މި ވެހެމުންދާ ވާރެއާއި މޫސުމަށް އައިސްފައިވާ ބަދަލުގެ ސަބަބުން މުޅި މާހައުލު ފިނިވެ، އޭގެ ސަބަބުން އެތައް ބަޔަކަށް ދަނީ އަރިދަފުސް ރޯގާ ޖެހެމުންނެވެ. އަދި އެކަމުގެ ސަބަބުން ވާހަކަ ދައްކަން އުނދަގޫވެ ދުވަހުގެ މަސައްކަތްތަކާގެން ކުރިއަށްދާންވެސް ބައެއް މީހުންނަށް އުނދަގޫވެއެވެ.

މިފަހަރު މި ހިމަނާލަނަނީ މިކަމުން ފަސޭހަ ހޯދުމަށް ބޭނުން ކުރަންވީ ސައިގެ ރެސިޕީއެވެ.

ޖިންޖާ ޕެޕާ ޓީ ރެސިޕީ

މި ސައި ތައްޔާރު ކުރުމަށް ބޭނުންވާނީ 1 އިންޗި އަށް ކޮށާފައިވާ އިނގުރާއި، އެއް ސައިސަމުސާ އަސޭމިރުހާއި، ތުނިކޮށް ކޮށާފައި ހުރި ފަސް ލުނބޯ ކޮޅާއި، 3 ތަށި ފެނާއި، 2 ސައިސަމުސާ ލުނބޯ ހުތާއި، މާމުއި އަދި ލޮނުކޮޅެކެވެ.

މި ތައްޔާރު ކުރުމަށްޓަކައި އެންމެ ފުރަތަމަ އިނގުރު ރަނގަޅަށް ގާނާލާފައި އަސޭމިރުސްވެސް ހިމުން ވަންދެން މުގުރާލާނީއެވެ. އެއަށްފަހު ފެން މަޑު ގިނީގައި ކެއްކުމަށްފަހު ކެކެން ފެށުމުން އޭގެ ތެރެއަށް ގާނާފައި ހުރި އިނގުރާއި، މުގުރާފައި ހުރި އަސޭމިރުހާއި، ތުނިކޮށް ކޮށާފައި ހުރި ލުނބޯ އެޅުމަށްފަހު 5-10 މިނެޓު ވަންދެން މަޑުގިނީގައި ކައްކާނީއެވެ.

އަދި އެއަށްފަހު ސައި ރަނގަޅަށް ފުރާނާލާފައި އެއަށް ލުނބޯހުތާއި، ލޮނާއި މާމުއި އަޅާފައި ރަނގަޅަށް އެއްކޮށްލާނީއެވެ. އަދި ބޭނުންނަމަ މީގެ ތެރެއަށް ކުޑަ ރީނދޫކޮޅެއް އަޅަައިގެންވެސް ބޭނުން ކުރެވިދާނެއެވެ.

މި ސައި ބުއިމުން ހަށިގަނޑު ދުޅަވުން ކުޑަވެ، ކަރުތެރޭގައި ހުންނަ އަރިދަފުސް ފަސޭހަކަމާއެކު ހަށިގަނޑުން ބޭރުވެއެވެ. އަދި މީހާގެ ދިފާއީ ނިޒާމުގެ މަަސައްކަތްތައް އިތުރަށް ފުރިހަމަވެ، ވަރަށް ފަސޭހަކަމާއެކު އިންފެކްޝަންތަކުން ހަށިގަނޑު ސަލާމަތްވެއެވެ.

ވީމާ އަރިދަފުސް ރޯގާ ޖެހި އެކަން ރަނގަޅު ނުކުރެވިގެން އުޅޭނަމަ މި ސައި ތައްޔާރު ކޮށްގެން ބޭނުން ކުރުމަކީ ރަނގަޅު ކަމެކެވެ.