އެމެރިކާގެ އެހީތެރިކަމާއެކު ނިރުބަވެރި އިސްރާއީލުން ފަލަސްތީނުގައި ހިންގަމުންދާ ލާއިންސާނީ ޖަރީމާތަކުގައި މިހާތަނަށް 902 އާއިލާއެއްގެ ހުރިހާ މެމްބަރުން މަރުވެފައިވާ ކަމަށް ޣައްޒާގައި ހުންނަ ސަރުކާރުގެ މީޑިއާ އޮފީހުން ބުނެފި އެވެ.

އިސްރާއީލަށް ހަމަލާތައް ދޭން ފެށިތާ އަހަރަކަށްވުރެ ގިނަ ދުވަސް ވެފައިވާއިރު ޣައްޒާގެ އިގްތިސޯދުގެ ބޮޑުބައި އެއްކޮށް ހަލާކުވެ އެތައް ހާސް އާއިލާއެއް މަގުމަތިވެ އެތައް ހާސް ބައެއްގެ ދިރިއުޅުމަށް ވަނީ ގެއްލުން ލިބިފައެވެ.

އިއްޔެވެސް އިސްރާއީލުން ވަނީ ފަލަސްތީނުގެ މެދުތެރޭގެ ނުސެއިރާތު ރެފިއުޖީ ކޭމްޕަށް ވަރުގަދަ ހަމަލާތަކެއް ދީފައެވެ. މި ހަމަލާތަކުގައި މިހާތަނަށް 33 މީހުން މަރުވެފައިވާ ކަމަށް ފަލަސްތީނުގެ ކަމާބެހޭ ފަރާތްތަކުން ބުނެ އެވެ.

ފަހަކަށް އައިސް އިސްރާއީލުން ދަނީ އާއިލާތައް ދިރިއުޅޭ ތަންތަނަށް ސީދާ ހަމަލާތައް އަމާޒުކުރަމުންކަން ފާހަގަ ކުރެވެއެވެ. އެގޮތުން ފަލަސްތީނުގެ ނަސްލު ނައްތާލުމުގެ މަކަރުވެރި ނިޔަތުގައި އިސްރާއީލުން ދޭ ހަމަލާތައް މިހާރު އާންމު ވަނީ އާންމުންނާއި ކުޑަކުދިންނާއި އަންހެނުންނާއި ގެދޮރު ގެއްލިފައިވާ މީހުން ދިރިއުޅޭ ތަންތަނަށެވެ.

ހަނގުރާމައިގެ ސަބަބުން ގެދޮރު ގެއްލިފައިވާ އާއިލާތަކުން ހިޔާވަހިކަން ހޯދާ ފެސިލިޓީތަކާއި އިމާރާތްތަކަށް އިސްރާއީލުގެ ސިފައިން ހަމަލާދެމުންދާއިރު، ގިނަ ފަހަރަށް ބުނަނީ އެއީ ފަލަސްތީނުގެ ހަތިޔާރު އެޅި ޖަމާއަތް ހަމާސްގެ އޮޕަރޭޝަން ސެންޓަރުތަކެއްގެ ގޮތުގައި ބޭނުންކުރާ ތަންތަން ކަމަށެވެ. ނަމަވެސް ހަމަލާއަށްފަހު އެފަދަ ތަންތަން ހޯދައި ބެލުމުން ފެންނަނީ މަރުވެފައިވާ ކުޑަކުދިންނާއި އަންހެނުންނެވެ.

2023 ވަނަ އަހަރުގެ އޮކްޓޯބަރު މަހު ހަނގުރާމަ ފެށުނު ފަހުން އިސްރާއީލުގެ ސިފައިން ވަނީ ފަލަސްތީނުގެ 44،800 އަށް ވުރެ ގިނަ މީހުން މަރާލާފައެވެ. އޭގެ ތެރެއިން ދެބައިކުޅަ އެއްބައި މީހުންނަކީ އަންހެނުންނާއި ކުޑަކުދިންނެވެ.