ރ. އުނގޫފާރަކީ ހުރިހާ ދާއިރާއަކުން މަތީ ފަންތީގައި ޚިދުމަތް ލިބޭ ރަށަކަށް ވެގެންދާނެ ކަމަށް ރައީސް ޑރ. މުޙައްމަދު މުޢިއްޒު ވިދާޅުވެއްޖެއެވެ.

ރައީސް މިފަދައިން ވިދާޅުވީ ރ. އަތޮޅުގެ ބައެއް ރަށްތަކަށް ކުރައްވަމުން ގެންދަވާ ދަތުރުފުޅުގެ ތެރެއިން އިއްޔެ އެ އަތޮޅު އުނގޫފާރަށް ވަޑައިގެން، އެ ރަށުގެ ރައްޔިތުންނާ ބައްދަލުކުރައްވައި ދެއްކެވި ވާހަކަފުގައެވެ.

ރޭގައި ރައީސް ވަނީ، އުނގޫފާރު އަރބަން ސެންޓަރެއްގެ ގޮތުގައި ތަރައްޤީކުރެއްވުމަށް އަދުގެ ސަރުކާރުން ކުރައްވަމުން ގެންދަވާ މަސައްކަތްތައް ރައްޔިތުންނާއި ހިއްސާ ކުރައްވާފައެވެ. މިކަމުގައި މެދު އަދި ދުރު ރާސްތާ ވިސްނުންފުޅުގެ ތަރައްޤީގެ މާސްޓަރ ޕްލޭންގެ މަސައްކަތްތައް ކުރެވެމުން ދާއިރު، ހުރިހާ ދާއިރާއަކުން އެންމެ މަތީ ފަންތީގައި ޚިދުމަތް ލިބޭ ރަށަކަށް ރ. އުނގޫފާރު ވެގެންދާނެ ކަމުގެ ޔަޤީންކަން އެރަށުގެ ރައްޔިތުންނަށް ރައީސް ވަނީ ދެއްވާފައެވެ.

އެމަނިކުފާނުގެ ވާހަކަފުޅުގައި މޫސުމީ ގޮތުން ފުރުޞަތު ފަހިވުމާއެކު ރ. އުނގޫފާރުގެ ބިން ހިއްކުމުގެ މަސައްކަތްތައް، ވަޢުދުވެވަޑައިގެންފައި ވާ ގޮތަށް ފުރިހަމަކޮށް ނިންމަވައިދެއްވާނެ ކަމަށް ވިދާޅުވިއެވެ. އަދި އެ މަނިކުފާނުގެ ވެރިކަމުގެ މި ދައުރުގައި، އެރަށުގައި 500 ހައުސިންގ ޔުނިޓް އަޅުއްވައިދެއްވާނެ ކަމަށް ވެސް ވިދާޅުވިއެވެ.

”އިރާދަކުރެއްވިއްޔާ މި އަހަރާއި މިއަންނަ އަހަރާއި، ދެ އަހަރު ދުވަހުގެ ތެރޭގައި މި ރަށުގައި އަޅުގަނޑުމެން ގެދޮރު ބިނާކުރުމުގެ މަޝްރޫޢެއް ފަށާނަން. އަދި އިރާދަކުރެއްވިއްޔާ މި ދައުރުގެ ތެރޭގައި މި ރަށުގައި 500 ހައުސިންގ ޔުނިޓުގެ މަޝްރޫޢެއް އަޅުގަނޑުމެން ކުރިއަށް ގެންގޮސްދޭނަން.“ ރައީސް ވިދާޅުވިއެވެ.

އުނގޫފާރު ތަރައްޤީވެގެން އަންނައިރު، އެއް ދަންފަޅިއަށް ކިޔަވައިދެވޭނެ ގޮތަށް އެރަށުގެ ސްކޫލަށް ބޭނުންވާ ތަރައްޤީ ގެނެސްދެއްވާނެ ކަމުގެ ޔަގީންކަންވެސް ރައީސް ދެއްވިއެވެ. އަދި އެ ރަށުގެ ޞިއްޙީ ދާއިރާއަކީވެސް އެންމެ މަތީ ފަންތީގައި ޚިދުމަތްދޭ ދާއިރާއަކަށް ހެއްދެވުމަށްޓަކައި މަސައްކަތްކުރައްވަމުން ގެންދަވާނެ ކަމުގެ ފުރިހަމަ ޔަޤީންކަން ރައީސް ވަނީ ދެއްވާފައެވެ.

އަރބަން ސެންޓަރު ތަކުގެ ގޮތުގައި ތަރައްގީކުރަން ސަރުކާރުން ނިންމާފައިވާ ހަތް ރަށުގެ ތެރޭގައިވެސް އުނގޫފާރު ހިމެނެއެވެ.