މިއަދު ހެނދުނުން ފެށިގެން ހުއްޓާނުލައި މާލެއަށް ކުރަމުންދާ ވިއްސާރައިގެ ސަބަބުން މާލޭގައި ބޮޑުވެފައިވާ ފެންގަނޑު ހިންދުމުގެ މަސައްކަތުގެ ތެރެއިން 10,000 އެއްހާ ޓަނުގެ ފެން ބޭރުކޮށްފިއެވެ.

މާލޭގެ އެކި ސަރަހައްދުތަކުގައި ޕަމްޕްތައް ބަހައްޓައިގެން ފެންތައް ބޭރުކުރުމުގެ މަސައްކަތް އެމްއެންޑީއެފުން މިހާރު ވެސް ދަނީ ކުރަމުންނެވެ. އޭގެ ތެރޭގައި ވެސްޓް ޕާކާއި، އައިޖީއެމްއެޗާއި އަދި މާފަންނު ފެރީ ޓާމިނަލް ސަރަހައްދުގައި ޕަމްޕްތައް ބަހައްޓާފައިވެއެވެ.

އެއާ ގުޅޭ އެންމެ ފަހުގެ މައުލޫމާތުތައް ހާމަކޮށް އެމްއެންޑީއެފުން ބުނީ މިރޭ 08:30 އާ ހަމައަށް މާލޭގެ ހަ ސަރަހައްދަކުން ޖުމްލަ 9917 ޓަނުގެ ފެން ބޭރުކުރެވިފައިވާކަމަށެވެ.

މޫސުމާ ބެހޭ އިދާރާ، މެޓް އޮފީހުން ބުނެފައިވާ ގޮތުގައި މާލެއަށް މިދިޔަ 24 ގަޑިއިރު ތެރޭގައި 160 މިލިލީޓަރުގެ ވާރޭވެހިފައިވެއެވެ.

މާލޭގައި ފެންބޮޑުވުމާއި ގުޅިގެން ހިނގާ ބިނގާވެ އުޅުމަށާއި އާންމު ދަތުރުފަތުރަށް ވެސް ވަނީ ބުރޫއަރާފައެވެ. މާލެއަށް ބޯކޮށް ވާރޭވެހި މަގުތަކުގައި ފެންބޮޑުވެފައިވާތީ، އާއްމު ހާލަތަށް ބަދަލުވަން ދެން މަގުތަކުގައި ބަރު އުޅަނދު ނުދުއްވަން ފުލުހުން ވަނީ އެދިފައެވެ.