ތެލުގޫ ތަރި ރާމް ޗަރަންގެ ކުރިއަށް އޮތް ފިލްމު "ގޭމް ޗޭންޖަރ" ގެ ޓްރެއިލަރ ނެރެފިއެވެ.

މި ފިލްމުގެ ޓްރެއިލަރ ނެރެފައިވަނީ މި ޖެނުއަރީ މަހު 2 ގައި ހައިދްރަބާދުގައި ބޭއްވި ބޮޑު ހަފްލާއެއްގެ ތެރެއިންނެވެ. މި ފިލްމުގައި ރާމް ޗަރަން ފެނިގެންދާނީ ފައިސާގެ ދަހިވެތިކަމާ ދެކޮޅަށް ވަކާލާތުކުރާ އައިއޭއެސް އޮފިސަރެއްގެ ގޮތުގައެެވެ.

މި ފިލްމުގައި ރާމް ޑަބަލް ރޯލް ކުޅޭ ކަމަށް ރިޕޯޓުތައް ބުނެއެވެ. އެގޮތުން އޭނާ މި ފިލްމުގައި ފެނިގެންދާނީ ދަރިއެއްގެ ރޯލާއި، ބައްޕައެއްގެ ރޯލުންނެވެ. މި ފިލްމުގެ ކާސްޓުންގެ ތެރޭގައި ރާމްގެ އިތުރުން އަންޖަލީ، ސުނިލް، ސްރީކާންތު އަދި ކިއާރާ އަދްވާނީ ފަދަ ތަރިން ހިމެނެއެވެ.

މި ފިލްމުގެ މަސައްކަތް 2021 ގައި ފެށިނަމަވެސް ތަފާތު އެކި ސަބަބުތަކާހުރެ މަސައްކަތްތައް ލަސްވުމުގެ ސަބަބުން ޝޫޓުތައް ނިމިފައިވަނީ މިދިޔަ އަހަރު ފަހުކޮޅުގައެވެ. ރިޕޯޓުތައް ބުނާގޮތުގައި މި ފިލްމުގެ 4 ލަވައެއް އުފެއްދުމަށް 75 ކުރޯޑު ރުޕީސް ހަރަދު ކޮށްފައިވެއެވެ.

އެތައް ބަޔަކު އިންތިޒާރު ކުރަމުންދާ މި ފިލްމު ނެރުމަށް ހަމަޖެހިފައިވަނީ މި ޖެނުއަރީ މަހުގެ 10 ގައެވެ.

ރާމް ޗަރަން އެންމެ ފަހުން ފެނިފައިވަނީ އެތައް ބައެއްގެ މެދުގައި މަގުބޫލުވި ފިލްމު "އާރްއާރްއާރް" އިންނެވެ. މީގެ އިތުރުން އޭނާ ވަނީ މިހާރު ބުޗީ ބާބޫ ސަނާ އާއެކު ފިލްމެއްގައި ސޮއި ކޮށްފައި ކަމަށް ރިޕޯޓުތައް ބުނެއެވެ.