އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ކެންސަރު ބައްޔަށް ފަރުވާ ހޯދަމުންދާކަމަށް ބޭރުގެ މީޑިޔާ ތަކުން ރިޕޯޓުކޮށްފިއެވެ.

ރިޕޯޓުތައް ބުނާގޮތުން އުމުރުން 75 އަހަރުގެ ބެންޖަމިން ނަތަންޔާހޫ އަށް ކެންސަރު ޖެހިފައިވާކަން އެނގިފައިވަނީ ޔުރިނަރީ އިންފެކްޝަން އަކާއި ގުޅިގެން ހެދި ޓެސްޓުތަކުންނެވެ. މި ޓެސްޓުތަކުން ދައްކާގޮތުގައި ނަތަންޔާހޫ ފަރުވާ ހޯދަނީ ޕްރޮސްޓޭޓް ކެންސަރު ބައްޔަށެވެ.

އެގޮތުން މިއަދުގެ ވަގުތެއްގައި ސާޖަރީއެއް ހަދަން ހަމަޖެހިފައިވާކަމަށް އީސްރާއީލުގެ ރަސްމީ އިދާރާ ތަކާއި ހަވާލާދީ މީޑިޔާ ތަކުން ރިޕޯޓުކޮށްފައިވެއެވެ. މިކަން އިއުލާންކޮށްފައިވަނީ އިސްރާއީލުގެ އަސްކަރިއްޔާއިން ޣައްޒާގެ އުތުރުގައި ހުރި ހަމައެކަނި މަސައްކަތްކުރާ ހޮސްޕިޓަލަށް ވަދެ ހަމަނުޖެހުން ހިންގުމަށްފަހު، އެ ހޮސްޕިޓަލުގެ ޑިރެކްޓަރު ހައްޔަރުކުރުމަށްފަހުގައެވެ.

މީގެއިތުރުން ނަތަންޔާހޫ ވަނީ މިއަހަރު ހާނިޔާ އޮޕަރޭޝަނެއް ވެސް ކޮށްފައެވެ. އަދި މިދިޔަ އަހަރު ހިތުގެ މަސައްކަތް ދަށްވުން ކުޑަކުރުމަށް ޕޭސް މޭކަރ އެއްވެސް ވަނީ ލައްވާފައެވެ.

މިދިޔަ އަހަރުގެ އޮކްޓޯބަރު މަހުގެ ހަތް ވަނަ ދުވަހު ހަމާސް އިސްވެ ދިން ހަމަލާގެ ރައްދުގައި، ފަލަސްތީނުގެ ރައްޔިތުންނާ ދެކޮޅަށް ނަތަންޔާހޫގެ އިސްރާއީލުން ލާއިންސާނީ އަމަލުތައް ހިންގައި، ހަނގުރާމަ ކުރަމުން އަންނަތާ 14 މަހަށް ވުރެ ގިނަ ދުވަސް ވެއްޖެ އެވެ.

ފަލަސްތީނުގެ ހެލްތު މިނިސްޓްރީން ބުނާ ގޮތުގައި އިސްރާއީލުގެ ހަމަލާތަކުން ފަލަސްތީނުގެ 45,400 އަށްވުރެއް ގިނަ މީހުން މިހާތަނަށް ޝަހީދުވެފައިވާއިރު، 108،000 އަށް ވުރެ ގިނަ މީހުން ވަނީ ޒަހަމްވެފައެވެ.