ބައިނަލްއަގްވާމީ ޖިނާއީ ކޯޓުން ހައްޔަރުކުރާނެ ކަމުގެ ބިރު އޮތުމުން ނިރުބަވެރި އިސްރާއީލްގެ ވެރިޔާ ބެންޖަމިން ނަތަންޔާހޫ ޕޮލެންޑަށް ކުރަން އޮތް ރަސްމީ ދަތުރު މެދުކަނޑާލައިފިއެވެ.

އޮޝްވިޓްސް އަށް 80 އަހަރުފުރުން ފާހަގަކުރަން ބާއްވާ ހަރަކާތުގައި ނަތަންޔާހޫއަށް ބައިވެރި ނުވެވޭނެ ކަމަށް މިހާރު އިއުލާންކޮށްފައިވާއިރު އޭނާ ހުރީ އިސްރާއީލު ދޫކޮށް އެހެން ގައުމަކަށް ދާން ޖެހިލުންވެފައި ކަމަށް ރިޕޯޓުތައް ބުނެއެވެ.

ޕޮލެންޑްގެ ނޫހެއް ކަމަށްވާ ރެޒްޕޮސްޕޮލިޓާ އިން ހުކުރު ދުވަހު ރިޕޯޓްކޮށްފައިވާ ގޮތުގައި މި ހަރަކާތުގައި ދުނިޔޭގެ ބައެއް ލީޑަރުން ބައިވެރިވާނެއެވެ. ނަމަވެސް ޖެނުއަރީ 27 ވަނަ ދުވަހު ބާއްވާ މި ހަރަކާތުގައި ނަތަންޔާހޫއަށް ބައިވެރިވުމުގެ ހުއްދަ ދިނުމަށް އިސްރާއީލުގެ ކަމާބެހޭ ފަރާތްތަކުން އެދިފައި ނުވާކަމަށް އެ ނޫހުން ވަނީ ރިޕޯޓުކޮށްފަ އެވެ.

ނަތަންޔާހޫގެ ބަދަލުގައި މި ހަރަކާތުގައި އިސްރާއީލުގެ އެޑިއުކޭޝަން މިނިސްޓަރު ޔޮއަވް ކިޝް ބައިވެރިވެވަޑައިގަންނަވާނެ ކަމަށް ބެލެވެ އެވެ.

ޕޮލެންޑްގެ ޑެޕިއުޓީ މިނިސްޓަރ އޮފް ފޮރިން އެފެއާޒް ވްލަޑިސްލާވް ބާޓޮޝެވްސްކީ އެ ނޫހަށް ދެއްވި އިންޓަވިއުއެއްގައި ވިދާޅުވީ އޭނާގެ ސަރުކާރަށް "ބައިނަލްއަގްވާމީ ކްރިމިނަލް ކޯޓުގެ މާއްދާތަކަށް އިހުތިރާމް ކުރަން ލާޒިމު" ކަމަށެވެ.

އައިސީސީން ނަތަންޔާހޫ ހައްޔަރު ކުރުމުގެ އަމުރު ނެރުނީ އޭނާ އާއި އިސްރާއީލުގެ ކުރީގެ ޑިފެންސް މިނިސްޓަރު ޔޯވް ގަލަންޓް ޣައްޒާގައި އަށެއް އޮކްޓޯބަރު 2023 އިން ފެށިގެން 20 މެއި 2024 އާ ހަމައަށް އިންސާނިއްޔަތާ ދެކޮޅަށް ހިންގި ޖަރީމާތަކާއި ހަނގުރާމައިގެ ޖަރީމާތަކުގައި ބައިވެރިވި ކަމަށް ބުނެ އެވެ.