ނިރުބަވެރި އިސްރާއީލުން ފާއިތުވި ދެ ދުވަސްތެރޭ ޣައްޒާއަށް ދިން ވައިގެ ހަމަލާތަކުގައި އެކަނިވެސް 150 މީހުން މަރުވެފައިވާ ކަމަށް ޣައްޒާގެ ސިއްހީ އޮފިޝަލުން ބުނެފިއެވެ.

ޣައްޒާގެ ސިއްހީ ދާއިރާގެ އޮފިޝަލުންނާ ހަވާލަދީ ބޭރުގެ މީޑިޔާތަކުން ރިޕޯޓުކުރާގޮތުގައި އިސްރާއީލުން ފާއިތުވި ހުކުރު ދުވަހު ދިން ހަމަލާތަކުގައި 73 މީހުން މަރުވެފައިވާއިރު ބުރާސްފަތި ދުވަހު ދިން ހަމަލާތަކުގައި 77 މީހުން ވަނީ މަރުވެފައެވެ.

ފަހަކަށް އައިސް ނިރުބަވެރިންގެ ހަމަލާތަކުގައި އެއްފަހަރާ ގިނަ ބަޔަކު މަރުވަމުންދާއިރު މިފަދަ ހަމަލާތަކުގައި ޒަހަމްވާ ފަރާތްތަކަށް ފަރުވާ ނުދެވެނީސް މަރުވާކަންވެސް ރިޕޯޓްތައް ލިބެއެވެ. އިސްރާއީލުން ވަނީ ޣައްޒާގެ ސިއްހީ ހިދުމަތްދޭ ގިނަ ތަންތަން ބޭނުން ނުކުރެވޭ ވަރަށް ހަލާކުކޮށްލާފައެވެ.

އެމްނެސްޓީ އިންޓަނޭޝަނަލް އިން ބުނާގޮތުގައި ދާދިފަހުން އިސްރާއީލުގެ ހައްދުފަހަނަޅައަޅާފައިވާ ހަނގުރާމަވެރިން ކަމާލް އަދުވާން ހޮސްޕިޓަލަށް ދިން ހަމަލާގައި އެ ހޮސްޕިޓަލުގެ ޑިރެކްޓަރު ޑރ. ހުސާމް އަބޫ ސާފިޔާ ބަންދުކުރުމަކީ ޣައްޒާގެ ސިއްހީ ދާއިރާ ފުނޑާލައި ފަލަސްތީނުގެ "ނަސްލު ނައްތާލުމުގެ ނިޔަތް" ރަމްޒުކޮށްދޭ ކަމެއް ކަމަށެވެ.

އިސްރާއީލުން ޣައްޒާއާ ދެކޮޅަށް ކުރަމުންދާ ހަނގުރާމައިގައި އޮކްޓޯބަރު 7، 2023 އިން ފެށިގެން މިހާތަނަށް 45،658 ފަލަސްތީނު މީހުން މަރުވެ 108،583 މީހުން ވަނީ ޒަހަމްވެފައެވެ.