ހަށިގަނޑުގައި މާ ގިނައިން ކޮލެސްޓްރޯލް ހުންނަ ނަމަ އޭގެ ސަބަބުން ހިތުގެ މައްސަލަތައް ޖެހުމަށް މެދުވެރިވެއެވެ. އެހެންކަމުން ހަށިގަނޑުގަނޑަށް ގެއްލުންވާ ކޮލެސްޓްރޮލް ނުވަތަ އެލްޑީއެލް ދައްކޮށް ބެހެއްޓުމަކީ ވަރަށްވެސް މުހިންމު ކަމެކެވެ. ތިރީގައި މި ހިމަނާލަނީ ހަށިގަނޑުގައި އެލްޑީއެލް ލެވެލްތައް ދައްކޮށްދިނުމަަށް އެހީވެދޭ ބައެއް ބުއިންތަކެވެ.

ގްރީން ޓީ

ގްރީން ޓީ އަކީ ވަރަށް ގިނަ މީހުންނަށް ކަމުދާ ބުއިމަކަށްވީއިރު މިއީ ހަށިގަނޑުގައި ކޮލެސްޓްރޮލް ލެވެލްތައް ދައްކޮށްދޭ އެއްޗެކެވެ. މީގައި ހިމެނޭ ކެޓެޗިން އާއި އެޕިކަލޯކެޓެޗިންގެލޭޓު (އީޖީސީޖީ) އަކީ ހަށިގަނޑުގައި އެންޒައިމު ހުންނަ މިންވަރު މަދުކޮށް، އެލްޑީއެލް ލެވެލްތައް ދައްކުރުމުގައި އެހީވެދޭ މާއްދާތަކެވެ.

އޯޓް ހިމެނޭ ބުއިންތައް

އޯޓް ކިރު ފަދަ އޯޓު ހިމެނޭ ބުއިންތަކަކީ އޭގައި ގިނަ އަދަދަކަށް ސޮލިއުބަލް ފައިބާ ހިމެނޭ އެއްޗެއްސެވެ. އެހެންކަމުން މި ބޭނުން ކުރުމުން ލޭގެ ތެރެއަށް ކޮލެސްޓްރޮލް ދަމައިގަންނަ ވަރު ދައްވެ، އޭގެ ސަބަބުން ހަށިގަނޑުގައި ކޮލެސްޓްރޮލް ހުންނަ ވަރުވެސް ދައްވެއެވެ.

ޓޮމާޓޯ ޖޫސް

ޓޮމާޓޯ ޖޫހަކީ އޭގައި ގިނަ އަދަދަކަށް ފައިބާ، ނިއާސިން އަދި ލައިކޮޕީން ނަމަކަށް ކިޔާ މާއްދާތަކެއް އެކުލެވޭ އެއްޗެކެވެ. މި ހުރިހާ މާއްދާތަަކަކީވެސް ހަށިގަނޑުގައި ލިޕިޑް ލެވެލްތައް ހުންނަ ވަރު ރަނގަޅު ކޮށްދޭ މާއްދާތަކެވެ. އެހެންކަމުން މި ބޭނުން ކުރުމުންވެސް ހަށިގަނޑުގައި އެލްޑީއެލް ކޮލެސްޓްރޮލް ހުންނަ ވަރު ދައްވެއެވެ.