ދުންފަތް ކޮންޓްރޯލް ކުރުމުގެ ގާނޫނާ ހިލާފުވި ފަރާތްތައް ޖޫރިމަނާކޮށްގެން ޑިސެމްބަރު 22 ގެ ނިޔަލަށް ސަރުކާރުން 50،000 ރުފިޔާ ހޯދައިފިއެވެ.

ދިވެހި ފުލުހުންގެ ހިދުމަތުން ބުނީ ދުންފަތް ކޮންޓްރޯލް ކުރުމުގެ ގާނޫނާ ހިލާފުވެގެން ނުވަ ފަރާތެއް ޖޫރީމަނާ ކޮށްފައިވާ ކަމަށާއި އޭގެ ތެރެއިން އެކަކު ސައިކަލު ދުއްވަމުން އިލެކްޓްރޯނިކް ސިގިރެޓެއް ބޭނުންކޮށްފައިވާ ކަމަށެވެ. އެމީހާ 10،000 ރުފިޔާއިން ޖޫރިމަނާ ކޮށްފައިވާ ކަމަށްވެސް ފުލުހުން ވަނީ ބުނެފައެވެ.

ފުލުހުން ބުނީ މި ފަރާތްތައް ޖޫރީމަނާކޮށްފައި ވަނީ ދުންފަތް ކޮންޓްރޯލް ކުރުމާބެހޭ ގާނޫނަށް އެއްވަނަ އިސްލާހު ގެނައުމުގެ ގާނޫނާ އެއްގޮތްވާ ގޮތުގެ މަތިން ކަމަށެވެ.

ދުންފަތް ކޮންޓްރޯލް ކުރުމުގެ ގާނޫނުގެ ދަށުން އިލެކްޓްރޯނިކް ސިނގިރެޓާއި އަދި އެފަދަ ވޭޕްކުރުމަށް ބޭނުންކުރާ އާލާތްތަކާއި އެ އެއްޗެއްސާއެކު ބޭނުންކުރުމަށް ތައްޔާރުކޮށްފައިވާ އުފެއްދުންތައް ބޭނުންކުރާ ފަރާތްތައް 5،000 ރުފިޔާއިން ޖޫރިމަނާކުރެވެ އެވެ.

ވޭޕްގެ މައްސަލަތަކުގައި ޖޫރިމަނާ ކުރެވޭ ފަރާތްތަކަށް އެކަމުގެ މައުލޫމާތު ފޮނުވަނީ އެސްއެމްއެސްއަކުން ނެވެ. އަދި އެ މެސެޖުގައި، ޖޫރިމަނާ ދެއްކުމަށް ވާރު ޕޭގެ ޕޭމަންޓް ލިންކެއް ވެސް ފޮނުވަ އެވެ.

ދުންފަތް ކޮންޓްރޯލް ކުރުމުގެ ގާނޫނުގެ ދަށުން އެ ގާނޫނުގެ އެކި މާއްދާތަކާ ހިލާފުވެއްޖެނަމަ 50،000 ރުފިޔާއާ ހަމައަށް ޖޫރިމަނާކުރެވެ އެވެ.