ފިލްމީ ދާއިރާގައި ލިބުނު ކާމިޔާބީތަކުގެ ސަބަބުން ބޮޑާވެ ކިބުރުވެރި ވެވުނު ކަމަށް މަނީޝާ ކޮއިރާލާ ބުނެފިއެވެ.

އޭނާ މިހެން ބުނެފައިވަނީ ދާދި ފަހުން ދިން އިންޓަވިއުއެއްގައި ފިލްމީ ތަރިއަކަށް ވެވުމުން އޭނާގެ މިޒާޖަށާއި ދިރިއުޅުމަށް އައި ބަދަލުތަކާ ބެހޭ ގޮތުން ވާހަކަ ދައްކަމުންނެވެ. އެގޮތުން އޭނާ ބުނެފައިވަނީ އޭނާގެ ކެރިއަރުގައި ކާމިޔާބީތައް ލިބެން ފެށި ހިސާބުން އޭނާގެ މިޒާޖަށާއި އުޅުމަށް ބޮޑެތި ބަދަލުތަކެއް އައި ކަމަށެވެ.

އަދި ލިބެމުންދިޔަ ކާމިޔާބީއާއެކު އޭނާއަށް މާ ބޮޑަށް ބޮޑާވެ ކިބުރުވެރި ވެވުނު ކަމަށްވެސް މަނީޝާ ވަނީ ބުނެފައެވެ. އަދި އޭނާއަށް ހެދިފައިވާ ގޯސްތަކާމެދު މިހާރު ދެރަވާކަމަށްވެސް އޭނާ ވަނީ ބުނެފައެވެ.

އޭނާ އިތުރަށް ބުނެފައިވަނީ އޭނާގެ ދިރިއުޅުމުގައި އެންމެ މުހިންމު ރޯލެއް އަދާކުރަނީ އޭނާގެ މައިންބަފައިން ކަމަށާއި، ދިރިއުޅުމުގައި ހެދޭ ގޯސްތައް ރަނގަޅު ކުރުމުގައި މައިންބަފައިންގެ އެހީ ވަރަށް ބޮޑަށް ލިބުނު ކަމަށެވެ.

މަސައްކަތުގެ މައިދާނަށް ބަލާއިރު މަނީޝާ އެންމެ ފަހުން ފެނިފައިވަނީ ސަންޖޭ ލީލާ ބަންސާލީގެ ސީރީސް "ހީރާމަންޑީ" އިންނެވެ.