ޣައްޒާގެ ރައްޔިތުން މަރާ ހުސްކުރަން އެމެރިކާއިން އަނެއްކާވެސް ނިރުބަވެރި އިސްރާއީލަށް އަށް ބިލިއަން ޑޮލަރުގެ ހަތިޔާރު ދޭން ނިންމައިފިއެވެ.

މީޑިއާ ރިޕޯޓްތައް ބުނާ ގޮތުގައި އެމެރިކާގެ ރައީސް ކަމުން ވަކިވެވަޑައިގަންނަވާ ޖޯ ބައިޑަންގެ ސަރުކާރުން އިސްރާއީލަށް އަށް ބިލިއަން ޑޮލަރުގެ ހަތިޔާރު ވިއްކުމަށް ރާވާފައިވާކަން ކޮންގްރެސްއަށް ވަނީ މިހާރު އަންގާފަ އެވެ.

މިހާރުގެ ސަރުކާރުގެ އޮފިޝަލުންނާ ހަވާލާދީ އެމެރިކާގެ މީޑިއާތަކުން ހޮނިހިރު ދުވަހު ރިޕޯޓްކޮށްފައިވާ ގޮތުގައި ޑިޕާޓްމަންޓް އޮފް ސްޓޭޓް އިން އެ ނޮޓިފިކޭޝަން ފޮނުވީ ހުކުރު ދުވަހު އެވެ.

މީގެ ކުރިންވެސް އެމެރިކާއިން ވަނީ ނިރުބަވެރި ޖަމާއަތަށް ހަތިޔާރު ފޯރުކޮށްދީފައެވެ. އަދި މިފަހަރު އެގައުމުން އިސްރާއީލަށް ފޯރުކޮށްދޭން ނިންމާފައިވާ ހަތިޔާރުތަކުގެ ތެރޭގައި 500 ޕައުންޑް (226 ކިލޯ) ގެ ވޯހެޑްތަކާއި ޕްރެސިޝަން ގައިޑެޑް މުނިޝަންތަކާއި އާޓިލަރީ ޝެލްތަކާއި ޖެޓްތަކާއި ހަމަލާދޭ ހެލިކޮޕްޓަރުތަކަށް ބޭނުންކުރާ މިސައިލްތަކާއި ބޮމް ފިއުޒްތަކާއި ޕްރޮޖެކްޓައިލްތައް ހުއްޓުވުމަށް އެއާ ޓު އެއާ މިސައިލްތައް ހިމެނޭނެ ކަމަށް ރިޕޯޓްތައް ބުނެ އެވެ.

ފާއިތުވި އަހަރުގެ އޮގަސްޓް މަހުގައިވެސް އިސްރާއީލަށް ވޮޝިންޓަނުން ވަނީ 20 ބިލިއަން ޑޮލަރުގެ އަސްކަރީ ސާމާނު ފޯރުކޮށްދީފައެވެ. އޭގެ ތެރޭގައި ޖެޓްތަކާއި އަސްކަރީ އުޅަނދުތަކާއި ބޮމާއި މިސައިލް ހިމެނެއެވެ.

އެމެރިކާއިން ހުއްޓުމެއްނެތި އިސްރާއީލަށް ހަތިޔާރު ފޯރުކޮށްދެމުންދާއިރު އެ ހަތިޔާރުތައް ބޭނުންކޮށްގެން އިސްރާއީލުން ދަނީ ޣައްޒާ ސުންނާފަތިކުރަމުންނެވެ. ޣައްޒާގެ އިންސާނީ ހާލަތާ ގުޅިގެން އިންސާނީ ހައްގުތަކާ ބެހޭ ޖަމާއަތްތަކުން ވަނީ އިސްރާއީލުގެ ހަނގުރާމައިގައި "ނަސްލު ނައްތާލުމުގެ އަމަލުތައް" ހިންގާ ކަމަށް ތުހުމަތުކޮށްފައެވެ.