ކޮވިޑު ތެރޭގައި މީހުންނަށް އެހީތެެރިކަން ފޯރުކޮށްދިންކަން ޕްރޮމޯޓު ކުރުމަށް ޕީއާރު ޓީމެއް ގެންގުޅުނު ކަމަށް ބުނެ ދެކެވޭ ވާހަކަތައް ބޮލީވުޑްގެ ތަރި ސޯނޫ ސޫދު ދޮގުކޮށްފިއެވެ.

ކޮވިޑުގެ ބަލިމަޑުކަމުގެ ތެރޭގައި ސޯނޫ އެހެން މީހުންނަށް އެހީތެރިކަން ފޯރުކޮށްދިނުމުގެ ސަބަބުން އޭނާއަށް އެތައް ބައެއްގެ މަގުބޫލުކަން ލިބުނެވެ. ނަމަވެސް ބައެއް މީޑިއާތަކުން ވަނީ އޭނާ މީހުންގެ މެދުގައި މަގުބޫލުކަން ހޯދާފައިވަނީ އޭނާ އެ ވެދިން އެހީ، ޕީއާރު ޓީމެއް މެދުވެރިކޮށް ޕްރޮމޯޓު ކުރުމުން ކަމަށް ބުނެ ހަބަރު ފަތުރާފައެވެ.

ސޯނޫ ވަނީ ދާދި ފަހުން އޭނާގެ ފިލްމު "ފަތޭހު" ޕްރޮމޯޓު ކުރުމަށް ދިން އިންޓަވިއުއެއްގައި މިކަން ދޮގު ކޮށްފައެވެ. އެގޮތުން އޭނާ ބުނެފައިވަނީ އޭނާ މީހުންނަށް އެހީވެދިނުމަށް ކުރާ މަސައްކަތް ޕްރޮމޯޓު ކުރުމަށް ޕީއާރު ޓީމެއްގެ އެހީ ހޯދާކަމަށް ބުނެ ދެކެވޭ ވާހަކަތައް އަޑު އިވޭ ކަމަށާއި، އެއީ އެވާހަކަތައް ފަތުރާ މީހުންގެ ނަޒަރިއްޔާ ކަމަށެވެ. ނަމަވެސް އޭނާގެ އެއްވެސް ޗެރިޓީ މަސައްކަތެއް ޕްރޮމޯޓު ކުރުމަށް ޕީއާރު ބޭނުން ކޮށްފައި ނުވާ ކަމަށް ސޯނޫ ވަނީ މި އިންޓަވިއުގައި ބުނެފައެވެ.

އޭނާ އިތުރަށް ބުނެފައިވަނީ އޭނާ މަގުބޫލުވީ ސޯޝަލް މީޑިއާގައި ޕޯސްޓުތައް ޝެއާ ކުރުމުގެ ސަބަބުން ނޫން ކަމަށާއި، އަމަލީ ގޮތުން އެ ހަރަކާތްތަކުގައި ބައިވެރިވުމުން ކަމަށެވެ.

މަސައްކަތުގެ މައިދާނަށް ބަލާއިރު ސޯނޫ އެންމެ ފަހުން ފެނިފައިވަނީ ދާދި ފަހުން ނެރުނު ފިލްމު "ފަތޭހު" އިންނެވެ. މި ފިލްމުގެ ކާސްޓުންގެ ތެރޭގައި މަޝްހޫރު ތަރި ޖެކްލިން ފެނެންޑަސް ވެސް ހިމެނެއެވެ.