ބޮލީވުޑްގެ މަޝްހޫރު ތަރި އަމީތާބު ބައްޗަންގެ މުމްބާއީގައި ހުންނަ ޑުޕްލެކްސް އެޕާޓުމެންޓު ވިއްކައިފި ކަމަށް މީޑިއަަތަކުން ރިޕޯޓު ކޮށްފިއެވެ.

ބޮލީވުޑް ހަންގާމާގެ ރިޕޯޓެެއްގައި ބުނެފައިވަނީ މުމްބާއީގެ އޮޝިވަރާ ގައި ހުންނަ އަމީތާބުގެ ޑުޕްލެކްސް އެޕާޓުމެންޓު އޭނާ މިމަހު ވިއްކާފައިވާ ކަމަށެވެ. އެގޮތުން އެ އެޕާޓްމެންޓު ވިއްކާފައިވަނީ 83 ކަރޯރު ރުޕީސް އަށް ކަމަށްވެސް ރިޕޯޓުގައި ވެއެވެ.

އޮށިވަރާ އަކީ މުމްބާއީގެ ހުޅަނގުގައި އޮންނަ އަވަށަކަށްވީއިރު، މިއީ މިހާރު ވަރަށް ބޮޑަށް ތަރައްގީވެފައިވާ އަވަށެކެވެ. އަމީތާބު ވިއްކާލި އެޕާޓުމެންޓު ހުންނަނީ ކްރިސްޓަލް ގްރޫޕުގެ ރެޒިޑެންޝަލް ޕްރޮޖެކްޓެއް ކަމަށްވާ "ދަ އެޓްލާންޓިސް" ގައެވެ.

ރިޕޯޓުގައިވާ ގޮތުގައި އަމީތާބު މި އެޕާޓްމެންޓު ގަނެފައިވަނީ 2021 ވަނަ އަހަރުއެވެ. އޭރު އޭނާ މި އެޕާޓްމެންޓު ގަނެފައިވަނީ 31 ކަރޯރު ރުޕީސް އަށެވެ. އެހެންކަމުން މި އެޕާޓުމެންޓި ވިއްކާލިއިރު އޭގެ އަގު 168 އިންސައްތަ މަތިވެފައިވާކަމަށް ރިޕޯޓުގައި ވެއެވެ.

އަދި މި އެޕާޓްމެންޓު 2021 ވަނަ އަހަރުގައި ބޮލީވުޑްގެ ތަރި ކްރީތީ ސެނޮން އަށް ކުއްޔަށް ދީފައިވާ ކަމަށްވެސް ރިޕޯޓުގައި ވެއެވެ. އެގޮތުން ކުލީގެ ގޮތުގައި ކޮންމެ މަހަކު 10 ލައްކަ ރުޕީސް ނަގާފައިވާއިރު ސެކިއުރިޓީ ޑިޕޮޒިޓެއްގެ ގޮތުގައި 60 ލައްކަ ފުޕީސް ނަގާފައިވާ ކަމަށް ރިޕޯޓުގައި ވެއެވެ.