ފިލްމު އުފެއްދުންތެރިޔާ ދިނޭޝް ވިޖަންގެ ޕްރޮޑަކްޝަން ކުންފުނި މެޑޮކްސް ފިލްމްސްގެ "ހޮރޯ ކޮމެޑީ" ޖޯންރާގެ 5 ފިލްމެއް ނެރޭ ދުވަސް އާންމު ކޮށްފައިވާ ކަމަށް މީޑިއާތަކުން ރިޕޯޓު ކޮށްފިއެވެ.

ބޮލީވުޑް ހަންގާމާގައިވާ ރިޕޯޓެއްގައި ބުނެފައިވަނީ "މެޑޮކްސް ހޮރޯ ކޮމެޑީ ޔުނިވަރސް (އެމްއެޗްސީޔޫ)" ކުރިއަށް އޮތް ހަތަރު އަހަރު ތެރޭގައި އުފައްދަން ނިންމާފައިވާ ބިރުވެރި ކޮމެޑީ ފިލްމުތައް ނެރޭ ދުވަސް އާންމު ކޮށްފައިވާ ކަމަށެވެ. އެގޮތުން ބަލާއިރު މިއަހަރު ފަހުކޮޅު ނެރުމަށް ހަމަޖެހިފައިވަނީ "ތާމާ" އާއި "ޝަކްތީ ޝާލިނީ" އެވެ.

މީގެ ތެރެއިން "ތާމާ" ނެރުމަށް ހަމަޖެހިފައިވަނީ އިންޑިއާގެ ދިވާލީ އާ ގާތްކޮށެވެ. އަދި "ޝަކްތީ ޝާލިނީ" ނެރުމަށް ހަމަޖެހިފައިވަނީ މިއަހަރު ޑިސެންބަރު 31 ގައެވެ.

އަދި މީގެ އިތުރުން އެ ކުންފުނިން ނެރެން ހަމަޖެހިފައިފާ ފިލްމުތަކުގެ ތެރޭގައި އެތައް ބައެއްގެ މަގުބޫލުކަން ލިބިފައިވާ ފްރެންޗައިޒް "ސްތިރީ" ގެ ތިން ވަނަ ބަޔާއި، "ބޭޑިޔާ 2" ވެސް ހިމެނެއެވެ. "ބޭޑިޔާ 2" ނެރުމަށް ހަމަޖެހިފައިވަނީ 2026 ގެ އޮގަސްޓުގައެވެ. އަދި "ސްތިރީ 3" ނެރުމަށް ހަމަޖެހިފައިވަނީ 2027 ގެ އޮގަސްޓުގައެވެ.

މެޑޮކްސް ފިލްމްސްއިން އުފައްދާ ބިރުވެރި ކޮމެޑީ ފިލްމުތަކަށް އެތައް ބައެއްގެ ތަރުހީބު ދަނީ ލިބެމުންނެވެ. "ސްތިރީ"، "ބޭޑިޔާ"، އަދި "ބާލާ" އަށް ލިބުނު ކާމިޔާބީއަށްފަހު އެ ކުންފުނިން މިވަނީ ކުރިއަށް އޮތް އަހަރުތަކަށް ބެލުންތެރިންނަށް ކަމުދާ އެތައް ފިލްމެއް ތާވަލު ކޮށްފައެވެ.