ނިރުބަވެރި އިސްރާއީލުގެ ހަމަލާތައް އަނެއްކާވެސް ޣައްޒާގެ ކަމާލް އަދުވާން ހޮސްޕިޓަލަށް އަމާޒުވެއްޖެއެވެ.

އިސްރާއީލުގެ ސިފައިން ޣައްޒާއަށް އަރައި ދެމުންދާ ހަމަލާތަކުގެ ތެރެއިން އެ ސިޓީގެ އުތުރުގައި ހުންނަ ކަމާލް އަދުވާން ހޮސްޕިޓަލަށް ދިން ހަމަލާގައި އެ ހޮސްޕިޓަލަށް ވަނީ ބޮޑެތި ގެއްލުންތަކެއް ވެފައެވެ. މި ހަމަލާގައި ޝަހީދުވި މީހުން އަދި ޒަހަމްވި މީހުންގެ ތަފްސީލެއް އަދި އެއްވެސް ފަރާތަކުން ހާމަކޮށްފައި ނުވެއެވެ.

ކަމާލް އަދުވާން ހޮސްޕިޓަލުގެ އިތުރަށް ބެއިތު ލަހިޔާގައިވެސް އިސްރާއީލުން ހިންގި ޖަރީމާއެއްގައި ދެ މީހުން ވަނީ މަރުވެފައެވެ. އަދި ޝާތީ ރެފިއުޖީ ކޭމްޕަށް ދިން ހަމަލާގައި ހަތަރު މީހަކު މަރުވެފައިވާއިރު ޣައްޒާ ސިޓީގެ އިތުރު ތަންތަނަށް ދިން ހަމަލާތަކުގައި ފަސް މީހަކު ޝަހީދުކޮށްލާފައިވާ ކަމަވެސް ރިޕޯޓްތައް ބުނެ އެވެ.

މީގެ ކުޑަ ދުވަސްކޮޅެެއް ކުރިން އިސްރާއީލު ސިފައިން ވަނީ ޔޫއެންއާރުޑަބްލިއުއޭ އިން ހިންގާ ޚާން ޔޫނިސް ސްކޫލަކަށް ހަމަލާދީ 23 މީހަކު ޝަހީދުކޮށްލާފައެވެ. އަދި އޭގެ ފަހުން ބައިތު ހަނޫން ނަމަކަށް ކިޔާ އެހެން ސްކޫލަކަށް ދިން ވަރުގަދަ ހަމަލާއެއްގައި ފަލަސްތީނުގެ 43 މީހަކު ޝަހީދުވެފައިވާ ކަމަށްވެސް ރިޕޯޓްތައް ލިބެ އެވެ.

އިސްރާއީލުން ޣައްޒާއާ ދެކޮޅަށް ކުރަމުންދާ ހަނގުރާމައިގައި އޮކްޓޯބަރު 7، 2023 އިން ފެށިގެން މިހާތަނަށް 45،028 ފަލަސްތީނު މީހުން ޝަހީދުވެ 106،962 މީހުން ވަނީ ޒަހަމްވެފައެވެ. އެ ދުވަހު ހަމާސް އިސްވެ އޮވެ ދިން ހަމަލާތަކުގައި އިސްރާއީލުގެ 1،139 މީހުން މަރުވެ، 200 އަށް ވުރެ ގިނަ މީހުން އަޅުވެތިކޮށްފައިވެ އެވެ.