ފަލަސްތީނުގެ ޣައްޒާގައި އިސްރާއީލުން ހިންގަމުންދާ ލާއިންސާނީ އަމަލުތަކުގެ ތެރެއިން އެމެރިކާގެ ހަތިޔާރު ބޭނުންކޮށްގެން އަނެއްކާވެސް ޣައްޒާގެ 50 މީހުން ޝަހީދުކޮށްލައިފިއެވެ.

ފުނޑުފުނޑުކޮށްލާފައިވާ ޣައްޒާގެ ސިއްހީ ދާއިރާގެ އޮފިޝަލުން ރިޕޯޓުކުރާގޮތުގައި އިސްރާއީލުގެ އަނިޔާވެރި ސިފައިން އެންމެ ދުވަހެއްގެ ތެރޭގައި 50 މީހުން ޝަހީދުކޮށްލައިފާވާކަމަށެވެ. ފަހަކަށް އައިސް އިސްރާއީލުގެ މިފަދަ ހަމަލާތައް އަމާޒުވާ މީހުންގެ ތެރޭގައި ކުޑަކުދިންނާއި އުމުރުންދުވަސްވީ މީހުންނާއި އަންހެނުން އިތުރުކަން ފާހަގަ ކުރެވެއެވެ.

އިސްރާއީލުން ޣައްޒާއަށް ހަމަލާތައް ދެމުންދާ މި ދަނޑިވަޅަކީ މި ހަނގުރާމަ ހުއްޓާލުމަށް ދެ ގައުމުންވެސް ބޭރުގެ ގައުމުތަކާއެކު މަޝްވަރާތައް ކުރަމުންދާ ދަނޑިވަޅެއްކަން ފާހަގަ ކުރެވެއެވެ.

މި މަޝްވަރާތަކާ ބެހޭގޮތުން އެމެރިކާގެ ޚާރިޖީ ވަޒީރު އެންޓޯނީ ބްލިންކެން ބުނީ ޣައްޒާގައި ހަނގުރާމަ ހުއްޓާލުމާއި އަސީރުން ދޫކޮށްލުމުގެ އެއްބަސްވުމެއްގެ ފުރުސަތުތަކާ މެދު މިހާރު އުންމީދު ކުރެވޭ ކަމަށެވެ. އަދި މިކަމުގެ އެއްބަސްވުމަކަށް އައުމާ ވަރަށް ގާތްވެފައިވާ ކަމަށް އޭނާ ވަނީ ބުނެފައެވެ.

ޣައްޒާގައި އިސްރާއީލުން ހިނގަމުންދާ ނަސްލު ނައްތާލުމުގައި އޮކްޓޯބަރު 7، 2023 އިން ފެށިގެން މިހާތަނަށް 45،936 ފަލަސްތީނު މީހުން ޝަހީދުވެ 109،274 މީހުން ވަނީ ޒަޚަމްވެފައެވެ. އެ ދުވަހު ހަމާސް އިސްވެ އޮވެ ދިން ހަމަލާތަކުގައި އިސްރާއީލުގައި 1،139 މީހުން މަރުވެ 200 އަށް ވުރެ ގިނަ މީހުން އަޅުވެތިކޮށްފައިވެ އެވެ.