ފަސޭހަކަމާއެކު އަރިދަފުސް ރޯގާ ފަދަ ބަލިތައް ޖެހުމަށް މެދުވެރިވަނީ މީހާގެ ދިފާއީ ނިޒާމު ބަލިކަށި ވެފައިވާތީއެވެ. ބަލިތަކުން ރައްކާތެރިވެ ދުޅަހެޔޮ ސިއްހަތެއްގަައި ހުރުމަށްޓަކައި ދިފާއީ ނިޒާމު ވަރުގަދަ ކުރުމަށް ކޮންމެ މީހަކުވެސް މަސައްކަތް ކުރަން ޖެހެއެވެ.

ތިރީގައި މި ހިމަނާލަނީ ދިފާއީ ނިޒާމު ވަރުގަފަ ކުރުމަށްޓަކައި ބޭނުން ކުރަންވީ ބައެއް މާއްދާތަކެވެ.

ވިޓަމިން ސީ

ވިޓަމިން ސީ އަކީ ތަފާތު އެކިކަހަލަ ޖަރާސީމުތަކުން ހަށިގަނޑު ސަލާމަތްކޮށްދިނުމުގައި ބޮޑު ރޯލެއް އަދާ ކުރާ މާއްދާއެކެވެ. ވިޓަމިން ސީ ބޭނުން ކުރުމުން މީހާ އޮކްސިޑޭޓިވް ސްޓްރެސް އާ ދުރުކޮށްދެއެވެ. އަދި އޭގެ ސަބަބުން ދިފާއީ ނިޒާމުގެ މަސައްކަތްތައް އިތުރަށް ފުރިހަމަވެ ބަލިތަކާ ދެކޮޅަށް މަސައްކަތް ކުރާ ވަރު ރަނގަޅު ވެއެވެ. އަދި އޭގެ ސަބަބުން މީހާ އިންފެކްޝަންތަކުން ދުރުވެއެވެ.

ގިނަ އަދަދަކަށް ވިޓަމިން ސީ ހުންނަ ބައެއް އެއްޗެހީގެ ތެރޭގަައި ހުތް މޭވާގެ ބާވަތްތަކާއި، ބެރީސް، ބެލް ޕެޕާ އަދި ސްޓްރޯބެރީ ހިމެނެއެވެ. ވީމާ ދިފާއީ ނިޒާމު ވަތުގަދަ ކުރަން ބޭނުންވާނަމަ މި އެއްޗެހި ކެއުމުގައި ހިމަނަން ޖެހެއެވެ.

ޒިންކު

ޒިންކް އަކީވެސް ދިފާއީ ނިޒާމުގެ މަސައްކަތްތައް އޭގެ އެންމެ ފުރިހަމަ ގޮތުގައި ކުރުމަށްޓަކައި ވަރަށް ބޭނުންތެރި މާއްދާއެކެވެ. ހަށިގަނޑަށް ބޭނުންވާ ވަރަށް ޒިންކު ލިބޭނަމަ އޭގެ ސަބަބުން ހަށިގަނޑުގައިވާ މޮނޮސައިޓުތަކާއި، ޓީ ސެލްތަކާއި، ބީ ސެލްތަކުގެ މަސައްކަތް އިތުރަށް ފުރިހަމަވެ އޭގެ ސަބަބުން ބަލިތަކާ ދެކޮޅަށް މަސައްކަތް ކުރާ ވަރުވެސް ރަނގަޅު ވެއެވެ. އަދި އޭގެ ސަބަބުން ކްރޮނިކު އިންފްލެމޭޝަން ފަދަ މައްސަލަތަކުން މީހާ ރައްކާތެރި ވެއެވެ.

ގިނަ އަދަދަކަށް ޒިންކު ހިމެނޭ ބައެއް އެއްޗެހީގެ ތެރޭގަައި ޑެއިރީގެ ބާވަތްތަކާއި، ނަޓްސް އާއި މޭވާގެ އިތުރުން ސްޕިނެޗް ހިމެނެއެވެ. ވީމާ ބަލިތަކުން ރައްކާތެރިވާން ބޭނުންނަމަ މި އެއްޗެހި ކެއުމުގައި ހިމަނަން ޖެހެއެވެ.