ނިރުބަވެރި އިސްރާއީލުން ހަނގުރާމަ ހުއްޓާނުލާ ކަމަށާއި އަދިވެސް މީހުން މަރަމުންދާކަމަށް ބޭރުގެ މީޑިޔާތަކުން ރިޕޯޓްކުރަން ފަށައިފިއެވެ.

އޮފިޝަލުންނާ ހަވާލަދީ ބޭރުގެ ނޫސްތަކުން ރިޕޯޓްކުރާ ގޮތުގައި ފަލަސްތީނުގެ ހުޅަނގުއައްސޭރީގެ ޖެނިން ސިޓީގައި ނިރުބަވެރި އިޒްރޭލުގެ ހައްދުފަހަނައަޅަފައިވާ ޔަހޫދީން ވަނީ ”އޮޕަރޭޝަން އަޔަން ވޯލް“ގެ ނަމުގައި އަސްކަރީ އޮޕަރޭޝަނެއް ފަށައިފައެވެ.

ސުލްހައިގެ ވަގުތުގައި ފަށާފައިވާ މި އޮޕަރޭޝަނުގެ ދަށުން ޖެނިން ސިޓީން މިހާތަނަށް ދިހަ މީހަކު ވަނީ ޝަހީދުކޮށްލާފައެވެ. މި އޮޕަރޭޝަނުގެ ދަށުން ދިން ޔަހޫދީންގެ ބަޑީގެ ހަމަލާތަކުގައި ޒަހަމްވި މީހުންގެ ތަފްސީލެއް އަދި އެއްވެސް ފަރާތަކުން ހާމަކޮށްފައި ނުވެއެވެ. ނަމަވެސް މި ހަމަލާތަކުގެ ސަބަބުން ޒަހަމްވި މީހުންނަށް އެހީވުމަށް އަންނަ އެމްބިއުލާންސްތަކަށް ވެސް، ޔަހޫދީ ސިފައިން ހުރަސް އަޅަމުންދާ ކަމަށް ރިޕޯޓުތައް ބުނެއެވެ.

އޮފިޝަލުން ބުނާ ގޮތުގައި ޖެނިންގައި އިސްރާއީލުން ފެށި އޮޕަރޭޝަނުގައި އެމީހުން ދަނީ މިލިޓަރީ ބުލްޑޯޒަރާއި، ހެލިކޮޕްޓަރާއި، ސިފައިންނާއި ޑްރޯން ވެސް ބޭނުންކުރަމުންނެވެ.

އިސްރާއީލުގެ ހަމަލާތައް އެންމެ ބޮޑަށް މިހާރު އަމާޒުވަމުންދާ ޖެނިންގެ އަލް-‏ރާޒީ ހޮސްޕިޓަލުގެ ޑިރެކްޓަރު، ފައްވާދު ހައްމާދު ވިދާޅުވީ، ޒަހަމްވުމުގެ ސަބަބުން އެ ހޮސްޕިޓަލަށް ގެންނަ މީހުންގެ އަދަދު ބަޔާން ކުރަން ދަތިކަމަށާއި، އެހައި ވެސް ގިނަ މީހުން އެތަނަށް ގެންނަމުންދާ ކަމަށެވެ.

އިސްރާއީލުން ޣައްޒާއާ ދެކޮޅަށް ކުރަމުންދާ ހަނގުރާމައިގައި އޮކްޓޯބަރު 7، 2023 އިން ފެށިގެން މަދުވެގެން 47،035 ފަލަސްތީނު މީހުން މަރުވެ 111،091 މީހުން ވަނީ ޒަހަމްވެފައެވެ. އެ ދުވަހު ހަމާސް އިސްވެ އޮވެ ދިން ހަމަލާތަކުގައި އިސްރާއީލުގައި މަދުވެގެން 1،139 މީހުން މަރުވެ 200 އަށް ވުރެ ގިނަ މީހުން އަޅުވެތިކޮށްފައިވެ އެވެ.