ޓެސްޓުތަކަށް ތައްޔާތު ވުމަކީ ތައުލީމު ހާސިލް ކުރަމުންދާ ބައެއް ކުދިން ވަރަށް ބޮޑަށް ސްޓްރެސްވާ ކަމެކެވެ. އަދި އެކަމުގެ ސަބަބުން ބައެއް ކުދިންގެ ނަފްސާނީ ސިއްހަތަށްވެސް ބޮޑެތި އަސަރުތަކެއް ކުރެއެވެ. ނަމަވެސް ޓެސްޓަށް ރައްޔާރުވާއިރު މިކަންކަމަށް ސަމާލުވުމުން ސްޓްރެސްއާ ދުރުވެ، ޓެސްޓުން ފަސޭހަކަމާއެކު ފާސްވެވޭނެއެވެ.

އެގޮތުން ބަލާއިރު ޓެސްޓަށް ތައްޔާރު ވާއިރު އެންމެ ފުރަތަމަ ކުރަން ޖެހޭ ކަމަކީ ފިލާވަޅުތައް ދަސްކުރަން ވަކި ޝެޑިއުލެއް ކަނޑައެޅުމެވެ. މިހެން ހެދުމުން ވަކިވަކި ފިލާވަޅުތައް ދަސްކުރުމަށް އޮންނަ ވަގުތު އިތުރުވެ، ހާސްނުވެ ހުރިހާ އެއްޗެއްވެސް ވަގުތު އޮއްވާ ދަސް ކުރެވެއެވެ. އަދި އޭގެ ސަބަބުން މީހާ ބާންއުޓުވުމާ ވެސް ދުރުވެއެވެ.

އަދި ފިލާވަޅު ދަސްކުރުމުގެ އުކުޅުތައް ހޯދައި ބަލާ، އެކުއްޖަކަށް ފަސޭހަ ގޮތެއް ހިޔާރު ކުރުމުންވެސް ފަސޭހަކަމާއެކު ޓެސްޓަށް ތައްޔާރު ވެވޭނެއެވެ. އެގޮތުން ބޭނުން ކުރެވިދާނެ ބައެއް އުކުޅުތަކުގެ ތެރޭގައި ޓޮޕިކުތަކުގެ ސަމަރީތައް ބޭނުން ކުރުމާއި، ފްލެޝްކާޑު ބޭނުން ކޮށްގެން ދަސްކުރުން ހިމެނެއެވެ. މިހެން ހެދުމުން ފޫހިކަމެއް ނެތި ފަސޭހަކަމާއެކު ފިލާވަޅުތައް މުރާޖާ ކުރެވޭނެއެވެ. އަދި އޭގެ ސަބަބުން ސްޓްރެސް އާވެސް ދުރުވެއެވެ.

އަދި ހަމަ އެހެންމެ އަމިއްލަ ނަފްސަށް އިތުބާރުޖޮށް "ޕޮޒިޓިވް މައިންޑްސެޓެއް" ގެންގުޅުމަކީވެސް ޓެސްޓަށް ތައްޔާރު ވާއިރު ކޮންމެހެން ކުރަން ޖެހޭ ކަމެކެވެ. މިހެން ހެދުމުން ފިލާވަޅުތައް މުރާޖާ ކުރާއިރު ސްޓްރެސް ވާވަރު ދައްވެ، ފިލާވަޅުތަކަށް ސަމާލުކަން ދެވޭ ވަރު އިތުރުވެއެވެ.

މަތީގައި ހިމަނާފައިވާ ކަންކަމަކީ ޓެސްޓަށް ތައްޔާރުވާއިރު ކޮންމެ ދަރިވަރަކުވެސް ސަމާލުވާން ޖެހޭ ކަންކަމެވެ. މިކަންތައް ކުރުމުން ޓެސްޓު ދުވަސްވަރު ސްޓްރެސް އާ ދުރުވެ ކަންކަމަށް ސަމާލުކަން ދެވޭ ވަރު ބޮޑުވެއެވެ. އަދި މިހެން ހެދުމުން ރަނގަޅު ނަތީޖާއަކާ ހަމައަކަށް ފަސޭހަކަމާއެކު ވާސިލް ވުމަށް އެހީވެދޭނެއެވެ.