ސީރިޔާގައި ބިމުން އިސްރާއީލުން ހިފާފައިވާ ގޯލާން ހައިޓްސްގައި އަނެއްކާވެސް ނިރުބަވެރި އިސްރާއީލުގެ ރައްޔިތުން ވަޒަންވެރިވާން ނިންމައިފިއެވެ.

މިކަން އިއުލާން ކުރީ އިސްރާއީލުގެ ބޮޑުވަޒީރު ނިރުބަވެރި ބިންޔާމިން ނެތަންޔާހޫގެ އޮފީހުންނެވެ. އެގޮތުން އޭނާގެ އޮފީހުން ގޯލާން ހައިޓްސްގައި ވަޒަންވެރިވާ މީހުންގެ އާބާދީ ދެގުނައަށް އިތުރުކުރުމަށް ރާވާފައިވާ ޕްލޭން ފާސްކޮށްފައިވާކަން ހާމަކޮށްފައިވެއެވެ.

އިސްރާއީލުގެ ކަމާބެހޭ ފަރާތްތަކުން ވަނީ ބައްޝާރުލް އަސަދު ވެރިކަމުން ދުރުކުރުމާ ގުޅިގެން ސީރިޔާއަށް އަރައި އެގައުމުގެ އިތުރު ސަރަހައްދުތަކުގެ ބިން ހިފުމަށް މަސައްކަތްކޮށްފައެވެ. ނަމަވެސް އެމީހުންނަށް އެކަން ކާމިޔާބު ނުވުމުން ކުރިންވެސް ގަވާއިދާ ޚިލާފައި ހިސާރުކޮށްގެން އުޅޭ ގޯލާންގައި އިސްރާއީލުގެ އާބާދީ ދެގުނައަށް އިތުރު ކުރަން ރާވާފައިވާކަން މިހާރު ވަނީ އިއުލާންކޮށްފައެވެ.

1973 ވަނަ އަހަރު އިސްރާއީލާއި ސީރިޔާއާ ދެމެދު ކުރެވުނު ހަނގުރާމައަށް ފަހު ވެވުނު އެއްބަސްވުމެއްގެ ދަށުން ހިފާފައިވާ މި ސަރަހައްދުން ސީރިއާގެ ވެރިރަށް ދިމިޝްގު ފެންނައިރު މިތަނުގައި މަޝްހޫރު ޖަބަލުއްޝައިޚް ފަރުބަދަ ވެސް ހިމެނެއެވެ.

ނަތަންޔާހޫ ނެރުނު ބަޔާނެއްގައި އޭނާ ބުނީ ހިފާފައިވާ މި ސަރަހައްދުގައި ވަޒަންވެރިވާ މީހުންގެ އާބާދީ އިތުރު ކުރުމަށް 40 މިލިއަން ޝެކެލް (11 މިލިއަން ޑޮލަރު) އަށް ވުރެ ގިނަ ފައިސާގެ ޕްލޭނަށް ފާސްކުރާނެ ކަމަށެވެ.

ގޯލާން ސަރަހައްދުގައި ގަވާއިދާ ހިލާފަށް ދިރިއުޅޭ ގާތްގަނޑަކަށް 31،000 އިސްރާއީލުގެ ވަޒަންވެރިން އެބަތިއްބެވެ. އެމީހުން ދިރިއުޅެނީ މައިނޯރިޓީ ގްރޫޕްތަކާ އެކު ކަމަށް ރިޕޯޓްތައް ބުނެއެވެ.