ޕެރެސެޓަމޮލް އަކީ ދުނިޔޭގެ އެކި ކަންކޮޅުތަކުގެ އެންމެންވެސް ބޭނުން ކުރާ ބޭހެކެވެ. ހުން އަޔަސް ނުވަތަ ތަނެއްގައި ރިއްސިއަސް އެންމެ ފުރަތަމަ ގިނަ މީހުން ބޭނުން ކުރާ ބޭހަކީ މިއީ އެވެ. ގިނަ ގޭބިސީތަކުގައި މި ބޭސް އަބަދުމެހެން ގަނެފައި ހުރެއެވެ. މި ބޭނުން ކުރަން ޖެހޭ ޑޯޒޭޖުގައި ބޭނުން ކުރާނަމަ މިއީ ރަނގަޅު ބޭހަކަށްވީނަމަވެސް، މާ ޑޯޒު މަތިކޮށް ބޭނުން ކުރާނަމަ އޭގެ ސަބަބުން ސިއްހަތަށް ނުރައްކާ ވާ ފަހަރުވެސް އާދެއެވެ.

ޕެރެސެޓުމޮލް ބޭނުން ކުރަން ޖެހޭ ވަރަށްވުރެ އިތުރަށް ބޭނުން ކުރާނަމަ ދިމާވާ ވަރަށް ގިނަ މައްސަލަތައް ހުރެއެވެ. އޭގެ ތެރޭގައި ބޮލަށް އެނބުރުން އެރުމާއި، ބަނޑުގައި ރިއްސުމާއި ގައިގެ އެކި ތަންތަން ރަތްވުން ފަދަ ކަންކަން ހިމެނެއެވެ. އަދި ބައެއް ހާލަތްތަކުގައި ގައި ހިރުވުމާއި، ހަށިގަނޑު ދުޅަވުމާއި، ނޭވާލާން އުނދަގޫ ވުމަކީވެސްް ބައެއް މީހުންނަށް މެދުވެރިވާ އާންމު ކަންކަމެވެ.

މި ބޭހުން އޯވާޑޯޒް ވުމުން ދިމާވާ އެންމެ ނުރައްކާތެރި މައްސަލައަކީ ލިވާ ޓޮކްސިސިޓީ ނުވަތަ ފުރަމޭ ހަލާކުވުމެވެ. ބައެއް ހާލަތްތަކުގައި މީހުންގެ ފުރަމޭ އެއްކޮށް ހަލާކުވެ، އޭގެ ސަބަބުން އެ ގުނަވަން ޓްރާންސްޕްލާންޓު ހަދަން ޖެހޭ ފަހަރުވެސް އާދެއެވެ. އަދި މީގެ އިތުރުން ދިގު މުއްދަތަކަށް ޕެރެސެޓަމޮލް ބޭނުން ކުރާނަމަ އޭގެ ސަބަބުން މީހާގެ ކިޑްނީތައް މަސައްކަތް ކުރުން ހުއްޓި، ކިޑްނީގެ ބަލިތައް ޖެހުމަށް މެދުވެރިވެއެވެ. އަދި މިކަމުގެ ސަބަބުން ޑައެލިސިސް ހަދަން ޖެހޭ މީހުންވެސް މަދެއް ނުނެވެ.

މާ ގިނައިން މި ބޭސް ބޭނުން ކުރާނަމަ އޭގެ ސަބަބުން މީހާ އޯވާޑޯޒުވެ މަރުވުމަކީވެސް އެކަށީގެންވާ ކަމެކެވެ. މީގެ ކުރިންވެސް މިފަދަ ބައެއް ހާދިޘާތައް ކުރިމަތިވެފައި އެބަ ވެއެވެ. އެގޮތުން ބަލާއިރު ލިވަޕޫލްގެ ހޮސްޕިޓަލުގައި އޮތް އަންހެނަކަށް ނުބައި ޑޯޒެއްގެ ޕެރެސެޓުމޯލް ދީގެން އެމީހާ މަރުވި ހާދިޘާ ފާހަގަ ކުރެވެއެވެ.

ވީމާ މިފަދަ ބޭސްތައް އަމިއްލައަށް ގަނެގެން ބޭނުން ކުރުމުގެ ބަދަލުގައި ޑޮކްޓަރަށް ދައްކަައި ޑޮކްޓަރުގެ އިރުޝާދުގެ ދަށުން ބޭނުން ކުރުމަށް ކޮންމެ މީހަކުވެސް ސަމާލުވާން ޖެހެއެވެ.