ނިރުބަވެރި އިސްރާއީލުން ހިފާފައިވާ ހުޅަނގު އައްސޭރީގެ ޖެނިން ރެފިއުޖީ ކޭމްޕުގައި އިންސާނުންނަށް ދިރިނޫޅެވޭ ވަރަށް އެތަން ސުންނާފަތިކޮށްފިއެވެ.

ހަނގުރާމަ ހުއްޓާލުމަށް އެއްބަސްވެ ސުލްހައިގެ މި ދަނޑިވަޅުގައިވެސް އިސްރާއިލުން އަދިވެސް ދަނީ ޣައްޒާގައި އަސްކަރީ އޮޕަރޭޝަންތައް ހިންގަމުންނެވެ. ޖެނިން ރެފިއުޖީ ކޭމްޕަށް ދިން ހަމަލާތަކުގައި މަދުވެގެން ދިހަ މީހުން މަރުވެ، އެސަރަހައްދުގެ މައި ހޮސްޕިޓަލުން ފެނާއި ކަރަންޓް ކަނޑާލާފައިވާ ކަމަށް އިންސާނީ ހައްގުތަކަށް މަސައްކަތްކުރާ އދ. އެޖެންސީން ބުނެއެވެ.

ޣައްޒާގެ ނިކަމެތި ރައްޔިތުންނަށް އެހީ ހިފައިގެން އިއްޔެ އެކަނިވެސް 808 އެހީގެ ޓްރަކް ގޮސްފައިވާއިރު މި ތަކެތި ހޯދަންދާންވެސް ގިނަ މީހުން ތިބީ ނުކެރިފައި ކަމަށް ބައެއް މީޑިޔާތަކުން ރިޕޯޓުކުރެއެވެ. ސުލްހައިގެ މި ދަނޑިވަޅުގައިވެސް އިސްރާއީލުން ޖަރީމާތައް ހިންގައި އެކި ސަރަހައްދުތަކުން މީހުން މަރަމުންދާއިރު ފަލަސްތީނުގެ ބައެއް ރައްޔިތުންނަށް އަދިވެސް ހަނގުރާމައިގެ އަނިޔާ ލިބެމުންދާކަމަށް ރިޕޯޓްތައް ލިބެއެވެ.

އެމެރިކާގެ ހަތިޔާރު ބޭނުންކޮށްގެން އިސްރާއީލުން ޣައްޒާއާ ދެކޮޅަށް ކުރާ ހަނގުރާމައިގައި އޮކްޓޯބަރު 7، 2023 އިން ފެށިގެން މަދުވެގެން 47،107 ފަލަސްތީނު މީހުން މަރުވެ 111،147 މީހުން ވަނީ ޒަހަމްވެފައެވެ. އެ ދުވަހު ހަމާސް އިސްވެ އޮވެ ދިން ހަމަލާތަކުގައި އިސްރާއީލުގައި މަދުވެގެން 1،139 މީހުން މަރުވެ 200 އަށް ވުރެ ގިނަ މީހުން އަޅުވެތިކޮށްފައިވެ އެވެ.