އެސްޓޯނިއާގެ ކާމިޔާބު ތަޖުރިބާގެ އަލީގައި ރާއްޖޭގެ ސިއްހީ ނިޒާމު ތަރައްގީކުރަން ރައީސް ޑރ. މުހައްމަދު މުއިއްޒު ޝައުގުވެރިކަން ފާޅުކުރައްވައިފިއެވެ.

އެސްޓޯނިއާއަށް ރައީސް މުއިއްޒު މިހާރު ކުރައްވަމުން ގެންދަވާ ދަތުރުފުޅުގެ ތެރެއިން އެސްޓޯނިއާގެ ހެލްތު މިނިސްޓަރު ރީނާ ސިކުޓް ވަނީ ރައީސް މުއިއްޒުގެ އަރިހަށް މިއަދު އިހުތިރާމްގެ ޒިޔާރަތެއް ކުރައްވައިފައެވެ.

ރައީސް އޮފީހުން ބުނީ އެ ބައްދަލުވުމުގައި އެސްޓޯނިއާއިން ޑިޖިޓަލައިޒޭޝަންގެ ތެރެއިން ސިއްހީ ދާއިރާ ކުރިއެރުވުމަށް ކުރަމުންދާ މަސައްކަތުގެ މުހިންމު އެކިއެކި މައުލޫމާތާއި އިލްމު ރައީސްއާ ހިއްސާ ކުރެއްވި ކަމަށެވެ.

އެގޮތުން ޑިޖިޓަލައިޒޭޝަންއާއެކު ސިއްހީ ހިދުމަތުގެ ފެންވަރު ރަނގަޅުވެ، ހިދުމަތް ހޯދުމަށް ފަސޭހަވެފައިވާއިރު، އެކަމުގެ ސަބަބުން ސިއްހީ ދާއިރާގެ އެކިއެކި ގޮންޖެހުންތަކާއި އެކަންކަމަށް ހޯދެމުންދާ ހައްލުތަކުގެ މައުލޫމާތު ރައީސްއާ ހިއްސާ ކުރެއްވި ކަމަށް ވެސް ރައީސް އޮފީހުން ބުނެފައި ވެއެވެ.

އެ ބައްދަލުވުމުގައި ރައީސް ވަނީ އެސްޓޯނިއާގެ ތަޖުރިބާއާއި ތަންފީޒުކޮށްފައިވާ ކާމިޔާބު އުކުޅުތަކުން އިބުރަތް ހާސިލުކޮށް ރާއްޖޭގެ ސިއްހީ ހިދުމަތުގެ ނިޒާމު ހަރުދަނާކުރެއްވުމުގެ ޝައުގުވެރިކަން ފާޅުކުރައްވައިފައެވެ. ހާއްސަކޮށް ވަކިވަކިން ދުރުގައި ހުންނަ ރަށްތައް ހިމެނޭހެން ރާއްޖޭގެ ހުރިހާ ރަށްތަކެއްގައި، އެއް ހަމައެއްގައި މަތީ ފެންވަރުގައި ސިއްހީ ހިދުމަތް ދިނުމަށް ހުރި ފަރަގުތައް ޑިޖިޓަލައިޒޭޝަންގެ ތެރެއިން ނައްތާލެވޭނެ ގޮތްތަކުގެ މައްޗަށް އެމަނިކުފާނު ވަނީ އަލިއަޅުވާލައްވައިފައެވެ.