މިސިޒް ހެރަލްޑް ޕޯސްޓްފޮށި ބަލާލިއެވެ. ޖަލާލީގެ ނަމުގައި ދެސިޓީ އޮތެވެ. ޖަޔާގެ ނަމުގައި އެއް ސިޓީއެވެ. ނާޖިޔާގެ ސިޓީއާއި ޖަލާލީގެ އެއްސިޓީގެ އެޑްރެސް ލިޔެފައި އޮތީ ދާދި އެއްލިއުމަކުންނެވެ. ޖަލާލީގެ އަނެއް ސިޓީ އައިސްފައި ވަނީ ކޮންމެވެސް އެހެން ޤައުމަކުންނެވެ.

މިސިޒް ހެރަލްޑް ޖަލާލީގެ ދެސިޓީ ގެންގޮސް ޖަލާލީގެ މޭޒުމަތީގައި ބާއްވައިފިއެވެ. ގޭގެ ކަނާތް ފަރާތުގައި އޮފީހެއް ކަހަލަ ކޮޑަކޮޓަރިއެއް ހުރެއެވެ.

ނާޖިޔާގެ ސިޓީ ހިފައިގެން އޭނާ އެތެރެއަށް އަތުވެއްޖެއެވެ. ހެރަލްޑް ހީކުރި ގޮތުގައި ޖަޔާ އޭނާގެ ކޮޓަރީގައި އުޅޭނެއެވެ.

[ނާޖިޔާއެވެ!] މިސިޒް ހެރަލްޑް ނޫކުލައިގެ ސިޓީ ހޫރަމުން އެތެރެއަށް ވަނުމާއެކު ގޮވާލިއެވެ. ހަމަގައިމުވެސް ޕާކިސްތާނުން އައި ސިޓީ ލިބިގަތުމަށްޓަކައި ޖަޔާ ހުންނާނީ ކެތްމަދު ވެފައެވެ. މިސިޒް ހެރަލްޑް ހުރީ ޖަޔާގެ ޝައުޤުވެރިކަމާއި ކެތްތެރިކަން އަންދާޒާ ކޮށްލުމުގެ މޫޑުގައެވެ.

ޖަޔާ ކޮޓަރިއަކު ނެތެވެ.

މިސިޒް ހެރަލްޑް ލިވިންގރޫމަށް އަތުވެއްޖެއެވެ. ދެން ޑައިނިންގރޫމް ބަލާލިއެވެ.

ޖަޔާ އެތާކުވެސް ނެތެވެ.

[ނާޖިޔާއެވެ!] މިސިޒް ހެރަލްޑް ބާރަށް ގޮވާލިއެވެ.

[ކިހިނެއް ވީހެއްޔެވެ؟] ފުރަގަހުގައި ހުރި ކޮޓަރިން އަޑު އައެވެ.

[މިއޮތީ ނާޖިޔާއަށް ގެނައި އެއްޗެކެވެ.]

[ކޮން އެއްޗެއްހެއްޔެވެ؟]

[ނިކަން ބައްލަވާށެވެ.]

[މިސިޒް ހެރަލްޑް ދޮރުމައްޗަށް އަރާފައި އުފާވެރި ހިނިތުންވަކާއިއެކު އަތްމައްޗަށް ނަގާފައި ސިޓީއުރަ ވައިގެ ތެރޭގައި ހޫރުވާލަމުން ބުންޏެވެ.

[ސިޓީ އެއްހެއްޔެވެ؟]

[ލައްބައެވެ!]

[ކޮންތާކުން އައި ސިޓީއެއް ހެއްޔެވެ؟]

[އަޅުގަނޑަށް ހީވަނީ ޕާކިސްތާނުން ހެންނެވެ.]

ޖަޔާ އަވަހަށް އިންތަނުން ތެދުވެއްޖެއެވެ. އަދި ހަލުއިކަމާއިއެކު ހެރަލްޑާ ދިމާއަށް އަތުވެއްޖެއެވެ. [ގެންނާށެވެ!]

[ނޫނެކެވެ.......]

[ކީއްވެގެންހެއްޔެވެ؟]

[ފުރަތަމަ ހިނިތުން ވެލައްވާށެވެ. އޭގެ ފަހުގައި ދީފާނަމެވެ.]

[އަވަހަށް ދޭށެވެ.]

[ނޫނެކެވެ.] ފުރަތަމަ ހިނިތުން ވެލައްވާށެވެ.]

[ހިނިތުންވާނީ ކިހިނެއްހެއްޔެވެ؟]

[މިގޮތަށެވެ.....] މިސިޒް ހެރަލްޑް ހިނިތުންވެލާފައި ދައްކާލިއެވެ. އެއާއިއެކު ޖަޔާގެ ތުންފަތަށް ހިނިތުންވުން ވެރިވެއްޖެއެވެ.

[ލައްބައެވެ. ތިޔަގޮތަށެވެ. އެއްގޮތަކަށްވެސް މޯޅިވެފައި އިންނަވާގޮތް ނުދައްކަވާށެވެ. ރަނގަޅު އަންހެން ކުދިން ދުނިޔެއާއިމެދު ބަލަންވާނީ ރަނގަޅު ގޮތުގައެވެ.]

[ނަސޭޙަތަށްވުރެ ތިޔަ ސިޓީގެ ބޭނުން މިވަގުތު މާބޮޑެވެ.]

[ސިޓީ މިއޮތީއެވެ.]

އޭނާ ޖަޔާގެ އަތަށް ސިޓީދީފިއެވެ. މަންމަމެންގެ ސިޓީއެއްކަން ހަމަޔަޤީނެވެ.]

ޖަޔާ ސިޓީއުރައިގެ ދެފުށަށް ބަލާލިއެވެ. އެޑްރެސް ލިޔެފައިވާ އަކުރަކީ އޭނާގެ ބައްޕަގެ އަތުލިޔުމެވެ. ބައްޕަގެ ސިޓީފެނިފައި އޭނާގެ ހިތް ފުރިގެން އައީ ކީއްވެގެންކަމެއް ނޭނގެއެވެ. އޭނާގެ ލޯތެމިއްޖެއެވެ. ދޯޕައްޓާގެ ކޮޅުން ލޯ ފޮހެމުން އޭނާ ސޯފާގައި އިށީދެއްޖެއެވެ.

[ތިޔަކަހަލަ ސިޓީއެއް މިސްޓަރ ޖަލާލީއަށްވެސް އައެވެ.] ހެރަލްޑް ބުންޏެވެ.

[ކީކޭހެއްޔެވެ؟] ޖަޔާ ހުއްޓުން އަރައިފިއެވެ.

[މިތާގައި މިހިނގާ ކަންތައްތަކުގެ ޚަބަރެއް ޖަޔާގެ މައިންބަފައިންނަކަށް އެނގިއެއް ނުލައްވާނެއެވެ. އެހެންކަމުން އެމީހުންގެ ލޯތްބާ އިޚްލާޞްތެރިކަން ހާމަކޮށް ޖަލާލީއަށްވެސް ސިޓީ ފޮނުވީއެވެ.]

[އެސިޓީ ކޮބައިހެއްޔެވެ؟]

[މިއައީ ޖަލާލީގެ އޮފީސް މޭޒުމަތީގައި ބާއްވާފައެވެ.]

ޖަޔާ ހިނދުކޮޅަކު ގޮތްހުސްވެފައި އިނެވެ. ދެން އަވަސްއަވަހަށް ބުންޏެވެ. [ގޭގައިވެސް އޭނާގެ އޮފީހެއް ހުރޭހެއްޔެވެ؟]

[ލައްބައެވެ. ބައެއް މަސައްކަތް ރޭގަނޑުވެސް އޭނާ ކުރަން ޖެހެއެވެ. ލަންޑަނުގެ ވިޔަފާރިއާބެހޭ ފައިލްތައް ގިނައިން ބައްލަވަނީ ގޭގައި އިންނަވައިގެންނެވެ.]

[ލަންޑަނުގައިވެސް އޭނާގެ ވިޔަފާރި ހިނގާހެއްޔެވެ؟]

[ލައްބައެވެ! ވަރަށް ފުޅާ ދާއިރާއެއްގައި ވިޔަފާރި ހިނގައެވެ. އަދި ނާޖިޔާގެ ދެބޭބެ ލަންޑަނުގެ ވަޒީފާއަށް ފޮނުވުމާއި ބެހޭގޮތުންވެސް ޖަލާލީ ވިސްނަމުން ގެންދެވިއެވެ. ވަރަށްގިނަ ކަންތައްތައް ފައުޒިއްޔާއާއި ފޯނުން ވާހަކަ ދައްކަވައިގެން ހަމަޖެއްސެވުމަށް ނިންމެވިއެވެ. އެކަމަކު މިހާރު ކަންތައް ހުރިގޮތުން ހުރިހާކަމެއް އޮންނާނީ ބަދަލުވެފާ ކަންނޭގެއެވެ.]

ނާޖިޔާ އިސްޖަހާލިއެވެ. ސިޓީ ކަނޑާލުމާއިއެކު އޭނާގެ އަތް ތުރުތުރު އަޅައިގަތެވެ.

[މިސްޓަރ ޖަލާލީގެ ސިޓީ ދައްކަ ބަލާށެވެ......] ޖަޔާ ބުންޏެވެ.

[އެއީ އޭނާގެ ސިޓީއެކެވެ. އަޅުގަނޑު އޭނާގެ މޭޒުމަތީގައި ބާއްވައިފިއެވެ.]

[އޮފީސްހުރީ ކޮން ދިމާއެއްގައިހެއްޔެވެ؟]

[އޭނާގެ ނިދާ ކޮޓަރިއާއި ޖެހިގެން ބޭރަށް ނުކުމެވެން ހުރީ އޮފީހެވެ. އަޅުގަނޑު ނާޖިޔާއަށް ގެ ދެއްކިއިރު އޮފީސް ހުރީ ބަންދުކޮށްފައެވެ.]

[އެސިޓީ ގެނެސްދީބަލާށެވެ.]

މިސިޒް ހެރަލްޑަށް ހަދާނެގޮތެއް ނޭގުނެވެ. [ހަދާނީ ކިހިނެއްތޯއެވެ. ސިޓީ އޮތީ އޭނާގެ ނަމުގައެވެ.]

[ސިޓީ ކަނޑާލާނީއެވެ.] ޖަޔާ ރުޅިއައިސްފައި ބުންޏެވެ. ]އަހަރެން ބޭނުންވަނީ ހަމައެކަނި އެޑްރެސް ބަލާލުމަށެވެ. އެއީ ބައްޕަގެ ލިޔުންތޯ ބަލާލުމަށެވެ.]

[އެންމެ ރަނގަޅެވެ. އަޅުގަނޑު ހިނގައިދާނަމެވެ.]

މިސިޒް ހެރަލްޑް ކޮޓަރިން ނުކުމެއްޖެއެވެ. ޖަޔާ ސިޓީ ނިއުޅާލިއެވެ. އެކަމަކު ޚިޔާލު ކުރެވެމުން ދަނީ ޖަލާލީގެ ނަމުގައި އޮތް ސިޓީއާއި މެދުގައެވެ.

އޭނާ ސިޓީއުރަ މޭޒުމަތީގައި ބާއްވާފައި ސިޓީ ފަތްޖަހާލިއެވެ. އަދި ކޮޓަރިން ނުކުމެގެން އަތުވެއްޖެއެވެ. ދެން ބާރަށް ހިނގާފައި ޖަލާލީގެ ނިދާކޮޓަރިއާއި ހަމައަށް އަތުވެއްޖެއެވެ.

ނިދާ ކޮޓަރި ހުރަސްކުރި ވަގުތު އޭނާގެ ހަށިގަނޑަށް ތުރުތުރެއް އައިކަން އިޙްސާސް ކުރެވުނެވެ. އަވަހަށް އެތަނުން ދެމިގެންފިއެވެ. އެކޮޓަރިއާ ހަމަޖެހިގެން އޮފީސް ކޮޓަރި ހުއްޓެވެ.

ޖަޔާ ދޮރުގެ ގޮބު އަނބުރާލުމާއިއެކު ދޮރު ހުޅުވާލާފައި އެތެރެއަށް އަތުވެއްޖެއެވެ.

[އަސްތާ!..........] އޭނާ އަނގައިން އަޑުނުކުތެވެ.

ޖަލާލީ މޭރު ކައިރީގައި ދެސިޓީއަށް ބަލަހައްޓައިގެން ހުއްޓެވެ. އޭނާ އައީ ހަމަދެންމެއަކު ކަންނޭނގެއެވެ. ބްރީފްކޭސް ގޮނޑިމަތީގައި ހުއްޓެވެ. އޭނާހުރީ މޭޒު ކައިރީގައި ކޮޅަށެވެ.

ޖަޔާ އެތެރެއަށް ވަދެގެން އައި މަންޒަރު ދެކެފައި އޭނާ ޙައިރާން ވެއްޖެއެވެ. އެކަމަކު އިއްޔެގެ ހަރުކަށި ބަސްތަކުގެ އަސަރު އަދިވެސް އޭނާގެ ހިތުގައި އެބަހުއްޓެވެ. އޭނާ އުފަލެއް ނުވެއެވެ.

[ކިހިނެއްވީ ހެއްޔެވެ؟] އޭނާ ހަރުކަށި ރާގުގައި ބުންޏެވެ.

[ކަމެއް ނުވެއެވެ!] ޖަޔާ އެއަޑުގެ ނުރުހުންތެރިކަން އިޙްސާސް ކުރަމުން ބުންޏެވެ.

]މިތަނަށް އައީ ކީއްކުރަން ހެއްޔެވެ؟] އޭނާ ހަމަ އެރާގުގައި ބުންޏެވެ.

[ތިޔަ ސިޓީ......!] ނާޖިޔާ ބޭއިޚްތިޔާރުގައި ޖަލާލީގެ އަތުގައި އޮތް ސިޓީއާއި ދިމާއަށް އިޝާރާތްކޮށްލިއެވެ.

މިސިޓީ އޮތީ އަހަރެންގެ ނަމުގައެވެ. ނާޖިޔާގެ ނަމަކު ނޫނެވެ.]

[ކާކު ފޮނުވި ސިޓީއެއްތޯއެވެ؟]

[އަދި ސިޓީއެއް ނުކަނޑަމެވެ.] ޖަލާލީ ހިތްތައް އަންދާފަދަ ހިތި އަޑަކުން ބުންޏެވެ. [ނާޖިޔާ ގާތުގައި ބުނުމުގެ ބޭނުމެއްވެސް ނެތެއްނޫން ހެއްޔެވެ؟]

[ސިޓީ...... ހީވަނީ ބައްޕަގެ ސިޓީއެއް ހެންނެވެ.] ޖަޔާ ލޯބޮޑުކޮށްފައި ޖަލާލީއަށް ބަލާލިއެވެ.

[ތިޔަހެންވެސް ވެދާނެއެވެ.] އޭނާ ފަރުވާކުޑަ ގޮތަކަށް މޭޒުމަތީގައި ސިޓީ ބާއްވަމުން ބުންޏެވެ.] މުޙްތަރަމާއެވެ! ސިޓީ އޮތީ އަހަރެންގެ ނަމުގައެވެ.]

[ލައްބައެވެ!]

[ނާޖިޔާއާ ބެހޭ ވާހަކައެއް އޮތިއްޔާ ބުނާނަމެވެ.]

ޖަލާލީ ކޯޓު ބާލާފައި ގޮނޑީގެ ލެނގޭބައިގައި އަޅުވާލިއެވެ. އަދި ޓައީގެ ގޮށަށް ދޫޖައްސާލަމުން ގޮނޑީގައި އިށީނދެއްޖެއެވެ.

ޖަޔާ ގޮސްހުސްވެފައިވާ ކަހަލަ ގޮތަކަށް ބަލަހައްޓައިގެން ހުއްޓެވެ.

[ދެން ދިޔަޔަސް އެންމެ ރަނގަޅެވެ.] ޖަލާލީ ސިޓީ ކަނޑާލަމުން ބުންޏެވެ.

ޖަޔާއަށް ހީވީ ޖަލާލީ އޭނާގެ ބުރަކަށީގައި އަތްއަޅާ ކޮށްޕާ ބޭރަށް ނެރެނީ ހެންނެވެ. އޭނާ އެނބުރިލިއެވެ. ޖަލާލީ އެވަގުތު އިނީ އޭނާއަށް ފުރަގަސް ދީގެންނެވެ. އަދި ކުރިމަތީގައި ހުރި ބިއްގަނޑުން އޭނާ ޖަޔާއަށް ބަލާލިއެވެ. ނާޖިޔާ ބޭރަށް ނުކުތުމުގެ ކުރީގައި ޖަލާލީ ބުންޏެވެ. [އެއްވެސް މީހަކު ހުއްދައަކާއި ނުލައި އޮފީހަށް ވަދެ އުޅުމަކީ އެއްގޮތަކަށްވެސް އަހަރެން އެދޭކަމެއް ނޫނެވެ. ހަނދާން ބަހައްޓާށެވެ!]

ޖަލާލީގެ މިހަރުކަށި ޖުމްލަ އިވިފައި ޖަޔާގެ އަނގަ ހުޅުވިއްޖެއެވެ.

އޭނާ އަވަސް އަވަހަށް އޮފީހުން ނުކުމެއްޖެއެވެ. އަދި ކޮޓަރިއާއި ދިމާއަށް ހިނގައިގަތެވެ. އެވަގުތު އޭނާގެ ސިކުނޑި ހަލަބޮލި ވެފައިވެއެވެ. އެތައް އިރެއް ވަންދެން އޭނާ ހިމޭންވެފައި ގޮނޑީގައި އިނެވެ. ދެން ހަމަޖެހިލިއެވެ. އަދި އަތުގައި އޮތް ސިޓީކިޔަން ފަށައިފިއެވެ. އެއީ ޖަޔާގެ ބައްޕައާއި ތާނޫ ދައްތަގެ ސިޓީއެކެވެ. އެމީހުން ފާޅުކޮށްފައިވަނީ ކިހާބޮޑު އުއްމީދެއް ހެއްޔެވެ؟ ކިހާބޮޑު އުފަލެއް ހެއްޔެވެ. ކިހާ މަތިވެރި ޖަޒްބާތެއް ހެއްޔެވެ. ކޮންމެ ލަފްޒެއް އެހާމެ ފޮންޏެވެ.

ޖަލާލީގެ އޮފީސް ކޮޓަރިއަށް ދިއުމުގެ ކުރީގައި ސިޓީ ކިޔާލެވުނުނަމަ މިއަށްވުރެވެސް އަސަރުކުރުވީސް ކަންނޭނގެއެވެ. އެކަމަކު ދެންމެ ހިނގި ހާދިސާގެ ސަބަބުން ޖަޔާގެ ހިތް ނުތަނަވަސް ވެފައިވެއެވެ. ފަށްފަށްކޮށް އޭނާގެ ޚިޔާލު ޖަލާލީއާއި ދިމާއަށް ދެއެވެ.

ޖަލާލީ........

މިހާ ދުވަސް ވަންދެން ލޯތްބާއި ނުކުޅެދުމުގައި ޖެހިފައިވާ ޖަލާލީ ކުއްލިއަކަށް ރުޅިއައީއެވެ. ހަރުކަށި މިޒާޖަކަށް ބަދަލުވީއެވެ.

ޚިޔާލުތައް ހިތުން ފޮހެލުމަށްޓަކައި އޭނާ އަނެއްކާވެސް ސިޓީ ކިޔަން ފަށައިފިއެވެ. ސިޓީގައިވަނީ ބައްޕަގެ ނަސޭހަތެވެ.

[ދަރިފުޅަކީ ވަރަށް ނަސީބުގަދަ ކުއްޖެކެވެ. ތިޔަ ކާވެނީގެ ސަބަބުން މުޅި ޢާއިލާގެ ނަސީބު ބަދަލުވެއްޖެއެވެ. މާތްރަސްކަލާނގެ ދަރިފުޅު އުފަލުގައި ލަހައްޓަވާށިއެވެ. މިއީ އަހަރެމެންގެ އުފަލެވެ. ދަރިފުޅު ތިޔަތާނގައި އިންނާނީ ހިތްހަމަ ނުޖެހިފައި ކަންނޭނގެއެވެ. އެކަމަކު ދަރިފުޅާއެވެ! ތިޔައީ ދަރިފުޅުގެ ގެއެވެ. ހިތްހަމަ ޖައްސާށެވެ. ފިރިމީހާގެ އުފާ ލިބިގަންނާށެވެ. އޭނާގެ ޚިދުމަތާއިމެދު ފަރުވާކުޑަ ނުކުރާށެވެ. އެއީ ދަރިފުޅުގެ މަޒާޖީ ކަލާނގެއެވެ.]

ޖަޔާގެ ލޮލުން ކަރުނަ އަތުވެއްޖެއެވެ.

މަންމަގެ ސިޓީވެސް އޮތީ މިކަހަލަ ގޮތަކަށެވެ. އަސަރުން ފުރިފައެވެ. ލޯތްބާއި ހެޔޮދުޢާއަށްފަހު ލިޔެފައިވެއެވެ.

[ދަރިފުޅު ދިޔަފަހުން މުޅިގެ ފަޅުވެފައިވާ ކަހަލައެވެ. ހީވަނީ ހަމަދެންމެ ކޮޓަރިން ނުކުމެގެން އަތުވެދާނެ ހެންނެވެ. ދޮރާށިން ވަދެގެން އަތުވެދާނެ ހެންނެވެ. ދަރިފުޅުގެ އަޑު ކަންފަތުގައި ޖެހެނީ ކިހިނެއްވެގެން ކަމެއް ނޭގެއެވެ. ވަކިވުމުގެ ހިތާމަ ހިތުތެރޭގައި ވާއިރުވެސް އަހަރެމެން އެންމެން އުފާވެފައިވާ ވަރު ބުނަންވެސް ނޭނގެއެވެ. ދަރިފުޅުގެ ފަހަރި މިހާރު މަންމަމެންނާއި ވަރަށް ގުޅެއެވެ. އެމީހުންގެ ފަރާތުގެ މުއްސަނދި ޢާއިލާތައްވެސް ފަޚުރުވެރިކަމާއިއެކު މިގެއަށް އައިސް އުޅެއެވެ. ނަވީދުގެ ބަފާކަލޭގެ އިއްޔެ މިގެއަށް ދުރުވިއެވެ. އަބަދުވެސް އެމީހުން ދައްކަނީ ދަރިފުޅުގެ ކައިވެނީގެ ވާހަކައެވެ. ކަލާނގެ ޤުދުރަތްތެރި ކަމެވެ. އެކަލާނގެ އަޅަމެން އެސްފީނާއިން ސަލާމަތް ކުރައްވާށިއެވެ. ދަރިފުޅާއެވެ. ޖަލާލީގެ ގެއަކީ އަމިއްލަގެ ކަމުގައި ދެކޭށެވެ. އޭނާގެ މިޒާޖު ދެނެގަތުމަށް މަސައްކަތް ކުރާށެވެ. ފިރިމީހާގެ ޚިދްމަތަކީ އަޅުކަމެކެވެ. އަހަރެމެންގެ ހެޔޮ ދުޢާތައް އަބަދުވެސް ތިޔަ ދެމަފިރިންނާއި އެކުގައި ވާނެއެވެ. އަހަރެމެންގެ ކައިރީގައި ތިޔަ ދެކުދިން ތިބިނަމަ ކޮށްފަދަ ހެއްޔެވެ. އެދުވަސްވެސް އަދި ފެންނާނެއެވެ. އެހާތަނަށް މަންމަ ކެތްކޮށްގެން އިންނާނަމެވެ.]

ހުއްޓުމެއްނެތި ޖަޔާގެ ލޮލުން ކަރުނަ ފައިބަމުން ދިޔައެވެ. އޭނާ ސިޓީ ކިޔަމުން ރޮމުން ގެންދިޔައެވެ.

ތިންވަނަގަނޑުގައި އޮތީ ތާނޫގެ ސިޓީއެކެވެ. މިއީ ކުޑަކޮށް މަޖާ ސިޓީއެކެވެ. ނަސޭޙަތާއިއެކު މަޖާ ވާހަކަތަކެއް ލިޔެފައިވެއެވެ. ޖަޔާގެ ލޮލުން ކަރުނަ އޮހެމުން ދިޔައެވެ. އަދި ސިޓީކިޔަމުން ދިޔައެވެ. އެތައް ވާހަކަ ތަކަކަށްފަހު ލިޔެފައިވެއެވެ.

[ޖަޔާއެވެ. ކޮއްކޮ ޙަޔާތުގެ މައިދާނުގައި ފައިތިލަ ސާބިތު ކޮށްފީމުއެވެ. ކޮއްކޮއަކީ އިންތިހާއަށް ރީތި ކުއްޖެކެވެ. ފިރިމީހާއަކީ ހުތުރު މީހެކެވެ. މީގެ ސަބަބުން އަބަދުވެސް އޭނާ ހުންނާނީ މަތިހަށި ނެގިފައެވެ. ޔަޤީން ކުރާށެވެ. ކޮންމެ އަންހެނަކުވެސް ބޭނުންވާނީ ފިރިމީހާ ޣުލާމެއްގެ ގޮތުގައި ހުރުމަށެވެ. ޤުދްރަތީގޮތުން ޖަލާލީއަކީ ހުތުރު މީހެކެވެ. ނަތީޖާއެއްގެ ގޮތުން އޭނާ އަބަދުވެސް ކޮއްކޮގެ ޣުލާމަކަށް ހުރުމަށް މަޖުބޫރު ވާނެއެވެ. ދެކެން ހުންނާށެވެ.]

ޖަޔާ ލޯމަރާލިއެވެ. އަޖައިބެއްފަދަ ހާސްކަމެކެވެ. ގޭގެ މީހުން ވަކިވަކިން ސިޓީލިޔެފައިވެއެވެ. އެކަމަކު އެންމެންގެ އަސަރަކީވެސް އެކައްޗެކެވެ. އުފަލުން ފޮޅިފައެވެ. ކޮންމެ ލަފުޒެއްގައި ފަޚުރުވެރިކަން ފާޅުކޮށްފައިވެއެވެ. ތާނޫ ދައްތަ ޖަލާލީގެ ހުތުރު ސިފައާއި މެދުގައިވެސް އަލިއަޅުވާލާފައި ވެއެވެ. ޖަޔާގެ މޭގައި ކުށްވެރިކަމުގެ އިޙްސާސް މޯޅިއަށް ދެމެން ފަށައިފިއެވެ. ފައުޒިއްޔާ ހަމަ ޔަޤީނުންވެސް ތާނޫ ދައްތައާއި ގޭގެ އެހެންމީހުން ގާތުގައި ޖަލާލީގެ ހުތުރުކަމާއި ބެހޭގޮތުން ވާހަކަ ދައްކާނެއެވެ.

އެކަމަކު.......

ޖަޔާގެ ދެއަތުން ބޮލުގައި ހިފަހައްޓާލިއެވެ. އޭނާގެ ނިމުމަކީ ކޮބައި ހެއްޔެވެ؟ ވިސްނަމުން ވިސްނަމުން ގޮސް އޭނާގެ ސިކުނޑިއަށް އެނބުރުން އަރަން ފަށައިފިއެވެ.

**********************

ޖަލާލީ ނޫކުލައިގެ ސިޓީއުރަ ނަގައިފިއެވެ. އަދި އޭގެ ދެފުށް ބަލާލިއެވެ. ދެން މޭޒުމަތީގައި ބާއްވައިފިއެވެ. އޭނާ އިނީ މޭޒުކައިރީގައި ހުރި އެނބުރޭ ގޮނޑީގައެވެ. މޭޒަކީވެސް އެހާމެ ރޫފަ ހެޔޮ ރީތި ބިއްލޫރި މޭޒެކެވެ. މޭޒުގެ ކަނާތް ފަރާތުގައި ފޯނު ހުއްޓެވެ. ވަށިގަނޑުގައި ވައްތަރު ވައްތަރުގެ ލިޔުންތައް ހުއްޓެވެ. އަދި މޭޒުގެ ކަނާތް ފަރާތުގައި ދިހަވަރަކަށް ފައިލު އޮތެވެ. މިހެންގޮސް އޮފީސް މޭޒަކަށް ބޭނުންވާނެ ހުރިހާ ސާމާނެއް އެމޭޒުމަތީގައި ހުއްޓެވެ. ވާތް ފަރާތުގައިވެސް ފޯނެއް ހުއްޓެވެ. މޭޒުގައި ވަށައިގެން ރީތި ގޮނޑިތަކެއް އަތުރާލާފައިވެއެވެ. އޭގެ ފުރަގަހުގައި ފުޅާ ކިޑިކީ ދޮރެއް ހުއްޓެވެ. އެތެރެ ފަރާތުން އޮފްވައިޓް ފަރުދާއެއް ދަމާލާފައިވެއެވެ. މުޅި ކޮޓަރީގެ އެތެރޭ ބިތްގަނޑުތައް ހަދާފައިވަނީ ލަކުޑި ފިލައިންނެވެ. ފުރަނީޗަރުތައް ހުރީ ނޫކުލައިންނެވެ.

ކުޑަވަރެއްގެ އީރާނީ ކާޕެޓްކޮޅެއް މޭޒާއި ގޮނޑިތަކާއި ދެމެދުގައި އަޅާލާފައި އޮތެވެ.

ޖަލާލީގެ މޫނުމަތީގައި އެއްވެސް ވައްތަރެއްގެ އަސަރެއްނެތެވެ. ކާވެނީގެ ސަބަބުން ފޮނިކަމެއް ލިބުނުނަމަ ބަފާކަލޭގެ ފޮނުވި ފުރަތަމަ ސިޓީއަކީ ޝައުޤުވެރިކަމާއި އުފާވެރިކަމުގެ ސަބަބަކަށް ވީހެވެ.

އެކަމަކު.......

މިސިޓީ ކިޔުމަކުން ވާނެކަމެއްވެސް ނެތެވެ. ބަލާވެސް ނުލާ ކުދިކުދި ކޮށްލާފައި ވަށިގަނޑަށް އަޅާލިކަމުގައި ވިޔަސް ވަކި ތަފާތެއް ނުހުންނާނެއެވެ. ބައްދަލުވުމުގެ ކުރީގައި ޖަޔާގެ ގުޅުން ކެނޑިއްޖެއެވެ. ފުރަތަމަ ދުވަހު އެންމެފަހުގެ ގަޑިވެސް ޖެހިއްޖެއެވެ. ކަމުގެ ފެށުން ނިމުމުގެ ސިފައިގައި ފެނިގެން ހިގަނއްޖެއެވެ.

އެކަމަކުވެސް ހިތުގެ ސިއްރު ވަތްގަނޑުގައި ވަޅުލެވުމުގެ ކުރީގައި ސަލާމަތް ކުރެވިފައިވާ އެންމެ އުންމީދެއް އޮތެވެ.

އެކެއް.....

ދޭއް........

ތިނެއް........

އަދި ހަތަރުވަނަ ދުވަސް ނިމިގެން ދިޔައީވެސް ހަމަ އެއުންމީދުގައެވެ. ޖަޒްބާތުގެ އޮއިވަރުގައި އޮވެ ޖަޔާ އައްސޭރި ފަށުގައި ހިފާތޯއެވެ. އޭނާގެ ހުތުރު ސިފައާއިމެދު މާފުކޮށް އޭނާގެ ކައިރިއަށް އާދެވޭތޯއެވެ. ޖަޔާ ކޮށްފައިވާ ކަންތައްތަކާއި ބުނެފައިވާ ބަސްތަކާއިމެދު މަޢާފުދިނުމަށް އެއުންމީދު ޖަލާލީއަށް އެދިފައިވެއެވެ.

އަދި ޖަލާލީ އެއުންމީދު އެދިފައިވާ އެދުމާ އެއްބަސް ވެފައިވެއެވެ.

އެކަމަކު އިއްޔެ ޖަޔާގެ ޢަމަލުތައް އިމްތިޙާނު ކުރެވުނެވެ. ޖަލާލީއަކީވެސް އިންސާނެކެވެ. ކެތްކުރެވޭނީވެސް ވަކިވަރަކަށެވެ. އޭނާ ނިކަމެތި ކޮށްލެވުމުން މިދާވަރު ތަޙައްމަލު ކުރެވޭހާ ހިތްވަރެއް މިހާރަކު ނެތެވެ. އޭނާ ހިތުގައި ފޮރުވާފައިވާ އެއްކަލަ އުއްމީދުގެ ކަރުގައި ހިފައިފިއެވެ. އެވަގުތު ހިތްވެސް ކުދިކުދިވެގެން ނުދިޔައީ ހަމަ ކިރިޔާއެވެ.

މިހާތަނަށް ޖަޔާ ފުރުމުގެ ކަންތައްތަކުގައި ޖަލާލީ އުޅުނީ ހިތާދެކޮޅަށެވެ. އެހެންނަމަވެސް އިއްޔެ އޭނާގެ ޚިޔާލު ބަދަލުވެއްޖެއެވެ. ވީހާ އަވަހަކަށް މިބިރުވެރި ކިއްލާއިން ޖަޔާ ސަލާމަތް ކުރުމަށް ހިތުގެ އަޑިން ނިންމައިފިއެވެ. އަދި ޚުދް އޭނާވެސް ސަލާމަތްވުމަށް ނިންމައިފިއެވެ.

މިގޮތަށް ޢަމަލުކުރުމަށް އޭނާއަށް ޙައްޤެވެ.

އޭނާގެ ޔަޤީންކަމަށް ވަރުގަދަ ޒަލްޒަލާއެއް އައިސްފައިވެއެވެ. އަމިއްލަ ވަޠަނުގެ އަންހެން ކުދިންނާއިމެދު އޭނާގެ ޚިޔާލަކީވެސް މަޖުބޫރީ ޙާލަތު ތަންދޭ ގޮތަކަށް ޢަމަލުކުރާ ބައެއް ކަމުގައެވެ. ނަމަވެސް ކަންތައް ދިމާވީ މުޅިން އިދިކޮޅަށެވެ.

ޒުވާން ކޮންމެ ފިރިހެނަކު ފަދައިން އޭނާވެސް ކުލަ ރީތި ހުވަފެންތައް ދެކެފައިވެއެވެ. އަންބެއްގެ ތަޞައްވުރު ޤާއިމުކޮށްފައިވެއެވެ. އަމިއްލަ ހުތުރު ސިފަ އިޙްސާސް ކުރެވުމާއި އެކުގައިވެސް ރީތި އަންހެން ކުދިންނަށް ހިތްކިޔާފައިވެއެވެ. ހަމައެކަނި ރީތިކަމެއް ނޫނެވެ. އުޅުމާއި އަޚްލާޤަށްވެސް އޭނާ ބަލައެވެ.

އެތައް އިރެއްވަންދެން ޖަލާލީ މާނައެއްނެތް ނަޒަރަކުން އެސިޓީއާއި ދިމާއަށް ބަލަހައްޓައިގެން އިނެވެ. ދެން ސިޓީ ނަގައިފިއެވެ...... ސިޓީއުރަ ކަނޑާލުމާއެކު އޭނާގެ ތުންފަތުގައި އެއްވެސް ކުލައެއްނެތް ހިނިތުންވުމެއް ދުވެލިއެވެ. ކާކުގެ ސިޓީއެއް ބާވައެވެ.

އެމީހަކާމެދު ގުޅުމެއްނުވާ އަދި ގުޅުންހުރި މީހެއްގެ ސިޓީއެކެވެ.

ޖަލާލީ ފުންނޭވާއެއް ދޫކޮށްލަމުން އުރައިން ސިޓީ ނެރެފިއެވެ. އަދި ގޮނޑީގައި ރަނގަޅަށް ލެނގިލިއެވެ.

އޭނާގެ ނަމުގައި އޮތް ސިޓީއެކެވެ. ލިޔެފައިވަނީ ނާޖިޔާގެ ބައްޕައެވެ.

ލޯބިން ފުރިފައިވާ ސިޓީއެކެވެ. ލޯބިވެތި ގޮތަކަށް ލިޔެފައިވާ ސިޓީއެކެވެ. ޖަލާލީގެ ހިތްމަޑުވެގެން ދިޔައީ ކީއްވެގެން ކަމެއް ނޭނގެއެވެ.

އެމާތް އިންސާނާގެ ލޯބި އަބަދުގެ އަބަދަށް އޭނާއަށް ލިބޭނެނަމަ ކޮންފަދަ ހެއްޔެވެ.

އޭނާ ލިޔެފައި އޮތެވެ.

[ދަރިފުޅާ ޖަލާލީއެވެ. އަހަރެމެން މިތިބީ ދަރިފުޅާއި ދުރުގައެވެ. ވަރަށް ދުރުގައެވެ. އަހަރެމެންނަށް ދަރިފުޅު ނުވެސް ފެނެއެވެ. އެކަމަކު ހީވަނީ ހަމަ އަހަރެމެންގެ ތެރޭގައި ދަރިފުޅު އުޅޭހެންނެވެ. ބައްޕައާއި މަންމަގެ ހިތުގައި ދަރިފުޅަށްޓަކައި އުފެދިފައިވާ ލޯތްބަކީ ޙަޤީޤީ ދަރިއަކަށް ދެވޭނެ ފަދަ ލޯތްބެކެވެ.

އެހެން ތަނެއްގައި ލިޔެފައިވެއެވެ.

[ނާޖިޔާއަކީ ދުވަހަކުވެސް އަހަރެމެންގެ ލޯމަތިން ދުރަށްދިޔަ ކުއްޖެއްނޫނެވެ. އެކަމަކު މިހާރު އެއިނީ އެތައް ސަތޭކަ މޭލެއްގެ ދުރުގައެވެ. ދަރިފުޅާއެވެ. އަންހެން ކުދިންނަކީ އެހެން ބައެއްގެ މުދަލެކެވެ. އެމީހުން މައިންބަފައިން ދޫކޮށްދާން ޖެހޭނެއެވެ. އެކަމަކު ހަނދާން ކުރާށެވެ. އަންހެން ކުއްޖެއްގެ މިޤުރްބާނީއަކީ ހަމައެކަނި އެންމެ އިންސާނަކަށްޓަކައި ވެވޭ ޤުރްބާނީއެކެވެ. އަމިއްލަ ފިރިމީހާ އަށްޓަކައެވެ. އެކުއްޖަކާމެދު ހުރިހާގޮތަކުން ރައްކާތެރިވުމަކީ އަދި ޚިޔާލު ބެހެއްޓުމަކީ ފިރިމީހާގެ ފަރުޟެއްވެސް މެއެވެ.

ޖަލާލީ ދަރިފުޅާއެވެ. ނާޖިޔާގެ އުފަލާމެދު އެއްވެސް ޝައްކެއްނެތެވެ. އެކަމަކު ބުނަން ހެއްޔެވެ. ނާޖިޔާ ކަހަލަ ކުއްޖަކު ވަރަށް މަދުވާނެއެވެ. ބައްޕައެއްގެ މަޤާމުގައި ހުރެ ދަރިފުޅަށް ތަޢުރީފު ކުރަނީކީ ނޫނެވެ. ޙަޤީޤަތް ބަޔާން ކޮށްދެނީއެވެ. އޭނާ ގެންގުޅެ ބޮޑުކުރީ އިންސާފަށް ލޯބިކުރާ މާތް އަންހެނެކެވެ. މަންމައަކީ އެހެން މީހުންގެ އުފަލަށްޓަކައި ތިމާގެ ހުރިހާކަމެއް ޤުރްބާން ކޮށްލާ އަންހެނެކެވެ. މިހުރިހާ ސިފަތަކެއް ޖަޔާއަށް ވާރުތަވެފައިވެއެވެ. މިސަބަބުތަކަށްޓަކައި ނާޖިޔާއަކީ ފިސާރި ބަސްއަހާ ޚިދުމަތްތެރި ރަނގަޅު އަންހެން ކުއްޖަކަށް ވާނޭކަމުގައި އަހަރެން ޔަޤީން ކުރަމެވެ.]

ޖަލާލީ މޭޒުމަތީގައި ސިޓީ ބާއްވައިފިއެވެ. ބައްޕައެއްގެ އުފަލާއިމެދު އޭނާވެސް ހަރުއަޑުން ހީނގަތުމަށް ހީކުރިއެވެ.

އެކަމަކު އެހުނުން ކޮބައި ހެއްޔެވެ. އޭނާގެ ކަރުތެރޭގައި ބޮޑު އެތިގަނޑެއް ތާށިވެފައިވާ ކަހަލައެވެ. މޭޒުމަތީގައި ބޯޖައްސާލުމާއިއެކު ދެއަތުގެ މުލައްދަނޑިން ބޮލުގެ ދެފަރާތުގައި ހިފަހައްޓާލިއެވެ. ހަމަ މިހާރުގޮސް ޖަޔާއަށް އެސިޓީ ދެއްކުމަށް އޭނާގެ ހިތަށް އެރިއެވެ. އޭރުން ޖަޔާއަށް ކުށްވެރިވެއްޖެ ކަމުގައި ޔަޤީން ކުރެވިދާނެއެވެ. އޭނާ އެމީހުންގެ ބޮލާއި އަމާޒުކުރަން އެއުޅެނީ ކިހާވަރުގަދަ ބޮމެއްކަންވެސް އެނގިދާނެއެވެ.....

ބޮމް....... އެމީހުންގެ އުފާތަކާއި އުއްމީދުތައް ފުނޑުފުނޑު ކޮށްލާނެ ބޮމެކެވެ.

އެކުށެއްނެތް މައިން ބަފައިންނާއިމެދު ޖަލާލީގެ ހިތުގައި ރަޙުމް އުފެދިއްޖެއެވެ. ދެން ވިސްނުމުގެ މިޞްރާބު ބަދަލުކޮށްލިއެވެ. އަދި މިހުރިހާ ގެއްލުމެއްގެ ޒިންމާ އުފަލަންޖެހޭ ކުށްވެރިއަކީ ޚުދް އޭނާކަމުގައި ދެކެން ފަށައިފިއެވެ.

ހާސްކަމުގެ ވަގުތުތަކެއް ވޭތުވެގެން ހިނގައްޖެއެވެ.

އޭނާ އަނެއްކާވެސް މޭޒުމަތިން ބޯހިއްލާލިއެވެ. ސިޓީ ފަތްޖަހާފައި އުރައަށް ލުމަށްފަހު ޓްރޭގައި ބާއްވައިފިއެވެ. ނާޖިޔާގެ ބައްޕަ، ސިޓީގެ ޖަވާބު ފޮނުވުމަށް އެދިފައި އޮތެވެ.

ޖަލާލީހުރީ ޖަވާބެއް ފޮނުވޭ ކަހަލަ މޫޑެއްގައެއް ނޫނެވެ. ލިޔާނީ ކީކޭ ކިޔާފައި ހެއްޔެވެ.

ގަޑިއަށް ބަލާލުމާއިއެކު އޭނާއަށް ވަގުތުގެ އިޙްސާސް ކުރެވިއްޖެއެވެ. އެގާރަ ޖަހާއިރަށް އޭނާ ވަކީލު ގާތަށް ދާން ޖެހެއެވެ. އެގާރަ ޖެހަންހުރީ ހަމައެކަނި ވިހިމިނެޓެވެ.

ޖަލާލީ އަވަސް އަވަހަށް ވަތްގަނޑުން ދެ ފައިލު ނަގައިފިއެވެ. ބޮޑު ސިޓީއުރައެއް ފުރެންދެން އެކިއެކި ލިޔުން ހުއްޓެވެ. އެސިޓީ އުރަވެސް ބްރީފްކޭހަށް ލައިފިއެވެ. ވަކީލާއި ބައްދަލުކުރުމަށްފަހު އޭނާ ޑިވޯސް ކޮންސަލްޓެންޓާއި ބައްދަލުކުރަން ޖެހެއެވެ. އެތަނުން އެމްބަސީ އަށެވެ.

ހިނދުކޮޅަކު ހިމޭނުން އިނުމަށްފަހު އޭނާ ހުރިހާ އެއްޗެއްސަށް ނަޒަރު ހިންގާލިއެވެ. ދެން ކޯޓުނަގާފައި ގަޔަށް މަހާލިއެވެ. އަދި ފެންވަރާ ކޮޓަރިއަށް ވަދެ އިސްތަށިގަނޑު ރީތި ކޮށްލިއެވެ.

ބްރީފްކޭސް ހިފައިގެން ޖަލާލީ ކޮޓަރިން ނުކުމެއްޖެއެވެ. އެވަގުތު މިސިޒް ހެރަލްޑް އަނެއްކޮޅަށް ދަނީއެވެ. އޭނާއާއެކު ނާޖިޔާވެސް ހުއްޓެވެ. ނާޖިޔާހުރީ ޖަރީކުރި ހުދު ހެދުމެއްގައެވެ.

[މިސިޒް ހެރަލްޑެވެ!] ޖަލާލީ ގޮވާލިއެވެ.

މިސިޒް ހެރަލްޑާއެކު ނާޖިޔާވެސް އެނބުރި ބަލާލިއެވެ.

[ލައްބައެވެ......] މިސިޒް ހެރަލްޑް އޭނާގެ ކައިރިއަށް އަތުވެއްޖެއެވެ. ޖަޔާ އަނެއް ފަރާތަށް އެނބުރިއްޖެއެވެ. އެކަމަކު އެހުރިތާނގައި ހުރީއެވެ.

[އަހަރެން މެންދުރު ކާނީ ބޭރުންނެވެ. އަހަންނަށް އިންތިޒާރު ނުކުރާށެވެ.] ޖަލާލީ ބުންޏެވެ.

[ލައްބައެވެ.... އަޅުގަނޑުމެންވެސް ބޭރަށް ދަނީއެވެ.]

[އެންމެ ރަނގަޅެވެ.]

[މިއަދު އަޅުގަނޑުމެން މިދަނީ އަތިރި މައްޗަށެވެ.]

]އަވަހަށް ދާށެވެ..... އިއްތިފާޤުން ޖަޔާއަށް އެމެރިކާއަށްވެސް އާދެވިއްޖެއެވެ. ދެން ރަނގަޅުވާނީ ދިއުމުގެ ކުރީގައި ރަނގަޅަށް ތަންތަން ބަލާލުމެވެ.]

ޖަލާލީގެ އަޑުގައި ވަރުގަދަ ދިލައެއް ހުއްޓެވެ. ޖަޔާގެ ހިތް އަނދައިފިއެވެ.

[ތިޔަކަންތައް އޭނާއަށް ފުރިހަމަ ކޮށްދޭނަމެވެ....] މިސިޒް ހެރަލްޑް ބުންޏެވެ. އޭނާ އެނބުރިލާފައި ޖަޔާއަށް ބަލާލިއެވެ. ޖަޔާ ހުރީ އިސްޖަހައި ގެންނެވެ.

[ވަރަށް ރަނގަޅެވެ.] ޖަލާލީ ބުންޏެވެ.

[އޭނާގެ ބައްޕަ ފޮނުވިސިޓީ އަހަރެންގެ އޮފީސް މޭޒުމަތީގައި އޮންނާނެއެވެ. އެސިޓީ ކިޔާލަން ނާޖިޔާ ބޭނުންވާނެ ކަންނޭނގެއެވެ.]

[ބޭނުންވާނެއެވެ.]

[ހެރަލްޑް އޭނާއަށް ސިޓީ ގެނެސްދޭށެވެ.]

[ލައްބައެވެ!]

ޖަލާލީ ދުރުހިލޭ ގޮތަކަށް ނާޖިޔާއަށް ބަލާލިއެވެ. އޭނާވެސް ޖަލާލީއަށް ބަލާލިއެވެ.

ހަތަރުކަޅި ބައްދަލުވުމަކީ އެއްގޮތަކުން ބަލާއިރު މާކަ މުހިންމު ކަމެއްނޫނެވެ. އެދެމީހުން އެކަކު އަނެކަކަށް ބަލާލީ ހަމައެކަނި ދުރުހިލޭ ބައެއްގެ ގޮތުގައެވެ.

[ސިޓީ ކިޔާލަ ބަލާށެވެ.] ޖަލާލީ ޖެހިލުމެއްނެތި ބުންޏެވެ. [ޖަޔާގެ އަތުގައި ސިޓީ ބޭއްވިއަސް އެންމެ ރަނގަޅެވެ. ޖަޔާއަށް ފެންނަކަމެއް ކަމުގައި ވަންޏާ ޖަވާބުވެސް ލިޔެލާށެވެ.]

ޖަލާލީ ހަރުކަށި ގޮތަކަށް ބުންޏެވެ.

ނާޖިޔާ ހަމަ އެކައްޗެއްވެސް ނުބުނެއެވެ.

ޖަލާލީ ހިނދުކޮޅަކަށް ހުއްޓުން އަރުވާލާފައި އަނެއްކާވެސް ބުންޏެވެ. [ނާޖިޔާގެ ބައްޕަގެ ސިޓީގެ ޖަވާބު ފޮނުވުމަށް އެދިފައިވެއެވެ. އެކަމަކު މިހާރު އަހަރެން މިހިރީ ޖަވާބު ފޮނުވޭފަދަ މޫޑެއްގައެއް ނޫނެވެ. ވީމާ ނާޖިޔާއަށް ފެންނަ ވާހަކައެއް ލިޔާށެވެ. އެހެންނޫނީ ރަށަށްގޮސް އަނގަބަހުން ހުރިހާ ވާހަކައެއް ކިޔާދޭށެވެ.]

ޖަޔާގެ މޭގައި ރިހުމެއް އުފެދުނެވެ. އޭނާ ހަރު އަޑުން ބުނަން ހިތަށް އެރިއެވެ.

]އަޅުގަނޑަކަށް ނުދެވޭނެއެވެ. އަދި ދާކަށް އަޅުގަނޑު ބޭނުމެއްވެސް ނޫނެވެ.]

އެހެން ނަމަވެސް އެލަފްޒުތައް އޭނާގެ ކަރުތެރޭގައި ތާށިވެއްޖެއެވެ. ލުއި ކަރުނައެއް ލޮލުގައި އުފެދިގެން ދިޔައެވެ. އޭނާ އަވަސް އަވަހަށް އަނެއް ފަރާތަށް އެނބުރިލައިފިއެވެ. އަދި އިނގިލީގެ ބަނޑުފުށުން ލޯކައިރި ފޮހެލިއެވެ. ހަމައެއާއިއެކު ހިނގައި ގަތުމަށް ފިޔަވަޅު ނެގިއެވެ.

[ނާޖިޔާއެވެ!] ޖަލާލީ ގޮވާލިއެވެ. އަޑުގައި ހުރީ އިންތިހާ ދަރަޖައިގެ ބީރަށްޓެހި ކަމެކެވެ.

[ނާޖިޔާ ހުއްޓިއްޖެއެވެ. އެކަމަކު އެނބުރި ބަލައެއް ނުލިއެވެ.

[ނާޖިޔާ ބޭނުންތާކަށް މިސިޒް ހެރަލްޑާ އެކުގައި ދާށެވެ. ފައިސާއަށް ބޭނުން ވާނެއެވެ. އަހަރެންގެ ސޭފުން ފައިސާ ނަގާށެވެ.]

ޖަޔާ ނުކުޅެދިފައި ބަލާލިއެވެ.

ޖަލާލީ ޖީބުން ތަޅުދަނޑި ނަގާފައި ހެރަލްޑާ ދިމާއަށް އެއްލިއެވެ. [ނާޖިޔާ ބޭނުން ވަރަކަށް ފައިސާދޭށެވެ.]

[ޝުކުރިއްޔާއެވެ.] މިސިޒް ހެރަލްޑް ބުންޏެވެ. އަދި ޖަޔާއާއި ދިމާއަށް ތަޅުދަނޑި ދިއްކޮށްލިއެވެ.

[އަޅުގަނޑު ފައިސާ ބޭނުމެއްނޫނެވެ.] ޖަޔާގެ އަޑު ޖަޒްބާތުގެ ގަދަފަދަ ކަމާއެކުގައި ފަޅައިގެން ހިނގައްޖެއެވެ. ޖަލާލީގެ އަޑުގައިވާ ހަރުކަށިކަމާއި ވާހަކަ ދެއްކުމުގެ ރާގު ހުރިގޮތުން ޖަޔާގެ ހިތަށް ވަރަށްބޮޑަށް އަސަރު ކުރިއެވެ.

[ނާޖިޔާއެވެ!] ޖަލާލީ އަމުރުވެރި ރާގުގައި ބުންޏެވެ. ނާޖިޔާ އަނެއްކާވެސް ހިނގައިގަތެވެ.

[ޖަލާލީވެސް ކުރިއަށް ހިނގައިގަތެވެ. އަދި ހަރުއަޑުން ބުންޏެވެ. [ނާޖިޔާއެވެ. ތިޔަ ރުޅިގަނޑު ދޫކޮށްލަ ބަލާށެވެ. ޙަޤީޤަތާ ކުރިމަތިލާށެވެ. ނާޖިޔާ ފައިސާއަށް ބޭނުންވާކަށް އަހަންނަށް ހަމަގައިމެވެ. ބޭނުން ވަރަކަށް ފައިސާ ނަގާށެވެ. އަނެއްކޮޅުން ބަލާއިރު ކާވެނީގެ ހުރިހާކަމެއް ހަމަނުޖެހޭހާ ހިނދަކުގައި ނޫނީ ޤާނޫނީގޮތުން އަހަރެންގެ މުދަލާއިމެދު ނާޖިޔާއަށް ފުރިހަމަ ޙައްޤު އޮންނާނެއެވެ.]

ޖަލާލީ އަވަހަށް އެބުރިލިއެވެ. އަދި ހަލުއި ފިޔަވަޅު އަޅަމުން ކޮރިޑޯއިންލާފައި ބޭރުދޮރާދިމާއަށް އަތުވެއްޖެއެވެ.

ނާޖިޔާވެސް ދުވެފައި އޭނާގެ ކޮޓަރިއަށް އަތުވެއްޖެއެވެ. އަދި ބާލީހުގައި މޫނު ފޮރުވައިގެން އޮވެ ރޯން ފަށައިފިއެވެ. އޭނާގެ ހިތް އޮބިއޮންނަ ވަރަށްވުރެ މައްޗަށް ހިނގައްޖެއެވެ. ހަދަންވީ ގޮތެއް އޭނާއަކަށް ނޭނގުނެވެ.

އޭނާއަކަށް އެނބުރި ރަށަކަށް ނުދެވޭނެއެވެ. ދާކަށް ބޭނުމެއްނޫނެވެ.

އެކަމަކު މިތާނގައި އުޅުމަކީވެސް އުނދަގޫ ކަމެކެވެ. ޖަލާލީ އެއްވެސް އަރާމެއްނެތި އޭނާ ރަށަށް ފޮނުވުމަށް މަސައްކަތް ކުރަނީއެވެ. އޭނާ މިހާރު ހުރިހާ ގުޅުމެއް ކަނޑާލައިފިއެވެ. ހީވަނީ އޭނާ އެބުނިގޮތަށް ކަންތައްކުރާނެ ހެންނެވެ. އޭނާގެ ވާހަކަ ދެއްކުމުގެ ރާގުވެސް މިހާރު ބަދަލުވެއްޖެއެވެ. އުޅުންވެސް ބަދަލުކޮށްލައިފިއެވެ. މިހުރިހާކަމެއް ޖަޔާ ވަރަށް ރަނގަޅަށް އިޙްސާސް ކުރެއެވެ.

ކުރާނީ ކީއްހެއްޔެވެ......

ބާލީހުގައި މޫނު ފޮރުވައިގެން އޮވެ ހާސްކަމާއިއެކުު އޭނާ ވިސްނަމުން ދިޔައެވެ.

(ނުނިމޭ)