އަޅުގަނޑުމެންގެ ހިތަކީ އަޅުގަނޑުމެންގެ ހަށިގަނޑުގައި އެންމެ ބުރަކޮށް މަސައްކަތް ކުރާ އެއް ގުނަވަނެވެ. މުޅި ހަށިގަނޑަށް ބޭނުންވާ ވަރަށް ލޭ ފޯރުކޮށްދިނުމަށް މަސައްކަތްކުރާ މި ގުނަވަނުގެ ސިއްހަތު ރަނގަޅުކުރަން ކޮންމެ މީހަކުވެސް މަސައްކަތްކުރަން ޖެހެއެވެ. މިފަހަރު މި ހިމަނާލަނީ ހިތުގެ ސިއްހަތު ރަނގަޅުކުރުމަށް ކާންވީ ބައެއް ސުޕަފުޑްތަކެވެ.

އެވޮކާޑޯ

އެވޮކާޑޯ އަކީ އޭގައި ގިނަ އަދަދަކަށް މޮނޮސެޗުރޭޓެޑް ފެޓާއި، ޕޮޓޭސިއަމް އެކުލެވޭ އެއްޗެކެވެ. މި މާއްދާތަކަކީ ހަށިގަނޑުގައި ކޮލެސްޓްރޮލް ލެވެލްތައް ދަށްކޮށްދިނުމުގައި އެހީވެދޭ އެއްޗެކެވެ. ކޮލެސްޓްރޯލް ގިނަވާނަމަ ހިތުގެ ސިއްހަތަށް އަސަރުކޮށް ހިތުގެ ބަލިތައްޖެހުމުގެ ފުރުސަތު ބޮޑުވެއެވެ. ވީމާ ހިތުގެ ސިއްހަތު ރަނގަޅުކުރަން ބޭނުންވާނަމަ މިއީ ކެއުމުގައި ހިމަނަންޖެހޭ އެއްޗެކެވެ.

ބީންސް

ބީންސް އަކީ އޭގައި ގިނަ އަދަދަކަށް ރެސިސްޓެންޓް ސްޓާޗް އެކުލެވޭ އެއްޗެކެވެ. މި މާއްދާއަކީ ގޮހޮރުގެ މައްސަލަތަކުން މީހާ ދުރުކޮށްދޭ އަދި ހަށިގަނޑުގައި ކޮލެސްޓްރޯލް ހުންނަވަރު ދަށްކޮށްދޭ އެއްޗެކެވެ. އެހެންކަމުން ހިތުގެ ބަލިތަކާ ދުރުވެ ހިތުގެ ސިއްހަތު ރަނގަޅުކުރަން ބޭނުންވާނަމަ ކެއުމުގައި ބީންސް ހިމަނަންޖެހެއެވެ.

ޓޮމާޓޯ

ޓޮމާޓޯ އަކީ އޭގައި ގިނަ އަދަދަކަށް ލައިކޮޮޕީން ހިމެނޭ އެއްޗެކެވެ. ލައިކޮޕީން އަކީ ފްރީ ރެޑިކަލްތަކާ ދެކޮޅަށް މަސައްކަތްކުރާ އެންޓި އޮކްސިޑެންޓެއް ކަމުން ޓޮމާޓޯ ބޭނުން ކުރާނަމަ ހިތް އޮކްސިޑޭޓިވް ސްޓްރެސްއާ ދުރުކޮށްދެއެވެ. އަދި އޭގެ ސަބަބުން އޮކްސިޑޭޓިވް ސްޓްރެސްގެ ސަބަބުން ހިތަށް ލިބޭ ގެއްލުންތަކުން މީހާ ދުރުވެ، ހިތުގެ ސިއްހަތު ރަނގަޅުވެއެވެ.

މަސްދަރު: ލައިވްމިންޓު