ފުލުހުން ކުރިޔަށްގެންދާ ތަހުގީގަކާ ގުޅިގެން ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) ގެ ކުރީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދު ދިރިއުޅުއްވާ ގެ ބަލައި ފާސްކޮށްފިއެވެ.

ފުލުހުން ބުނީ، އެއިދާރާއިން ތަހުގީގުކުރަމުންދާ ބިންވެރިއާ އަދި ގެދޮރުވެރިޔާ ސްކީމާއި ގުޅިގެން އެޗްޑީސީގެ ކުރީގެ މެނޭޖިންގ ޑިރެކްޓަރު ދިރިއުޅުއްވާ ގެ ރޭގެ ވަގުތެއްގައި ބަލައި ފާސްކޮށްފައިވާ ކަމަށެވެ.

ފަޒުލްގެ ގެ ބަލައި ފާސްކޮށް ބޭނުންވާ ބައެއް ތަކެތި ފުލުހުންގެ ބެލުމުގެ ދަށަށް ގެނެސްފައިވާ ކަމަށާއި، އޭގެ ތެރޭގައި ބައެއް އިލެކްޓްރޯނިކް ސާމާނު ހިމެނޭ ކަމަށްވެސް ފުލުހުން ވަނީ ބުނެފައެވެ.

ފަޒުލްގެ ގެ ބަލައި ފާސްކޮށްފައި މިވަނީ ކުރީގެ ރައީސް އިބްރާހިމް މުހައްމަދު ސޯލިހްގެ ސަރުކާރުން ހިންގި "ބިންވެރިޔާ" ސްކީމްގައި ނުހިމެނޭ ބަޔަކަށް ގޯތިތަކެއް ދީގެން އުޅޭ މައްސަލައިގައި އޭނާ އަށްވެސް ތުހުމަތުތަކެއް ކޮށްފައިވާ ދަނޑިވަޅެއްގައެވެ.

މި މައްސަލައިގައި ބިންވެރިޔާ ސްކީމަށް ޝަރުތު ހަމަނުވި ނަމަވެސް ގޯތި ލިބިފައިވާ މީހުންގެ ތެރޭގައި، ފަޒީލް ހިމެނޭ ކަމަށް ބުނާ ލިޔެކިޔުންތަކެއްވެސް ވަނީ މީސް މީޑިޔާގައި އާންމުވެފައެވެ. އެގޮތުން އޭނާއަށް ލިބުނު ގޯތީގެ ވަށާ ފާރު ވެސް ހުރީ ރާނައިފައެވެ. ނަމަވެސް މިދިޔަ އަހަރުގެ އޮގަސްޓު މަހު ނެރުނު "ބިންވެރިޔާ" ސްކީމްގެ ލިސްޓުގައި ފަޒީލް ހިމެނުނީ ޝަރުތު ހަމަނުވާ މީހެއްގެ ގޮތުގައެވެ.