ޣައްޒާގައި ހާލުގައިޖެހިފައިވާ ފަރާތްތަކަށް ކާބޯތަކެތި ބަހަމުންދިޔަ ހަތަރު ސަރަހައްދަކަށް ނިރުބަވެރި އިސްރާއީލުން ހަމަލާދީ ގިނަ ބަޔަކު މަރާލައިފިއެވެ.

ނިރުބަވެރި އިސްރާއީލުން ފާއިތުވި 24 ގަޑިއިރު އެކަނިވެސް ޣައްޒާގައި ދިން ހަމަލާތަކުގައި 50 މީހުން މަރުވި ކަމަށް އެގައުމުގެ ސިއްހީ ވުޒާރާއިން މައުލޫމާތު ދެއެވެ. އަދި މި ހަމަލާތަކުގައި 84 މީހުން ޒަހަމްވި ކަމަށް މައުލޫމާތު ލިބެއެވެ.

އޮފިޝަލުން މައުލޫމާތުދޭ ގޮތުގައި އިސްރާއީލުގެ ހަމަލާތައް މިހާރު ބޮޑަށް އަމާޒު ވަނީ ޣައްޒާގައި އެންމެ ގިނައިން މީހުން އެއްވެ އުޅޭ ތަންތަނަށެވެ. އޭގެ ތެރޭގައި ހާލުގައި ޖެހިފައިވާ ފަރާތްތަކުން ބޯހިޔާވަހިކަން ހޯދުމުންދާ ސްކޫލްތަކާއި އެހީދޭ ޖަމިއްޔާތަކުން ފޯރުކޮށްދީފައިވާ ޓެންޓުތައް ހިމެނެއެވެ. އަދި ހޮސްޕިޓަލްތަކާއި ސިއްހީ ހިދުމަތް ފޯރުކޮށްދޭ ތަންތަނަށްވެސް އިސްރާއީލުން ދަނީ ވަރުގަދަ ހަމަލާތައް ދެމުންނެވެ.

ހާލުގައި ޖެހިފައިވާ ފަރާތްތަކަށް އިތުރަށް ދަތިކުރުމަށް ޔަހޫދީ ސިފައިން ދަނީ އެހީދޭ ފަރާތްތަކަށްވެސް އެކި ގޮތްގޮތަށް ހުރަސް އަޅަމުންނެވެ. އެގޮތުން އެފަރާތްތައް ލޫޓުވުމާއި ހަމަލާތައް ދިނުމާއި ބިރުދައްކަމުން ދާކަމަށްވެސް ރިޕޯޓްތައް ލިބެއެވެ.

ހަނގުރާމައިގެ ސަބަބަން ވީރާނަވެފައިވާ ފަލަސްތީނުގައި މަރުވި މީހުންގެ އަދަދު މިހާރު 44،758 އަށް އަރާފައިވާ ކަމަށް އެގައުމުގެ ސިއްހީ އިދާރާއިން ބުނެއެވެ.