހަނަ އަޅާފައިވާ މީހުންނެވެ. މިފަދަ މީހުންނަކީ ތިބާގެ ހަޔާތުގެ ވާހަކަތައްވެސް ތިބާ ނުހުއްނަ ތަންތަނުގައި އެހެން މީހުންނާ ހިއްސާ ކުރާ މީހުންނެވެ. އެހެންކަމުން މިފަދަ މީހުންނަށް އިތުބާރުކޮށް، ގާތްކޮށްގެން އުޅުމަކީ އެހާ ރަނގަޅު ކަމެއް ނޫނެވެ.

ތިބާއާއެކު އަޑިނުބައި ރައްޓެހިން އުޅޭނަމަ އެފަދަ މީހުންނާވެސް ދުރުވެލުމަކީ ވަރަށް މުހިންމު ކަމެކެވެ. މިފަދަ މީހުންނަކީ ތިބާއާ އެކު ގާތް ރަހްމަތްތެރި ކަމެއް އޮތް ނަމަވެސް، ތިބާއަށް ހެޔޮ އެދޭނެ ބައެއް ނޫނެވެ. އަދި ތިބާއަށް ލިބޭ ކާމިޔާބީތަކުގެ ސަބަބުން މިފަދަ މީހުން ހަސަދަވެރިވެސް ވާނެއެވެ.

ދުނިޔެމަތީގައި އުޅޭއިރު އިހުތިޔާރު ކުރަން ޖެހޭނީ ތިބާއަށް ހެޔޮލަފާ އަދި ހެޔޮ މަގު ދައްކާ ރައްޓެހިންނެވެ. އެނޫން ބަޔަކާ ގުޅުން ބަދަހި ކުރުމަކީ ތިބާގެ ހަޔާތް ކަނު އަނދިރިގަނޑެއްގެ ތެރެއަށް ވައްޓާލުން ފަދަ ކަމެކެވެ.

މަސްދަރު: އީޓައިމްސް