"އިންފްލެމޭޝަން" ނުވަތަ ދުޅަވުމަކީ ހަށިގަނޑުގެ ގުނަވަނަކަށް ލިބޭ ގެއްލުމެއްގެ ސަބަބުން ދިމާވާ ކަމަކަށްވީއިރު "ކްރޮނިކު އިންފްލެމޭޝަން" ތަހައްމަލު ކުރަމުންދާ މީހުން އަޅުގަނޑުމެންގެ ތެރޭގައި މަދެއް ނޫނެވެ. އަދި ބައެއް ކަހަލަ ކާއެއްްޗެހި ބޭނުން ކުރުމުންވެސް މިކަން ދިމާވުމަށް މެދުވެރިވެއެވެ.

އެގޮތުން ބަލާއިރު މާ ގިނައިން ފޮނި އެއްޗެހި ބޭނުން ކުރާނަމަ ކްރޮނިކު އޮންފްލެމޭޝަންގެ ފުރުސަތު ބޮޑުވެއެވެ. ގިނަ އަދަދަކަށް ހަކުރު އަޅާފައި ހުންނަ ކާއެއްޗެއްސާއި ބޯ އެއްޗެހި ބޭނުން ކުރުމުން އޭގެ ސަބަބުން ހަކުރު ބަލި ފަދަ މައްސަލަތައް ދިމާވުމުގެ ފުރުސަތު ބޮޑުވެއެވެ. އަދި ހަމަ އެހެންމެ މީހާގެ ދިފާއީ ނިޒާމުވެސް ބަލިކަށިވެއެވެ. އަދި މީގެ ސަބަބުން ހަށިގަނޑު ދުޅަވުމަށް މެދުވެރިވެއެވެ.

އަދި "ޕްރޮސެސް" ކޮށްފައި ނުވަތަ ގިނަ ދުވަހަށް ބަންދު ކޮށްފައި ހުންނަ މަހުގެ ބާވަތްތައް ބޭނުން ކުރުމުންވެސް ކްރޮނިކު އިންފްލެމޭޝަން އަށް މަގުފަހިވެއެވެ. މިފަދަ އެއްްޗެއްސަކީ އޭގައި ގިނަ އަދަދަކަށް ފެޓު ހިމެނޭ އެއްޗެހި ކަމަށް ވުމާއެކު މި ބޭނުން ކުރާނަމަ ވަރަށް ބޮޑަށް މީހާގެ ބަރުދަންވެސް އިތުރުވެއެވެ.

މީގެ އިތުރުން މާ ގިނައިން ތެލުލާފައި ހުންނަ ތައްޔާރީ ކާނާތައް ބޭނުން ކުރުމަކީވެސް ކްރޮނިކު އިންފްލެމޭޝަން އަށް މަގުފަހި ކުރުވާ ކަމެކެވެ. ކާއެއްޗެހި ތެލުގައި ކެއްކުމުން އޭގައި ހުންނަ ފެން ފެޓަށް ބަދަލުވެ، އޭގައި ފެޓު ހުންނަ މިންވަރު އިތުރުވެއެވެ. އަދި އޭގެ ސަބަބުބް ހަށިގަނޑަށް އެތެރެވާ ކެލޮރީތައް އިތުރުވެ، ހަށިގަނޑު ދުޅަވެއެވެ.

ކްރޮނިކު އިންފްލެމޭޝަންގެ ސަބަބުން މީހާއަށް ތަފާތު އެކި ސިއްހީ މައްސަލަތައް ކުރިމަތިވެ، އާންމު ދިރިއުޅުމުގެ ކަންތައްވެސް ކުރަން އުނދަގޫވާ ފަހަރު އާދެއެވެ. ވީމާ މިކަމަށް ސަމާލުވެ މި ހާލަތު މެދުވެރިވާ ކަންކަމާ ދުރުވެލަން ޖެހެއެވެ. އަދި މަތީގައި ހިމަނާފައިވާ ފަދަ ކާއެއްްޗެހި ބޭނުން ކުރުންވެސް މަދުކޮށްލަން ޖެހެއެވެ.