ޣައްޒާގައި ‘ވަގުތުން’ ހަނގުރާމަ ހުއްޓާލުމަށް އދ.ގެ އާންމު މަޖިލީހުން ފާސްކޮށް، ފަލަސްތީނުގެ ރެފިއުޖީންނާ ބެހޭ އިދާރާ (ޔޫއެންއާރުޑަބްލިއުއޭ) ގެ މަސައްކަތްތަކަށް ތާއީދުކުރާކަން ފާޅުކޮށްފި އެވެ.

ޝަރުތުތަކާ ނުލައި ޣައްޒާގައި ވަގުތުން އަދި ދާއިމީކޮށް ހަނގުރާމަ ހުއްޓާލުމަށް ގޮވާލާ އދ. ގެ އާންމު މަޖިލީހުން ބުދަ ދުވަހު ފާސްކުރި ގަރާރުގައި 193 މެންބަރުން ބައިވެރިވިއެވެ. މި ގަރާރާ އެއްކޮޅަށް 158 ވޯޓު ދިން އިރު ގަރާރާ ދެކޮޅަށް ނުވަ ވޯޓު އަދި 13 މެމްބަރުން ވަނީ ހަނގުރާމަ ދިގުދައްމަން ވޯޓު ދެއްވާފައެވެ.

އެ ގަރާރުގައި އިސްރާއީލުން ޔޫއެންއާރުޑަބްލިއުއޭގެ މެންޑޭޓަށް އިހުތިރާމް ކުރުމަށްވެސް ވަނީ ޑިމާންޑްކޮށްފައެވެ. އަދި އިސްރާއީލުގެ ސަރުކާރަށް ވަނީ ބައިނަލްއަގްވާމީ ގާނޫނުތަކަށް ތަބާވެ، ޔޫއެންއާރުޑަބްލިއުއޭގެ އިމްތިޔާޒުތަކަށް އިހުތިރާމުކުރުމަށާއި ފުރިހަމަ، ހަލުވި، ރައްކާތެރި އަދި އެއްވެސް ހުރަހެއް ނެތި އިންސާނީ އެހީތެރިކަން ފޯރުކޮށްދިނުމުގެ ޒިންމާ އަދާކުރުމަށް ހުރަސް ނޭޅުމަށް ވަނީ ގޮވާލާފައެވެ.

މި މަޖިލީހުގައި އދ. އިން ވަނީ ފަލަސްތީނުގެ ސަރަހައްދަށް އަރައި އިސްރާއީލުން 14 މަސް ދުވަސްވަންދެން ކުރަމުން އައި ހަނގުރާމަ ހުއްޓާލުމަށް ގޮވާލާފަ އެވެ. އަދި ހަނގުރާމައިގައި އިސްރާއީލުގެ ލާއިންސާނީ ހަމަލާތަކުގައި މަރުވި ގިނަ މީހުންނަކީ އަންހެނުންނާއި ކުޑަކުދިން ކަމަށް މަޖިލީހުގައި ވަނީ ހާމަކޮށްފައެވެ.

2023 ވަނަ އަހަރުގެ އޮކްޓޯބަރު މަހުގެ ހަތް ވަނަ ދުވަހުން ފެށިގެން އިސްރާއީލުން ޣައްޒާގެ ސަރަހައްދުގައި ކުރިއަށްދާ ހަނގުރާމައިގައި 44،805 ފަލަސްތީނު މީހުން މަރުވެ 106،257 މީހުން ވަނީ ޒަޚަމްވެފައެވެ.