17،000 ރުފިޔާގެ މުސާރައެއް ލިބޭ ގޮތަށް ދިވެހި ފުލުހުންގެ ޚިދުމަތުން ސްޕެޝަލް ކޮންސްޓެބްލަރީ ކޮންސްޓަބަލްގެ ވަޒީފާއަށް ވަނުމަށް ހުޅުވާލައިފިއެވެ.

މި ވަޒީފާއަށް ކުރިމަތިލެވޭނެ ޝަރުތުތަކުގެ ގޮތުގައި ވަނީ، ގްރޭޑް 10 ނިންމާފައިވުން، މީލާދީ ގޮތުން 18 އަހަރާއި 39 އަހަރާ ދެމެދުގެ މީހެއް ކަމުގައިވުމާއި، ފިރިހެން ކެންޑިޑޭޓެއް ނަމަ އިސްކޮޅު ފަސް ފޫޓު ތިން އިންޗި އަށްވުރެ ކުރު ނުވުމާއި، އަދި އަންހެން ކެންޑިޑޭޓެއް ނަމަ އިސްކޮޅު ފަސް ފޫޓަށްވުރެ ކުރު ނުވުމާއި، އިސްލާމް ދީނުގައި ހައްދެއް ކަނޑައެޅިފައިވާ ކުށެއް ނުވަތަ ވައްކަން، ޓެކުން، މަކަރާ ޙީލަތް، މަސްތުވާ ތެކެތި ބޭނުންކުރުން، ނުވަތަ މަސްތުވާތަކެތީގެ ވިޔަފާރިކުރުން، އަދި ޚިޔާނާތް ފަދަ ކުށެއް ކުރިކަން ވޭތުވެދިޔަ ފަސް އަހަރުދުވަހުގެ ތެރޭގައި ޝަރީޢަތަށް ސާބިތުވެފައިވާ ފަރާތެއް ކަމުގައި ނުވުން ހިމެނެއެވެ.

ވޭތުވެދިޔަ ފަސް އަހަރު ދުވަހުގެ ތެރޭގައި، މަނާކުރެވިފައިވާ މަސްތުވާއެއްޗަކުން އެކަހެރިވުމަށް ފަރުވާ ހޯދާފައިވާ ފަރާތަކަށް ނުވުމާއި، ދިވެހި ރާއްޖޭގައި ރަޖިސްޓްރީ ކޮށްފައިވާ އެއްވެސް ސިޔާސީ ޕާޓީއެއްގެ ރަޖިސްޓްރީގައިވާ ފަރާތެއް ކަމުގައި ނުވުމުގެ އިތުރުން ސްޕެޝަލް ކޮންސްޓެބްލަރީ ފުލުހުންގެ ތަމްރީން ފުރިހަމަކުރެވޭ ފަދަ ދުޅަހެޔޮ ސިއްޙަތެއްގައިވާ ފަރާތެއް ކަމުގައިވުން ޝަރުތުތަކުގެ ތެރޭގައި ހިމެނެއެވެ.

މި މަގާމުގެ މަސްއޫލިއްޔަތަކީ ސްޕެޝަލް ކޮންސްޓެބްލަރީ ފުލުހެއްގެ މަސްއޫލިއްޔަތު އަދާކުރުމުގެ ގޮތުން ކުރަންޖެހޭ އެންމެހާ މަސައްކަތްތައް ކުރުމެވެ.

ވަޒީފާއަށް ހޮވޭ ފަރާތްތަކުން އާންމުކޮށް ވަޒީފާ އަދާކުރަން ޖެހެނީ ތިނަދޫ ސިޓީ ޑރ.ޢަބްދުއް ޞަމަދު މެމޯރިއަލް ހޮސްޕިޓަލްގައެވެ. ވަޒީފާއަށް ނަގަން ހަމަޖެހިފައި ވަނީ 16 ފަރާތެވެ.