ދުޅަހެރޮ ސިއްހަތެއްގައި ހުރުމަށްޓަކަައި ކޮންމެ ދުވަހަކުވެސް މަދުވެގެން 8 ގަޑިއިރުގެ ނިދި ލިބުމަކީ ވަރަށް މުހިންމު ކަމެކެވެ. ނަމަވެސް އަޅުގަނޑުމެންގެ ތެރޭގައި އެއަށްވުރެ ގިނައިރު ނިދާ މީހުންވެސް އުޅެއެވެ. މިގޮތަށް ހަށިގަނޑަށް ބޭނުންވާ ވަރަށްވުރެ އިތުރަށް ނިދާމަނަ އޭގެ ސަބަބުން ތަފާތު އެކި މައްސަލަތައް ދިމާވެއެވެ.

އެގޮތުން ބަލާއިރު މިގޮތަށް ގިނައިރު ނިދާނަމަ ދިމާވާ އެންމެ ބޮޑު މައްސަލައަކީ މީހާގެ ބަރުދަން އިތުރު ވުމެވެ. ކޮންމެ ރެއަކު 9 ގަޑިއިރަށްވުރެ ގިނައިން ނިދައި، ދުވާލު ކަންނެތްކޮށް އުޅޭނަމަ އޭގެ ސަބަބުން މީހާގެ ބަރުދަން އިތުރުވެއެވެ. އަދި އޭގެ ސަބަބުން ސިއްހީ އެތައް މައްސަލައެއް ދިމާވެއެވެ.

9 ގަޑިއިރަށްވުރެ ގިނައިން ނިދާނަމަ ދެން ދިމާވާ މައްސަލައަކީ ދަރިން ހޯދަން އުނދަގޫވުމެވެ. ދިރާސާތަކުން ދައްކާ ގޮތުގައި މާ ގިނައިރު ނިދާނަމަ އޭގެ ސަބަބުން ފިރިހެންވެރިންގެ ދަރިފަނީގެ ކޮލިޓީ ދަށްވެއެވެ. އަދި އޭގެ ސަބަބުން ދަރިން ލިބުމުގައި ދަތިތަކެއް ކުރިމަތިވެއެވެ. އަދި މާ ގިނައިން ނިދާނަމަ އަންހެންވެރިންގެ ހޯމޯންތަކަށް ބަދަލު އައިސް އޭގެ ސަބަބުންވެސް ދަރިމައިވުމަށް އުނދަގޫވާކަމަށް ދިރާސާތަކުން ދައްކައެވެ.

މީގެ އިތުރުން ގިނައިރު ނިދާނަމަ އޭގެ ސަބަބުން ހިތުގެ ބަލިތައް ޖެހުމުގެ ފުރުސަތު ބޮޑުވެއެވެ. މާ ގިނައިން ނިދާނަމަ މީހާގެ ހަށިގަނޑު ސްޓްރެސްވެ، ހަށިގަނޑުގައި ސީ ރިއެކްޓިވް ޕްރޮޓީން އުފައްދާވަރު އިތުރުވެއެވެ. އަދި ހަށިގަނޑު ދުޅަވެ، އޭގެ ސަބަބުން ހިތުގެ ބަލިތައް ޖެހުމަށްވެސް މެދުވެރިވެއެވެ.

ވީމާ މާ ގިނައިރު ނިދުމަށް އާދަވެފައިވާނަމަ އެކަން ބަދަލުކޮށް، 8 ގަޑި އިރު ނިދަން އާދަކުރަން ކޮންމެ މީހަކުވެސް ޖެހެއެވެ. މިއީ ދުޅަހެޔޮ ސިއްހަތެއްގައި ހުރުމަށްޓަކައި ވަރަށް މުހިންމު ކަމެކެެވެ.