ބޮލީވުޑްގެ ސުޕަސްޓާ ތަރިން ޝާހުރުކް ޚާން އާއި ސަލްމާނު ޚާން އެކުގައި ބޮޑު ސްކްރީނުން ވަރަށް އަވަހަށް ފެނިދާނެ ކަމަށް ބުނެ މީޑިއާތަކުން ރިޕޯޓު ކުރަން ފަށައިފިއެވެ.

މިގޮތަށް މީޑިއާތަކުން ރިޕޯޓު ކުރަން ފަށާފައިވަނީ ސޯނޫ ސޫދު އޭނާގެ ސޯޝަލް މީޑިއާގައި ޕޯސްޓުކުރި ފޮޓޯއެއްގެ ސަބަބުން ކަމަށް ރިޕޯޓުތަކުގައި ވެއެވެ. އެގޮތުން ސޯނޫ ވަނީ މިއަހަތު ނެރުނު އޭނާގެ ފިލްމު "ފަތޭހު" ގެ ސީކުއެލް އެއް އުފައްދާއިރު އޭގެ ކާސްޓުންގެ ތެރޭގައި ޝާހުރުކް އަދި ސަލްމާނު ހިމެނޭނެ ކަމަށް އިޝާރާތް ކޮށްފައެވެ.

މިކަމާ ގުޅިގެން ސޯޝަލް މީޑިއާގައި މީހުން އުފެއްދި ތަފާތު އެކިކަހަލަ ސުވާލުތަކަށް ޖަވާބުދެމުން ސޯނޫ ބުނެފައިވަނީ "ފަތޭހު 2" މިހާރު ސެޓުވެފައިވާ ކަމަށާއި، އޭގައި ސަލްމާނު ފެންނާނީ ހާއްސަ ކެމިއޯއަކުން ކަމަަށެވެ.

ބޮލީވުޑްގެ މަޝްހޫރު ދެ ޚާނުން އެކުގައި ފިލްމަކުން ފެންނާނެ ދުވަހަކަށް ވަރަށް ގިނަ މީހުން ދަނީ އިންތިޒާތު ކުރަމުންނެވެ.

މީގެ ކުރިން ސޯނޫ ވަނީ ޝާހުރުކް ޚާން އާއެކު "ހެޕީ ނިއު ޔާ" ގައި މަސައްކަތް ކޮށްފައެވެ. އަދި އޭނަަ ވަނީ "ދަބަންގު" ގައި ސަލްމާނު އާއެކު މަސައްކަތް ކޮށްފައެވެ.