އަޅުގަނޑުމެންގެ ތެރޭއިން ވަރަށް ގިނަ މީހުންނަކީ އެކިކަހަލަ ހަޖަމުގެ މައްސަލަތައް ތަހައްމަލު ކުރަމުންދާ މީހުންނެވެ. އެގޮތުން ދިމާވާ ބައެއް މައްސަލަތަކުގެ ތެރޭގައި ބަނޑު ހަރުވެ ބޮޑު ކަމު ނުދެވުމާއި، ބަނޑުގައި ގޭސް އުފެދުން ފަދަ ކަންކަން ހިމެނެއެވެ. މިކަންކަމުން ދުރުހެލި ވުމަށްޓަކައި ކެއިން ބުއިމުގައި ގެންގުޅޭ އުސޫލުތަކަށް ބަދަލު ގެނައުމަކީ ވަރަށްވެސް މުހިންމު ކަމެކެވެ.

އެގޮތުން ބަލާއިރު ގޮހޮރުގެ މައްސަލަތައް ދިމާވާނަމަ އެންމެ ފުރަތަމަ ކުރަން ޖެހޭ ކަމަކީ ގިނަ އަދަދަކަށް ފައިބާ އެކުލެވޭ އެއްޗެހި ކެއުމުގައި ހިމެނުމެވެ. ފައިބާ ހިމެނޭ ބާވަތްތައް ކެއުމުން ހަޖަމުގެ ނިޒާމުގެ މަސައްކަތްތައް ފުރިހަމައަށް ކުރެވި، އޭގެ ސަބަބުން ކާއެއްޗެހި ފަސޭހަކަމާއެކު ހަޖަމު ކުރެވެއެވެ. އަދި އޭގެ ސަބަބުން ހަމަޖުގެ ނިޒާމަށާއި ގޮހޮރަށް ދިމާވާ މައްސަލަތަކުން މީހާ ދުރުވެއެވެ.

މީގެ އިތުރުން ކާއެއްޗެހި ކާއިރު މަދުމަދުން ކެއުމަކީވެސް ހަޖަމުގެ މައްސަލަތަކުން މީހާ ދުރުކޮށްދޭ ކަމެކެވެ. އެއްފަހަރާ މާ ގިނައިން ކާނަމަ އޭގެ ސަބަބުން އެ ކާއެއްޗެހި ހަޖަމުކުރުމަށް އުނދަގޫ ވެއެވެ. އަދި އޭގެ ސަބަބުން މީހާ މާ ބޮޑަށް "ބުލޯޓުވެ" ކަންނެތް ވާ ގޮތްވެސް ވެއެވެ. އެހެންކަމުން ކާ ގަޑިތަކުގައި މަދުމިން ހިޔާރު ކުރުމަށް ކޮންމެ މީހަކުވެސް ސަމާލުވާން ޖެހެއެވެ.

އަދި ގިނަގިނައިން ފެންބޮއި ހައިޑްރޭޓު ވެގެން ހުރުމަކީވެސް ހަޖަމުގެ މައްސަލަތަކާ ދުރުކޮށްދޭ ކަމެކެވެ. މިގޮތަށް ގިނަގިނައިން ފެން ބުއިމުން ކާއެއްޗެހި ފަސޭހަކަމާއެކި ހަޖަމުވެއެވެ. އަދި އޭގެ ސަބަބުން ބަނޑު ފުއްޕުުމާއި ބަނޑު ހަރުވުން ފަދަ މައްސަލަތަކުން މީހާ ދުރުވެއެވެ.

ހަޖަމުގެ މައްސަލަތަކަކީ ވަރަށް އާންމު ގޮތެއްގައި މީހުންނަށް ދިމާވާ ކަންކަމެވެ. ވީމާ މިފަދަ މައްސަލަތަކުން ދުރުވުމަށްޓަކައި މަތީގައި ހިމަނާފައިވާ ކަންކަމަށް ސަމާލުވުން ވަރަށް މުހިންމެވެ. އަދި އެގޮތުންވެސް ހައްލު ނުވާނަމަ ޑޮކްޓަރެއްގެ ލަފާ ހޯދުން ވެސް ވަރަށް މުހިންމެވެ.