ދުނިޔޭގެ ނިސްބަތުން ބަލާއިރު ފިރިހެން ވެރިންނަށްވުރެ ނަފްސާނީ ބަލީގެ ޝިކާރައަކަށް ވާ އަންހެނުން ގިނަކަމަށް ދިރާސާތަކުން ދައްކައެވެ. މިކަން މިހެން ދިމާވާން ޖެހޭ ވަރަށް ގިނަ ސަބަބުތައް އެބަ ވެއެވެ. މިކަމުގެ ފަހަތުގައި ބަޔޮލޮޖިކަލް، ސޯޝަލް، އަދި ސައިކޮލޮޖިކަލް ކަންތައްތަކެއްވެސް ވެއެވެ.

އަންހެނުން ނަފްސާނީ ބަލީގެ ޝިކާރައަކަށްވާ އެންމެ މައިގަނޑު އެއް ސަބަބަކީ މުޖްތަމައުއިން އަންހެނުންނަށް ވަކި މިންތަކަކާއި ހައްދުތަކެއް ކަނޑައަޅާފައި ވުމެވެ. އަދި މަސައްކަތުގެ މައިދާނުގެ އިތުރުން ގޭތެރޭގެ މާހައުލުގައިވެސް އަންހެނުންނާއި ފިރިހެނުން ތަފާތު ކުރާ ވަރު ބޮޑުވުމެވެ. މީގެއިތުރުން، ތަފާތު އެތަައް ރޯލުތަކެއް އެއްފަހަރާ އަދާ ކުރަން ޖެހުމެވެ. މިކަމުގެ ސަބަބުން އަމިއްލަ ނަފްސަށް އޮންނަ އިތުބާރު ގެއްލި މީހާ ނަފްސާނީ ގޮތުން ބަލިކަށިވުމަށް މަގުފަހިވެއެވެ.

މިއީ ހަމަ ވަރަށް ގިނަ އަންހެނުން އުޅެން ޖެހިފައިވާ ގޮތެވެ. އެކަނިވެރި މައިންގެ ގޮތުގައި ތިބެ ވަޒީފާ އަދާކޮށް، އަދި ހަަމަ އެހެންމެ ދަރިން ތަރުބިއްޔަތު ކުރުމުގެ ޒިންމާ އަދާ ކުރާ މީހުން އަޅުގަނޑުމެންގެ މި މުޖުތަމައުގައިވެސް ވަރަށް ގިނައެވެ. މި އަންހެނުންނަށް އެހީތެރިވާނެ ބައެއް ގިނަ ފަހަރު ނުވެއެވެ. މިކަމުގެ ސަބަބުން ކަންކަމާ މެދު ވިސްނަން ޖެހޭ ވަރު ދެގުނަ އިތުރުވެއެވެ.

އަންހެނުން ނަފްސާނީ ބަލިތަކުގެ ޝިކާރައަކަށް ވާ އަނެއް ސަބަބަކީ އުފެދުމުގައި ފިރިހެނުންނާ ތަފާތު ގޮތްތަކެއް ހުރުމެވެ. އެގޮތުން ބަލާއިރު އަންހެނުންނަށް ތަފާތު އެކި ސަބަބުތަކާ ހުރެ ހޯމޯނު މައްސަލަތައް ދިމާވެއެވެ. އަދި މިކަމުގެ ސަބަބުން މީހާ މާ ބޮޑަށް ސްޓްރެސްވެ، ކަންކަމާ ވިސްނަން މަޖުބޫރުވާ ހާލަތްތައް އިތުރުވެ، އެކަމުގެ ސަބަބުން ނަފްސާނީ ސިއްހަތަށް އަސަރު ކުރެއެވެ.

މިހުރިހާ ކަމެއްގެ ސަބަބުންވެސް އަންހެނުންގެ ނަފްސާނީ ސިއްހަތަށް ބޮޑެތި އަސަރުތަކެއް އާދެއެވެ. އަދި ސިކުނޑީގައި އުފެދޭ ޝުއޫރުތައް ހިއްސާ ކުރާނެ މީހެއް ނުހުންނަ ނަމަ އެކަންތައް އިތުރަށް ގޯސްވުންވެސް އެކަށީގެންވެއެވެ. ވީމާ ގާތް މީހާކު ނަފްސާނީ ބަލީގެ ޝިކާރައަކަށް ވާކަމަށް ޝައްކު ކުރެވޭނަމަ އެމީހަކަށް އަވަހަށް އެހީތެރިވެދޭން ކޮންމެ މީހަކުވެސް މަސައްކަތްކުރުން ވަރަށް މުހިންމުވެއެވެ.